‏ Romans 9

Ndzǝ nam tǝ Hyal Tsarba

1Yi nkǝr dzǝrkur akwa Kǝrsti—Yi adi ada hawi wɛ, ɗǝngar ɗǝfawai tsanti apǝri ahani akwa Mambǝl Kartǝ— 2Yi ka bwanai nam dzau ba sǝwa ɗǝfu nam kura ada kuri. 3Akuya Yi ata yiɗɛ ka ndǝ kǝlnta barkarna ba ka ndǝ thlanta tǝra ta Kǝrsti ata nyar madar mama yarɛ ndzǝ nam kulfǝrna, 4 ^andzǝr Izǝraila ni. Dar dza tǝ Hyal kǝtǝ ka madar; nggakur Hyal yarɛ ni nǝdar, sǝ yarɛ nam Hyal mbwai ni, dlu mabari ni, vǝkǝr sǝlai akwa fǝr Hyal ni ba alkawal yarɛ ni. 5Kakár kaka yarni nǝdar, ba ata dar ani tǝ ndǝ ɓui kakár Kǝrsti nǝr kum aka masi, dzǝ nam tǝ Hyal ata kǝra ndzǝ sang tǝ ndǝ ada hǝmɛ kura kurkuri! ▼

▼Wala Kǝrsti, dzǝ nam ata kǝra sang. Hyal dzǝ nam ata kǝra sang hǝmɛ kǝ ndzai alari har kura kurkuri!

Apani.

6Adi apǝri kura Hyal ta ɓǝlati alkawalǝrni wɛ. Akuya adi sanga ndzǝ nam tara hyati ata Izǝraila dar ndzǝr Izǝraila wɛ. 7 ^cAdi apǝri kadǝbar dar kulfǝr Ibrahim mǝrti tǝ dar madar Ibrahim wɛ. Pam ta ǝni, “Atar Isaku ani tǝ ndǝ ata tsǝ kulfǝrni.” 8Akwa ndǝrɛ yarɛ damwa, adi madar nǝr kum aka masi ani madar Hyal wɛ ama madar nǝr alkawal ani tǝ ndǝ ada wulɛ apǝri kulfǝr Ibrahim. 9 ^dAkuya ǝni ani whal nam tǝ ndǝ ‘ya alkawal ni akwa: “Ata saka nam tǝ ndǝ vi Yi ata ɓakta si ba ma Yi ta si Saratu ata ɓui zǝr.”

10Adi ɗiɗi ǝnda wɛ, ama madar Rǝbɛka tada dar ndǝ duku, ani tada muri Isaku. 11 ^eAma kǝmata tǝ ndǝ awa yai ɓwal yarni wala tǝ dar awa ‘yati kǝlara sǝ nam ɗa wala kulɗa—akuya ka sǝ nam tǝ Hyal ada bara akwa tsar su ka dzǝ ‘ya adai: 12adi atar kǝthlǝr wɛ ama atar Hyal nam ada ka ndɛ—Thlaku ni nkǝrɛ ala Rǝbɛka, “Ndǝ nam nggari ata ‘ya kǝthlǝr ala ndǝ nam nkyiɗari.” 13 ^fTsu apa rǝbwa-rǝbwa: “Yakubu Yi yiɗɛ, ama Isuwa Yi ngǝla.”

14Mǝ dza tǝ muri awa nkǝrɛ? Hyal ada ‘ya sǝ nam kura kal-kal ya? adi ahani wɛ! 15 ^gAkuya dzǝ nkǝrɛ ala Musa,
“Yi ata ‘ya kǝtǝrdzi ata kǝra ndǝ nam tǝ Yi aka kǝtǝrdzi
ba Yi ata kalhur ala ndzǝ Yi ata kalhur akari.”

16Kadǝbar ǝni, adi ada ndzai ata sǝ nam tǝ ndɛ ada bara wala tǝ ndɛ ada ‘ya wɛ, ama ata kǝtǝrdzǝr Hyal. 17 ^hAkuya Labar Hyal nkǝrɛ ala Firauna, “Yi mǝrti tǝngɛ kuhyi akuya ka sǝ ǝni, apǝri ka Yi tsanti dǝnarna ata gɛ ba apǝri ka ndǝ ka thlǝmawai akwa sanga dunya.” 18Kadǝbar ǝni Hyal ‘ya kǝtǝrdzi ala ndǝ nam tǝ dzǝ ada bara ‘ya kǝtǝrdzi alari, ba dzǝ mǝrti ɗǝfa ndǝ ɓaɓal ndǝ nam tǝ dzǝ ada bara mǝrti ɓaɓal.

19Gɛ ata nkǝrɛ alai: “Antǝ ka mǝ tǝ Hyal ada ɗǝmnya ala muri? Akuya wa ani awa ngǝla ‘ya sǝ nam tǝ dzǝ ada bara?” 20 ⁱAma Gǝ wa, ndɛ kal, tǝ gɛ awa kalaktsǝni labar ala Hyal? “Sǝ nam tǝ ndǝ mǝrti awa nkǝrɛ ala ndǝ nam tara mǝrti tǝni, ‘Kami tǝ gǝ mǝrti tǝra apani ya?’” 21Ndǝr hǝnɛ dzǝ adi aka dǝna tǝ dzǝ awa hǝnti tsu tǝ hai hǝnǝrni tǝghum yarɛ nakumari nǝr kǝthlǝr aka sǝlai nakumari nǝr kǝthlǝr tatang vǝri wɛ?

22Tsu akwa whal ǝni, wala tǝ Hyal mǝzi ka dzǝ tsanti sǝwa ɗǝfǝrni ba dǝnarni, dzǝ aka kǝmar hang ala ndzǝ nam tǝ ɗǝfǝrni ata ɗǝkǝr ala dar, ndzǝ nam tǝ ndǝ pui ka santadzi. 23Dzǝ ‘yati ǝni ka tsanti ɓwalkur nggakurni ala ndzǝ nda nam tǝ dzǝ ‘ya kǝtǝrdzi ala dar ni nam tǝ dzǝ ɗǝmhǝi tsu din akuya ka nggakur— 24wala muri, nam tǝ dzǝ kǝga tsuwɛ, adi ɗiɗi akwa ntsa ndzǝr Yahudi wɛ, ama akwa ntsa ndzǝ kura Yahudi yɛ. 25 ^jApa tǝ Hyal nkǝrɛ akwa kakadǝr Hauzaya,
“Yi ata kǝga tǝ dar ‘ndzǝrna’ ndzǝ nam kura ndzǝrna;
ba Yi ata ka tǝni ‘ndǝ nam tǝ Yi yiɗɛ’ dzǝ nam kura Yi ta yiɗɛ,”

26 ^kba,
“Ata ‘ya apǝri akwa vui ǝnda nam tǝ ndǝ gha ala dar,
‘Gǝr adi ndzǝrna wɛ,’
ndǝ ata ka tǝ dar ‘madar yarɛ nǝr Hyal nam aka mpikɛ.’”

27 ^lIsaya ndǝri lǝlɛ ata kǝra Izǝraila:
“Wala tǝ hangkur ndzǝr Izǝraila ‘ya apa wuyahu ata nya manda,
ɗiɗi mambiya dar ani ata ɓui mbatǝdzi.
28Akuya Thlaku ni ata
thlanta hakarni ala dunya bǝtǝbǝtu ba ani aka dǝntari.”

29 ^mTsu ahani apa tǝ Isaya nkǝrɛ kǝma-kǝma:
“Tar ma Thlaku nam Ɓwaltasang ni
ngyar ala muri kulfǝ yarɛ,
muri ata ndzai apa Saudaum,
muri ata ndzai apa Gwamara.”

Kura Mbǝrsar Izǝraila

30Sǝr mi dza tǝ muri awa nkǝrɛ? Apǝri ndzǝ kura Yahudi yarɛ nam kura ta bara ndzai kalkalkur, dar ɓui tǝni, ndzai kalkalkur nam atar hamnta dzǝri; 31ama Izǝraila, nam tara bara mabari nǝr ndzai kalkalkur, ta ɓui tǝni wɛ. 32Kami? Kadǝbar dar bara tǝni adi atar hamnta dzǝri wɛ ama apa atar kǝthlǝr yarɛ. Dar mbuthlǝlɛ ata payar mbuthlǝlɛ. 33 ⁿApa rǝbwa-rǝbwa:
“Wulɛ, Yi vi akwa Zayaun paya nam ada hau sǝli akwa mbuthlǝlɛ
ba paya nam ada mǝrti tǝ dar ada dla,
ba ndǝ nam tara mbǝrsa akwa dza adi ata saga lǝkwa sǝlai wɛ.”