Matthew 17:1-13
Palidzǝr Yɛsu ni
(Mar 9:2-13; Luk 9:28-36)
1Aghǝla vǝr nkwa Yɛsu ka fati Bitrusu, Yakubu ba Yawhana zǝr angǝra Yakubu, dzǝ ka mwari aka dar ati ata paya nam dzǝgam dar ɗiɗi. 2Dzǝ ka palidzi akwanda akǝma dar. Kǝmari ada mbǝli apa tsǝtsi, ba kariyirni kǝ ndzai mwapu apa paraku. 3Antǝ ndza Musa aka Iliya ka tsantǝdzi akǝma dar, ada ndǝrɛ kaka Yɛsu. 4Bitrusu ka nkǝrɛ ala Yɛsu, “Thlaku, ata ‘ya ɗaku ala yar ka yar ndzai akwani. Ma gǝ yiɗɛ, Yi ata tǝri dǝri makǝr—pathlu ala gǝ, pathlu ala Musa ba pathlu ala Iliya.” 5 a bSakatǝ dzǝ tsu ata kǝra ndǝrɛ, dlamba nam ada mbǝli ka mbui tǝ dar, ba kuɗahu akwa dlamba ni nkǝrɛ, “Əni ani Zǝrna nam tǝ Yi yiɗɛ; Yi ada nga sǝɗa aka dza. Siyamɛ thlǝmɛ alari!” 6Sakatǝ ndzǝr nuwurni tara ngati ǝni, hyivǝr ka ngǝti tǝ dar dzǝr dzǝri dar ka dla tǝ kǝma ata dai. 7Ama Yɛsu si ka tsǝkwar tǝ dar ka nkǝrɛ, “Hyatamɛ, ta gǝri ta hyivǝr.” 8Sakatǝ dar haɓǝti ntsa dar, dar ta wula waima wɛ, tar Yɛsu. 9Sakatǝ dar ata kǝra sǝgǝl ata paya ni, Yɛsu ka tsau ala dar apǝri, “Ta gǝri ta gha ala kǝlara ndɛ sǝ nam tǝ gǝri tara wula, tar Zǝr Ndɛ ni kǝ hyati akwa ntǝnti.” 10 cNdzǝr nu yarni ka yu tǝni, “Kami dzá tǝ malǝmǝr mabari yarni nkǝrɛ apǝri ntsakǝr ka Iliya si tangkǝma?” 11Yɛsu ka sǝnau, “Kǝ ndzai dzǝri, Iliya si ba ata dzǝkuti sanga su. 12 dAma Yi ada gha ala gǝri, Iliya kǝ kurtaka si, ama dar ta zǝndi tǝni wɛ, ama dar ‘ya alari kǝlara sǝ nam tǝ dar tara yiɗɛ. Tsu akwa whal ǝni Zǝr Ndɛ ata siya ɗar bwanai akwa tsiya dar.” 13Antǝ ndzǝr nu yarni kǝ ngaba apǝri dzǝ ada ndǝrɛ ala dar ata kǝra Yawhana Ndǝr ‘Ya Bamtizǝma.
Copyright information for
CklSC