Titus 2
Sǝ yarɛ nam Ntsakǝr ka Ndǝ Hyipɛ ala Albwa yarɛ
1Kǝ ndzai ntsakǝr ka gǝ hyipǝ sǝ nam ada si kal-kal aka hyipǝ sǝ nam dzǝri. 2Ka gǝ hyipɛ ala sǝli nam ngga-ngga ka dar tsǝlpi kǝr dar, ka ndǝ mǝzi la dar sǝlai, ka dar ɓǝlati kǝr dar, ka dar hyati ɓaɓal akwa hamnta dzǝri, akwa yiɗǝdzi ba akwa ɓati su. 3Tsu akwa whal ǝni, ka gǝri hyipɛ ala mwahyi yarɛ nam ngga-ngga ka dar ndzai aka vǝkǝr sǝlai ala Hyal akwa ndzaiyir dar, ta dar ta ndzai ndzǝr hawi ata kǝra ndzi wala ndzai faliyir sǝsa su hang, ama ka dar hyipǝ sǝ nam ɗaku. 4Antǝ dar ata mǝzi ka tsǝlɛ ala mwahyi nam tsu nkyǝnkyiɗu ka dar yiɗɛ salǝr dar yarɛ ba madausaiyir dar, 5ka dar ndzai ndzǝr tsǝlpi kǝr dar ba ɗǝfu kǝtsǝkǝtsi, ka dar ndzai ndzǝr ‘ya kǝthlǝr aivi, ba ka dar ndzai ndzǝr ‘ya ɗakur, ba ndzǝr kǝlǝngkǝr ala salǝr dar yarɛ, ani ka ta ndǝ ta ngǝngǝlɛ ndǝrǝr Hyal. 6Tsu apani, ka gǝri dǝnautsǝni dakurai yarɛ ka dar ndzai ndzǝr tsǝlpi kǝr dar. 7Akwa kǝlara su ka gǝ ndzai sǝr tsǝlɛ ala dar atar ‘ya sǝ nam ɗaku. Akwa sǝr hyipǝr ngɛ ka gǝ tsanti dzǝrkur ba ha dǝna 8ba ndǝrɛ nam kura ndɛ awa mǝzi ka ngǝli ani ka ndzǝ nam dǝgunmar gǝri ka dar lǝkwa sǝlai kadǝbar dar adi aka sǝ nam kulɗa tǝ dar awa nkǝrɛ ata kǝra yar wɛ. 9Tsǝlɛ mɛ ala fali yarɛ ka dar kǝlǝngkǝr ala thlakǝr dar yarɛ akwa kǝlara su, ka dar ‘ya ka panyi ɗǝfa thlakǝr dar, kura dar awa sǝnau ndǝrɛ ala dar, 10ba ta dar ta hǝlɛ ala dar, ama ka dar tsanti apǝri ndɛ ata mbǝrsa aka dar, ani ka akwa kǝlara whalɛ dar ata mǝrti hyipǝ sǝ nam ata kǝra Hyal Ndǝr Mbati tǝ muri tǝ ndǝ ada bara. 11Akuya ɗakur Hyal nam ada si aka mbatǝdzi kǝ tsantǝdzi ala sanga ndzi. 12Dzǝ ada hyipɛ ala muri tǝ muri awa nkǝrɛ “A’a” ala ndzai kura ndzaiyir Hyalkur ba ndzaiyir mau sǝ kulɗa nǝr dunya ǝni, ba ka mur ndzai ndzǝ nam ada ɓǝlati kǝr dar, ada ndzai nam kal-kal ba ndzaiyir Hyalkur akwa zaman kulini ni. 13Akwa sakatǝ muri ada sǝkǝ tǝmatsǝni nam aka barka ni—siyir Hyalǝr muri nam ngga ba Ndǝr Mbati, Yɛsu Kǝrsti, 14 andǝ nam tara hamnta kǝrni akuya ka muri, ka pǝli tǝ muri akwa sanga kulɗakur ba ka dzǝ kǝtsǝnta ala kǝrni ndzǝ nam tǝ dar nǝni, ndzǝ nam aka miyir ‘ya sǝ nam ɗaku. 15Sǝ yarni, dzá, ani sǝ yarɛ nam tǝ gǝ ata hyipɛ ala ndzi. Ka gǝ ‘ya dǝnautsǝni ba ɗǝmnya aka sanga wada. Ta gǝ ta ngyar ka ndǝ laka rutsǝni tǝngɛ.
Copyright information for
CklSC