Titus 1
1Kakadu ǝni hyati aka Bulusu, zǝr kǝiyir Hyal ba ndǝr hya nǝr Yɛsu Kǝrsti, akuya hamnta dzǝrǝr ndzǝ nam tǝ Hyal tara tsarba ba zǝndi su nǝr dzǝrkur nam ada mwari aka ndɛ akwa ndzai apa tǝ Hyal ada bara— 2hamnta dzǝri ǝni ba zǝndi sǝ nam ada ndzai ata tǝmatsǝniyir mpikǝ nam kura kurkuri, nam tǝ Hyal, dzǝ nam kura ada hawi, tara ‘ya alkawalari kabutu baditsǝniyir saka, 3ba ata sakar ni nam tǝ dzǝ vi dzǝ sǝba aka ndǝrǝrni atar nkǝr ndǝrǝr Hyal nam sǝɗa tǝ ndǝ hau akwa tsiyawai atar tsawur Hyal Ndǝr Mbati tǝ muri. 4 a Yi ada rǝbwa ala Taitus, zǝrna nam dzǝri atar hamnta dzǝri nam tǝ sanga muri akǝri. Ka Hyal Tada ni ba Kǝrsti Yɛsu Ndǝr Mbati tǝ muri la gǝri ɗakur ba ndzai lapiyakur.Kǝthlǝrǝr Taitus akwa Kǝrɛti
5Yi ngyar tǝngɛ akwa Kǝrɛti, kadǝbar ka gǝ kuraba ‘ya sǝ yarɛ nam ada bara ka ndǝ ‘ya, ba ka gǝ vi ndzǝ nam ngganggar ikǝlizǝya akwa kǝlara mǝlmɛ, apa tǝ Yi tara nkǝrɛ ala gɛ. 6 bNdǝ ngga akwa ikǝlizǝya ka dzǝ ndzai kura aka aibai, salǝr mwala duku, sal nam tǝ madarni aka mbǝrsa ba kura ndɛ ada ngǝngǝl tǝ dar aka susukur ba kura ngandǝrkur. 7Akuya ndǝ ngga akwa ikǝlizǝya, kǝthlǝr Hyal akwa tsiyari, kǝ ndzai ntsakǝr ka dzǝ ndzai kura aka aibai, kura kǝngɛ, kura ɗǝfari ada ngwatiya sǝwa, kura mbalma, kura ada ‘ya sǝ rǝm-rǝm, kura ada bara sǝm ndɛ. 8Ata vuiya su yarni ka dzǝ ndzai ndǝr dlu mǝthlǝɓi, ndǝ nam ada yiɗǝ sǝ nam ɗaku, ndǝ nam ada tsǝlpi kǝrni, ndǝ nam kal-kal, ndǝ nam kartǝ ba ndǝ nam ‘yi-’yi. 9Kǝ ndzai ntsakǝr ka dzǝ ngǝzi labar dzǝrkur ni ɓaɓal apa tǝ ndǝ tsǝlɛ, ani ka dzǝ dǝnautsǝni ndzǝ damwa atar sǝr tsǝl nam dzǝri ba ka dzǝ ghakǝr ala ndzǝ nam ada ngǝla dzǝrkur ni. 10Akuya ndzǝr ‘ya lǝkǝdzikur adai hang, ndzǝr gha su ɓǝrtu ba ndzǝr zǝla ndɛ, apamá ndǝr nu ndzǝ aka katsa. 11Kǝ ndzai ntsakǝr ka ndǝ harti nya dar, kadǝbar dar ada kikilnta sanga yalǝr kuta kǝi atar hyipǝ sǝ yarɛ nam kura kal-kal ka dar hyipɛ, ba dar ada ‘ya ǝnda akuya ka sǝm ndɛ. 12Wala pathlu akwa ntsa nabiyir dar ma nkǝrɛ, “Ndzǝr Kǝrɛti sanga dar ada hawi kǝlara saka, dar mawi nam kulɗa, dar sǝrwai ba nyanyam.” 13Sǝ nam tǝ ndǝ tara gha ata kǝra dar ni dzǝri. Kadǝbar ǝni, ka gǝri gha ala ndzǝ yarni apǝri sǝr tsǝlǝr dar yarɛ adi kal-kal wɛ, ani ka dar ndzai aka hamnta dzǝri nam kal-kal 14ba kura dar tsu awa nga tsǝdzǝ sǝr watsi kura dzǝri nǝr ndzǝr Yahudi wala tsawur ndzǝ nam tara ngǝla dzǝrkur ni. 15Ala ndzǝ nam kǝtsǝkǝtsi akǝma Hyal, sanga sǝ kǝtsǝkǝtsi, ama ala ndzǝ nam dlǝrpu ba kura aka mbǝrsa, sǝ adi nam kǝtsǝkǝtsi wɛ. Dzǝri, ɗǝngar dar ba ɗǝfa dar kurtaka dlǝrptsǝni dzi. 16Dar ada kǝtǝ apǝri dar zǝndi Hyal, ama sǝr ‘yar dar adi ta tsanti wɛ. Dar ndzai sǝr ghyǝmbur, kura ngandǝrkur ba dar ta mǝzi ka ‘yati sǝ nam ɗaku wɛ.
Copyright information for
CklSC