Luke 20:27-40
Hyati akwa Ntǝnti ba Kǝldzi
(Mat 22:23-33; Mar 12:18-27)
27 aNdzǝr Saduki yar laka dzǝ nam ada nkǝrɛ apǝri hyati akwa ntǝnti adi wɛ dar si adzǝ Yɛsu aka sǝr yuwɛ. 28 bDar ka nkǝrɛ, “Malǝm, Musa rǝbwai ala yar akwa mabari apǝri, ma ndǝ tǝ zǝrangǝri nti, tǝ dzǝ ngyar mwalarni kura aka zǝr, kǝ ntsakǝr dzi ka zǝrangǝri kǝtǝ kuɗǝghum ni ka dzǝ yaba madausai ala zǝrangǝri! 29Yau, madar mama murfwɛ adai. Yar kǝmari ka kǝtǝ mwala, dzǝ ka nti kura dzǝ ta ɓui zǝr. 30Nǝr sǝɗǝkur 31ba nǝr makǝrkur kǝl tǝni, ani apani sanga dar murfwɛ ni ka kurntadzi kura madar. 32Aghǝla ǝni mwala ǝnari yɛ ka nti. 33Kulini dzá, vǝr hyati akwa ntǝnti dzǝ ata ndzai mwalar wa akwa ntsa dar, Kadǝbar sanga dar murfwɛ ni dar kǝl tǝni?” 34Yɛsu sǝnau, “Ndzǝr zaman ǝni dar ada kǝl mwala ba pwarnta nkwa ala sal. 35Ama ndzǝ nam ata mǝzi tǝ Hyal ata hyanti tǝ dar akwa ntǝnti ka ndzai akwa zaman ǝnda, dar adi ata kǝl mwala wala pwarnta nkwa ala sal wɛ. 36Ba dar tsu adi ata ntǝ kǝra wɛ; akuya dar apa ndzǝr hyantǝr Hyal. Dar madar Hyal akuya ka dar madar hyati akwa ntǝnti ni. 37 cAma akwa ndǝrɛ ata kǝra sakatǝ zǝr fwɛ ada mba akwa ntaku ni wala Musa ma tsanti apǝri ndzǝ ntǝnti dar hyati, akuya tǝ dzǝ ka Thlaku ni ‘Hyalǝr Ibrahim ni, ba Hyalǝr Isaku ni, ba Hyalǝr Yakubu ni.’ 38Dzǝ adi Hyalǝr ndzǝ ntǝnti wɛ, ama Hyalǝr ndzǝ nam aka mpikɛ, akuya alari sang ndzǝ yarni aka mpikɛ.” 39Laka malǝmǝr mabari yarɛ ka sǝnau, “Malǝm, gǝ gha kal-kal!” 40Ndɛ adi nam tara mǝzi ka ɓakta yu tǝni sǝr yuwɛ yarɛ kǝra wɛ.
Copyright information for
CklSC