Romans 7
Sǝr Tsǝlɛ ata Kǝra Kǝldzi
1Gǝr ta zǝndi wɛ, madar mama yarɛ—akuya Yi ada ndǝrɛ ala sǝli nam tara zǝndi mabari—apǝri mabari aka dǝna ata kǝra sal ɗiɗi sakatǝ dzǝ ata mpikɛ? 2Wulamɛ, mabari nkǝrɛ apǝri mwala nam tara kǝl sal dzǝ ata ndzai akwi salǝrni har ma sal ni aka mpikɛ, ama ma salǝrni nti, dzǝ tsu adi akwi mabariyir kǝldzi wɛ. 3Ani dzá, ma mwala ni kǝl sal damwa sakatǝ salǝrni tsu ata mulɛ, ndɛ ata kǝga tǝni mwalar ‘ya badawi. Ama ma salǝrni nti, dzǝ kǝ mpǝlbadzi akwi mabari nda ba dzǝ adi mwalar ‘ya badawi wɛ, wala ma dzǝ kǝtǝ sal damwa ma. 4Ani, madar mana yarɛ, gǝri yɛ gǝri nti ala mabari atar dzá Kǝrsti ni, apǝri ka gǝri ndzai nǝr ndǝ damwa, nǝr Kǝrsti nam tara hyati akwa ntǝnti ni, akuya ka muri ya munya ala Hyal. 5Akuya sakatǝ dzǝri biku ani thlakǝr muri, sǝɗar ‘ya biku nam tǝ mabari hyanti ada ‘ya kǝthlǝr akwa dza muri yarɛ, ani ka munya yarɛ nam tǝ muri ya mwari aka muri akwa nti. 6Ama kulini, atar tǝ muri nti ala sǝ nam tara saga mbwai tǝ muri, mabari ni tsu adi ata mbwai tǝ muri kǝra wɛ ani ka muri ‘ya kǝthlǝr akwa whal bǝlin nǝr mambǝlɛ, ba adi akwa whal halhali nǝr mabari rǝbwa-rǝbwa wɛ.Bǝbǝkǝi aka Biku
7 aSǝr mi tǝ muri awa nkǝrɛ, dza? Mabari ni biku ya? pakatu adi ahani wɛ! Dzǝri Yi adi ata mǝzi ka zǝndi sǝr mi ani biku wɛ ɗiɗi atar mabari ni. Akuya Yi adi ata mǝzi ka zǝndi sǝr mi ani ‘ya ngǝktǝkur ma mabari ta nkǝrɛ, “Ta gǝ ta ‘ya ngǝktǝkur wɛ.” 8Ama aghǝla tǝ Yi ngati tsau ǝni biku ada ‘ya kǝthlǝr akǝr ka mǝrti tǝ Yi ada ‘ya ngǝktǝkur hang. Akuya ma adi tǝ mabari wɛ, biku ntǝnti. 9Akwa saka nam tara kwatsǝni Yi ata mulɛ kura aka mabari; ama sakatǝ tsau ni si, biku sǝba ata mulɛ ba dzǝ ka hakur tǝra akwi hakar nti. 10Tsau ǝni nam ɗakurari ka dzǝ si alai aka mpikɛ, ata vuiya ǝni dzǝ si aka nti. 11 bAkuya biku, tǝ dzǝ ɓui whalɛ nam tǝ tsau ni si akǝri, dzǝ zǝlanta tǝra, ba atar tsau ni vu tǝra akwa nti. 12Ani dzá, Hyal dza ani tara hamnta mabari ba tsau ni kal-kal ba ɗaku. 13Sǝ nam ɗaku ni, dza, kǝ ndzai nti alai ya? Adi ata ‘ya wɛ! Ama apǝri ka mur zǝndi biku dzǝ biku, dzǝ si aka nti akwa yɛ atar sǝ nam ɗaku, ani ka atar tsau ni biku ata ndzai biku wurwuri. 14Mur zǝndi apǝri mabari ni dzǝ aka mambǝlɛ; ama Yi akwa dzǝr biku, Yi fali ala biku. 15 cYi adi ada ngaba sǝ nam tǝ Yi ada ‘ya wɛ. Akuya sǝ nam tǝ Yi ada bara ka Yi ‘ya Yi adi ada ‘ya wɛ, ama sǝ nam tǝ Yi ngǝla ani tǝ Yi ada ‘ya. 16Kulini ma Yi ada ‘ya sǝ nam kura Yi ada bara, Yi yiɗɛ apǝri mabari ni ɗaku. 17Apani ni, adi Yi tǝ kǝrna ani ada ‘ya tǝni kǝra wɛ, ama biku nam ada ndzai akwa yɛ. 18Yi zǝndi apǝri sǝ ɗaku adi ada ndzai akwa Yi wɛ, nam ani, akwa dzawai nǝr kum aka masi nǝr biku. Akuya Yi aka miyir ‘ya sǝ nam ɗaku ama Yi adi ada mǝzi ‘yati wɛ. 19Akuya sǝ nam tǝ Yi ada ‘ya adi ani sǝ nam ɗaku tǝ Yi ada bara ‘ya wɛ; a’a, sǝ kulɗa nam kura Yi ada bara ‘ya—ani tǝ Yi ada lǝkǝma aka ‘yari. 20Kulini ma Yi ada ‘ya sǝ nam kura Yi ada bara ‘ya, tsu adi yɛ ani ada ‘ya tǝni kǝra wɛ, ama biku nam ada ndzai akwa yɛ ani ada ‘ya tǝni. 21Ani Yi ɓui mabari ǝni ada kǝthlǝr akwa yɛ: Sakatǝ Yi ada bara ‘ya sǝ nam ɗaku, kulɗakur adai akwandari adzǝra. 22Akuya akwa ɗǝfawai mabariyir Hyal ɗaku alai; 23ama Yi wula mabari damwa ada ‘ya kǝthlǝr akwa palai yarɛ nǝr dzawai, ada dlǝ mpa ata kǝra mabari nam akwa hankalawai ba mǝrti tǝra ndɛ akwa fǝrsǝna nǝr mabariyir biku nam ada ‘ya kǝthlǝr akwa ntsa palai yarɛ nǝr dzawai. 24Mǝmi hangkur kalkuta nam tǝ Yi akǝri! Wa ani awa mbuli tǝra akwa dzǝr nti ǝni? 25Usɛ ala Hyal—atar Yɛsu Kǝrsti Thlakǝr muri! Ani dza, Yi tǝ kǝrna akwa hankalawai Yi fali ala mabariyir Hyal, ama akwa dzǝr bikǝrna ni Yi fali ala mabariyir biku.
Copyright information for
CklSC