Rom 6 | CklSC | STEP | Sǝr mi tǝ muri awa nkǝrɛ, dza? Ka muri lǝkǝma aka ‘ya biku ani ka ɗakur Hyal dzagǝi ya?

‏ Romans 6

Nti ala Biku, Ndzai ata Mulɛ akwa Kǝrsti

1 Sǝr mi tǝ muri awa nkǝrɛ, dza? Ka muri lǝkǝma aka ‘ya biku ani ka ɗakur Hyal dzagǝi ya? 2 Adi ata ‘ya wɛ! Mur nti ala biku; mǝmi tǝ muri awa lǝkǝma aka ndzai akwa dza kadamwa? 3 Kǝna gǝri ta zǝndi apǝri sakatǝ muri thlǝktǝdzi kaka Kǝrsti akwa bamtizǝma, muri thlǝktǝdzi kaka dza akwa ntǝrni wɛ? 4 ^aAkuya sakatǝ muri ‘ya bamtizǝma, mur nti ba ndǝ harnta tǝ muri kaka Kǝrsti, ba tsu apa tǝ Kǝrsti hyati akwa ntǝnti atar nggakur Tada ni, mur yɛ muri ata ndzai nǝr mpikǝ bǝlin.

5 Ma mur thlǝktǝdzi kaka dza apani akwa ntǝrni, muri tsuwɛ kura aka ɗǝnga muri ata thlǝktǝdzi kaka dza akwa hyatǝrni akwa ntǝnti. 6 Akuya muri zǝndi apǝri dzá muri nam halhali nǝr biku ni ndǝ kukwanta kaka dza ani ka kura biku tsu awa ‘ya aka dǝna ata kǝra muri, muri tsu adi faliyir biku wɛ— 7 akuya biku adi aka dǝna ata kǝra ndǝ nam tara nti kǝra wɛ.

8 Kulini ma muri nti kaka Kǝrsti, muri mbǝrsa apǝri mur tsu ata ndzai ata mulɛ kaka dza. 9 Akuya muri zǝndi apǝri tǝng tǝ Kǝrsti hyati akwa ntǝnti dzǝ tsu adi ata nti kadamwa wɛ; nti tsu adi aka dǝna ata kǝrar wɛ. 10 Nti nam tǝ dzǝ ntǝ ni, dzǝ nti ala biku ka duku akuya ka sanga ndzi; ama mpikǝ nam tǝ dzǝ ada ndzai akǝr ni, dzǝ ada ndzai ala Hyal.

11 Tsu akwa whal ǝni, kǝtamɛ apǝri gǝri ntǝnti ala biku ama gǝri ata mulɛ ala Hyal akwa Kǝrsti Yɛsu. 12 Kadǝbar ǝni ta gǝr ta ngyar biku ka dzǝ ndzai thlakǝr dzá gǝri nam ata ntǝ ni ani ka tǝ gǝri awa kǝlǝngkǝr ala ‘ya su kulɗarni yarɛ ni. 13 Ta gǝr ta hamnta palai yarɛ nǝr dza gǝri ala biku, apa sǝr kǝthlǝr yarɛ nǝr kǝmangarkur, ama ka gǝri hamnta kǝr gǝri ala Hyal, akuya gǝri ntǝnti ama kulini Hyal la gǝri mpikǝ bǝlin; ani ka gǝri hamnta palai yarɛ nǝr dza gǝri alari apa sǝr kǝthlǝr yarɛ nǝr kalkalkur. 14 Akuya biku adi ata ndzai thlakǝr gǝri wɛ, kadǝbar gǝri adi akwi mabari wɛ, ama gǝri akwi ɗakur Hyal.

Fali yarɛ ala Kalkalkur

15 Sǝr mi dza? Ka muri ‘ya biku ya kadǝbar tǝ muri adi akwi mabari wɛ ama muri akwi ɗakur Hyal? Adi ata ‘ya wɛ! 16 Gǝri ta zǝndi apǝri sakatǝ tǝ gǝri hamnta kǝr gǝri ala ndǝ laka tǝ gǝri ata kǝlǝngkǝr alari apa fali yarɛ, gǝri fali yarɛ nǝr ndǝ nam tǝ gǝri ngandǝrɛ alari ni—tar gǝri fali yarɛ nǝr biku nam ada mwari aka ndɛ akwa nti, kǝna gǝri fali yarɛ nǝr kǝlǝngkǝr, nam ada mwari aka ndɛ akwa kalkalkur? 17 Ama usɛ ala Hyal nam, wala watsi gǝri fali yarɛ ala biku, gǝri ngandǝrɛ aka sanga ɗǝfa gǝri ala dzǝli hyipɛ nam tǝ ndǝ tara hau akwa tsiya gǝri. 18 Hyal faba tǝ gǝri akwi biku ani ka kulini gǝri ndzai faliyir kalkalkur.

19 Yi ada ndǝrɛ ata kǝra sǝ ǝni apa tǝ ndɛ ada nkǝrɛ su kadǝbar gǝri kura dǝna akwa ndzaiyir gǝri. Tsu apa tǝ gǝri ada hamnta palai yarɛ nǝr dza gǝri akwa falikur ala su ghyǝmbur ba ala dzagǝi kǝmangarkur ani kulini hamntamɛ tǝ dar akwa falikur ala kalkalkur nam ada mwari ala ndzai ka Hyal ɗiɗi. 20 Sakatǝ gǝri fali yarɛ ala biku, adi ta ndzai ntsakǝr ala gǝri ka gǝri ‘ya sǝ nam tǝ Hyal ada bara wɛ. 21 Paidar mi tǝ gǝri tara ɓui akwa saka nda akwa sǝ yarɛ nam kulini tǝ gǝri ada nga sǝlaiyari? Sǝ yarɛ ǝnda wadzǝɓar dar nti! 22 Ama kulini nam kura gǝri tsu faliyir biku ba gǝri kǝ ndzai faliyir Hyal, paidar sǝ nam tǝ gǝri ata ɓui ada mwari aka ndɛ ka ndzaiyir mpika gǝri ka Hyal, ba wadzǝɓari ani mpikǝ nam kura kurkuri. 23 Akuya wadzǝɓar biku ani nti, ama sǝgar Hyal ani mpikǝ nam kura kurkuri akwa Kǝrsti Yɛsu Thlakǝr muri.