Matthew 26:57-68
Akǝma Ndzǝr Hakar Ndzǝr Yahudi ni
(Mar 14:53-65; Luk 22:54-55; Yaw 18:13-14)
57Ndzǝ nam tara ngǝti Yɛsu ni ka kǝtǝ tǝni ka mwari aka dza ala Kayafas, kuhyir fǝrist ni, akwa vui nam tǝ malǝmǝr mabari yarni ba ndzǝ ngga-ngga yarɛ ni tara tsaɓtsǝnidzi. 58Ama Bitrusu ada nu tǝni pǝɗǝm aghǝla dar, har ka la babalǝr kuta kǝiyir kuhyir fǝrist ni. Dzǝ ka livi ka ndzai kaka ndzǝr ɓǝla yarni ka dzǝ wula sǝ nam ata ‘ya. 59Nggar fǝrist yarni ba sanga Ndzǝr Hakar Yahudi ada bara sǝr hawi ata kǝra Yɛsu ani ka dar tsi tǝni. 60Ama dar ta ɓui wala duku wɛ, wala tǝ ndzǝr sakǝidar hawi hang kǝ sǝkǝma. Ata dǝnta ndzǝ sǝɗɛ ka sǝkǝma 61 aba dar ka nkǝrɛ, “Ndǝ ǝni nkǝrɛ, ‘Yi ata mǝzi ka whuzanta fǝr Hyal ni ba ka Yi ɓakta tsati tǝni akwa vǝr makǝr.’” 62Antǝ kuhyir fǝrist ni ka hyati ka nkǝrɛ ala Yɛsu “Gɛ adi ata sǝnau wɛ? Mi ani sakǝida nam tǝ ndzǝ yarni si akǝri ata kǝra gǝ ni?” 63Ama Yɛsu ndzi kǝɗǝk. Kuhyir fǝrist ni ka nkǝrɛ alari, “Yi ada paktsǝni tǝngɛ aka Hyal nam aka mpikɛ: Gha ala yar ma gǝ dza Kǝrsti ▼▼Wala Masiha: tsuwɛ akwa vǝrsu 68.
ni, Zǝr Hyal ni.” 64 cYɛsu ka kalaktsǝni, “A, ani apa tǝ gǝ gha. Ama Yi ada gha ala sanga gǝri: Akwa saka nam alǝkǝma gǝri ata wula Zǝr Ndɛ ada ndzai ata bwa tsisǝma Hyal nam Ɓwaltasang ba dzǝ ata si ata dlamba yarɛ atahyal.” 65 dAntǝ kuhyir fǝrist ni ka thlǝkwanta lǝkutǝrni ka nkǝrɛ, “Dzǝ kǝ nkǝrba sǝ nam kulɗa ata kǝra Hyal! Kami tǝ muri ada bara sakǝida yarɛ kǝra? wulɛ, kulini gǝri kǝ ngati gha su kulɗa ata kǝra Hyal ni. 66Mǝ tǝ gǝri nkǝrɛ?” Dar ka nkǝrɛ, “Kǝ mǝzi ka ndǝ tsi tǝni.” 67 eAntǝ dar ka kikifu nkyǝli akwa kǝmari ba dar ka tsa tǝni aka tsiya dar. Ndzǝ laka yarɛ lar mandaɓa 68ka nkǝrɛ, “Ya ala yar nabikur, Kǝrsti. Wa tsa tǝngɛ ni?”
Copyright information for
CklSC