2 Samuel 15
1ⲙⲛⲛⲥⲁ ⲛⲁⲓ ⲁⲁⲃⲏⲥⲁⲗⲱⲙ ⲧⲁⲙⲓⲟ ⲛⲁϥ ⲛϩⲉⲛϩⲁⲣⲙⲁ ⲙⲛ ϩⲉⲛϩⲓⲡⲡⲉⲩⲥ ⲁⲩⲱ ⲁϥⲧⲁϩⲟ ⲉⲣⲁⲧϥ ⲛⲧⲁⲓⲟⲩ ⲛⲣⲱⲙⲉ ⲉⲧⲣⲉⲩⲡⲱⲧ ϩⲓⲑⲏ ⲙⲙⲟϥ 2ⲁⲃⲉⲥⲥⲁⲗⲱⲙ ⲇⲉ ⲁϥϣⲟⲣⲡϥ ⲉϩⲧⲟⲟⲩⲉ ⲁϥⲁϩⲉⲣⲁⲧϥ ⲉϫⲛ ⲧⲉϩⲓⲏ ⲙⲙⲟⲟϣⲉ ⲛⲧⲡⲩⲗⲏ ⲁⲩⲱ ⲣⲱⲙⲉ ⲛⲓⲙ ⲉⲧⲉⲟⲩⲛⲧⲟⲩ ⲥⲓϭⲉ ⲙⲙⲁⲩ ⲉⲧⲣⲉⲩⲉⲓ ⲉⲣⲁⲧϥ ⲙⲡⲣⲣⲟ ⲉϫⲓϩⲁⲡ ϩⲓⲱⲱϥ ϣⲁⲣⲉⲁⲃⲉⲥⲥⲁⲗⲱⲙ ⲁϩⲉⲣⲁⲧϥ ⲛⲟⲩⲉ ⲡⲟⲩⲁ ⲡⲟⲩⲁ ⲛϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲕⲏⲡ ⲛⲧⲟⲕ ⲉⲁϣ ⲙⲡⲟⲗⲓⲥ ⲡⲉϫⲉⲡⲣⲱⲙⲉ ⲛⲁϥ ϫⲉ ⲁⲛⲅ ⲡⲉⲕϩⲙϩⲁⲗ ⲁⲛⲅ ⲟⲩⲉ ⲉⲃⲟⲗ ϩⲛ ⲛⲉⲫⲩⲗⲏ ⲛⲧⲉ ⲛⲉⲫⲩⲗⲟⲟⲩⲉ ⲙⲡⲓ︤ⲏ︦ⲗ︥ 3ⲡⲉϫⲉⲁⲃⲉⲥⲥⲁⲗⲱⲙ ⲛⲁϥ ϫⲉ ⲉⲓⲥ ⲛⲉⲕϣⲁϫⲉ ⲉⲧⲉⲕϫⲱ ⲙⲙⲟⲟⲩ ⲛⲁⲛⲟⲩⲟⲩ ⲁⲩⲱ ⲥⲉⲥⲟⲩⲧⲱⲛ ⲙⲛ ⲡⲉⲧⲛⲁⲥⲱⲧⲙ ⲇⲉ ⲉⲣⲟⲕ ⲛⲧⲟⲟⲧϥ ⲙⲡⲣⲣⲟ 4ⲁⲩⲱ ⲁⲃⲉⲥⲥⲁⲗⲱⲙ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ϫⲉ ⲛⲓⲙ ⲡⲉⲧⲛⲁⲧⲁϩⲟⲓ ⲉⲣⲁⲧ ⲛⲕⲣⲓⲧⲏⲥ ϩⲓϫⲙ ⲡⲕⲁϩ ⲛⲥⲉⲉⲓ ⲉⲣⲁⲧ ⲛϭⲓ ⲣⲱⲙⲉ ⲛⲓⲙ ⲉⲟⲩⲛⲧϥ ⲥⲓϭⲉ ⲙⲙⲁⲩ ⲁⲩⲱ ⲉⲟⲩⲛⲧϥ ϩⲁⲡ ⲙⲙⲁⲩ ⲛⲧⲁⲧⲙⲁⲓⲟϥ 5ⲁⲥϣⲱⲡⲉ ⲇⲉ ⲉⲣⲉⲡⲣⲱⲙⲉ ⲛⲁϩⲱⲛ ⲉϩⲟⲩⲛ ⲉⲣⲟϥ ⲉⲟⲩⲱϣⲧ ⲛⲁϥ ϣⲁϥⲥⲟⲩⲧⲛ ⲧⲟⲟⲧϥ ⲉⲃⲟⲗ ⲛϥⲁⲙⲁϩⲧⲉ ⲙⲙⲟϥ ⲛϥϯⲡⲓ ⲉⲣⲱϥ 6ⲁⲩⲱ ⲁⲃⲉⲥⲥⲁⲗⲱⲙ ⲁϥⲉⲓⲣⲉ ⲕⲁⲧⲁ ⲡⲉⲓϣⲁϫⲉ ⲙⲡⲓ︤ⲏ︦ⲗ︥ ⲧⲏⲣϥ ⲛⲛⲉϣⲁⲩⲉⲓ ⲉⲣⲁⲧϥ ⲙⲡⲣⲣⲟ ⲉϫⲓϩⲁⲡ ⲁⲩⲱ ⲁⲃⲏⲥⲁⲗⲱⲙ ⲛⲉϥϥⲓ ⲙⲡϩⲏⲧ ⲛⲛⲣⲱⲙⲉ ⲙⲡⲓ︤ⲏ︦ⲗ︥ ϩⲙ ⲡⲉⲓⲥⲙⲟⲧ 7ⲁⲥϣⲱⲡⲉ ⲇⲉ ⲙⲛⲛⲥⲁ ⲡϫⲱⲕ ⲉⲃⲟⲗ ⲛϩⲙⲉ ⲛⲣⲟⲙⲡⲉ ⲡⲉϫⲉⲁⲃⲉⲥⲥⲁⲗⲱⲙ ⲙⲡⲉϥⲉⲓⲱⲧ ϫⲉ ϯⲛⲁⲃⲱⲕ ⲛⲧⲁϯ ⲛⲛⲁⲉⲣⲏⲧ ⲛⲁⲓ ⲛⲧⲁⲓⲉⲣⲏⲧ ⲙⲙⲟⲟⲩ ⲙⲡϭⲥ ϩⲛ ⲭⲉⲃⲣⲱⲛ 8ϫⲉ ⲡⲉⲕϩⲙϩⲁⲗ ⲉⲧⲉⲁⲛⲟⲕ ⲡⲉ ⲁⲓⲉⲣⲏⲧ ⲛⲟⲩⲉⲣⲏⲧ ϩⲙ ⲡⲧⲣⲁⲟⲩⲱϩ ϩⲛ ⲅⲉⲇⲥⲟⲩⲣ ⲛⲧⲉ ⲧⲥⲩⲣⲓⲁ ⲉⲓϫⲱ ⲙⲙⲟⲥ ϫⲉ ϩⲛ ⲟⲩⲕⲧⲟ ⲉϥϣⲁⲛⲕⲧⲟⲓ ⲛϭⲓ ⲡϫⲟⲉⲓⲥ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲛⲧⲁⲟⲩⲱϣⲧ ⲙⲡϫⲟⲉⲓⲥ 9ⲡⲉϫⲉⲡⲣⲣⲟ ⲛⲁϥ ϫⲉ ⲃⲱⲕ ϩⲛ ⲟⲩⲉⲓⲣⲏⲛⲏ ⲁϥⲧⲱⲟⲩⲛ ⲇⲉ ⲁϥⲃⲱⲕ ⲉϩⲣⲁⲓ ⲉⲭⲉⲃⲣⲱⲛ 10ⲁⲩⲱ ⲁⲁⲃⲉⲥⲥⲁⲗⲱⲙ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲛⲉⲫⲩⲗⲏ ⲧⲏⲣⲟⲩ ⲙⲡⲓ︤ⲏ︦ⲗ︥ ⲉϥϫⲱ ⲙⲙⲟⲥ ϫⲉ ϩⲙ ⲡⲧⲣⲉⲧⲉⲧⲛⲥⲱⲧⲙ ⲉⲡⲉϩⲣⲟⲟⲩ ⲛⲧⲥⲁⲗⲡⲓⲅⲝ ⲛⲁϣⲧⲁⲡ ⲉⲧⲉⲧⲛⲛⲉⲱϣ ⲉⲃⲟⲗ ⲉⲧⲉⲧⲛϫⲱ ⲙⲙⲟⲥ ϫⲉ ⲁⲁⲃⲉⲥⲥⲁⲗⲱⲙ ⲁϥⲣⲣⲣⲟ ϩⲛ ⲭⲉⲃⲣⲱⲛ 11ⲁⲩⲱ ⲁⲩⲟⲩⲁϩⲟⲩ ⲛⲥⲁ ⲁⲃⲉⲥⲥⲁⲗⲱⲙ ⲛϭⲓ ⲁϣⲏⲧ ⲛⲣⲱⲙⲉ ⲉⲃⲟⲗ ϩⲛ ⲑⲓ︤ⲗ︦ⲏ︦ⲙ︥ ⲛⲧⲁϥⲧⲁϩⲙⲟⲩ ⲉⲃⲟⲗ ϩⲛ ⲧⲉⲩⲙⲛⲧϩⲁⲡⲗⲟⲩⲥ ⲉⲩⲙⲟⲟϣⲉ ⲉⲙⲡⲟⲩⲉⲓⲙⲉ ⲉⲗⲁⲁⲩ ⲛϣⲁϫⲉ 12ⲁⲩⲱ ⲁⲃⲉⲥⲥⲁⲗⲱⲙ ⲁϥϫⲟⲟⲩ ⲛⲁⲭⲓⲧⲟⲫⲉⲗ ⲡⲅⲉⲗⲙⲱⲛⲁⲓⲟⲥ ⲡⲥⲩⲙⲃⲟⲗⲟⲥ ⲛⲇⲁⲩⲉⲓⲇ ⲉϩⲣⲁⲓ ⲉⲧⲉϥⲡⲟⲗⲓⲥ ⲉⲕⲱⲗⲁ ϩⲙ ⲡⲧⲣⲉϥⲑⲩⲥⲓⲁⲍⲉ ⲛⲛⲉϥⲛⲟⲩⲧⲉ ⲁⲩⲱ ⲁⲩⲛⲟϭ ⲛⲥⲟⲟⲩϩⲥ ϣⲱⲡⲉ ⲁⲩⲱ ⲡⲙⲏⲏϣⲉ ⲉⲧⲙⲟⲟϣⲉ ⲙⲛ ⲁⲃⲉⲥⲥⲁⲗⲱⲙ ⲛⲉⲛⲁϣⲱϥ 13ⲟⲩⲃⲁⲓϣⲓⲛⲉ ⲇⲉ ⲁϥⲓ ⲉⲣⲁⲧϥ ⲛⲇ︤ⲁ︦ⲇ︥ ⲉϥϫⲱ ⲙⲙⲟⲥ ⲛⲁϥ ϫⲉ ⲁⲡϩⲏⲧ ⲛⲛⲣⲱⲙⲉ ⲙⲡⲓ︤ⲏ︦ⲗ︥ ⲣⲓⲕⲉ ⲛⲥⲁ ⲁⲃⲉⲥⲥⲁⲗⲱⲙ 14ⲁⲩⲱ ⲡⲉϫⲉⲇ︤ⲁ︦ⲇ︥ ⲛⲛⲉϥϩⲙϩⲁⲗ ⲧⲏⲣⲟⲩ ⲉⲧϩⲛⲑⲓ︤ⲗ︦ⲏ︦ⲙ︥ ⲉⲧⲛⲙⲙⲁϥ ⲉϥϫⲱ ⲙⲙⲟⲥ ⲛⲁⲩ ϫⲉ ⲧⲟⲩⲛⲧⲏⲩⲧⲛ ⲛⲧⲉⲛⲡⲱⲧ ϫⲉ ⲙⲛⲟⲩϫⲁⲓ ϣⲟⲟⲡ ⲛⲁⲛ ϩⲁ ⲡϩⲟ ⲛⲁⲃⲉⲥⲥⲁⲗⲱⲙ ⲙⲁⲣⲉⲛⲧⲁⲭⲏ ϫⲉ ⲛⲛⲉϥⲡⲱⲧ ⲛϥⲧⲁϩⲟⲛ ⲁⲩⲱ ⲛϥⲉⲓⲛⲉ ⲉϩⲣⲁⲓ ⲉϫⲱⲛ ⲛⲧⲕⲁⲕⲓⲁ ⲛϥⲡⲁⲧⲁⲥⲥⲉ ⲛⲧⲡⲟⲗⲓⲥ ϩⲛ ⲧⲧⲁⲡⲣⲟ ⲛⲧⲥⲏϥⲉ 15ⲛϩⲙϩⲁⲗ ⲇⲉ ⲙⲡⲣⲣⲟ ⲡⲉϫⲁⲩ ⲙⲡⲣⲣⲟ ⲇ︤ⲁ︦ⲇ︥ ϫⲉ ϩⲱⲃ ⲛⲓⲙ ⲉⲧⲉϥⲛⲁⲧⲟϣⲛ ⲉⲣⲟⲟⲩ ⲛϭⲓ ⲡⲉⲛϫⲟⲉⲓⲥ ⲡⲣⲣⲟ ⲉⲓⲥ ϩⲏⲏⲧⲉ ⲁⲛⲟⲛ ⲛⲉⲕϩⲙϩⲁⲗ ⲧⲉⲛⲛⲙⲙⲁⲕ 16ⲁⲩⲱ ⲡⲣⲣⲟ ⲁϥⲧⲱⲟⲩⲛ ⲁϥⲓ ⲉⲃⲟⲗ ⲙⲛ ⲡⲉϥⲏⲓ ⲧⲏⲣϥ ⲉⲩⲙⲟⲟϣⲉ ⲛⲣⲁⲧⲟⲩ ⲡⲣⲣⲟ ⲇⲉ ⲁϥⲕⲱ ⲉⲡⲁϩⲟⲩ ⲙⲙⲏⲧⲉ ⲛⲥϩⲓⲙⲉ ⲙⲡⲁⲗⲗⲁⲕⲏ ⲛⲧⲁϥⲧⲣⲉⲩⲣⲟⲉⲓⲥ ⲉⲡⲉϥⲏⲓ 17ⲁⲩⲱ ⲡⲣⲣⲟ ⲁϥⲓ ⲉⲃⲟⲗ ⲙⲛ ⲛⲉϥϩⲙϩⲁⲗ ⲧⲏⲣⲟⲩ ⲉⲩⲙⲟⲟϣⲉ ⲛⲣⲁⲧⲟⲩ ⲁⲩⲱ ⲁⲩⲁϩⲉⲣⲁⲧⲟⲩ ϩⲙ ⲡⲏⲓ ⲉⲧⲟⲩⲏⲩ 18ⲁⲩⲱ ⲛⲉϥϩⲙϩⲁⲗ ⲧⲏⲣⲟⲩ ⲛⲉⲩⲙⲟⲟϣⲉ ϩⲓⲧⲟⲩⲱϥ ⲁⲩⲱ ⲡⲉⲭⲉⲧⲧⲓ ⲧⲏⲣϥ ⲙⲛ ⲡⲉⲫⲉⲗⲉⲧⲑⲓ ⲧⲏⲣϥ ⲁⲩⲱ ⲁⲩⲉⲓ ⲉϩⲣⲁⲓ ⲉϫⲛ ⲧⲃⲱ ⲛϫⲟⲉⲓⲧ ⲉⲧϩⲙⲡϫⲁⲓⲉ ⲡⲗⲁⲟⲥ ⲇⲉ ⲧⲏⲣϥ ⲛⲉϥⲡⲁⲣⲁⲅⲉ ⲙⲙⲟϥ ⲁⲩⲱ ⲛⲉⲧϩⲙⲡⲉϥⲕⲱⲧⲉ ⲧⲏⲣⲟⲩ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ ⲛⲉⲩⲁϩⲉⲣⲁⲧⲟⲩ ϩⲓⲧⲟⲩⲱϥ ⲁⲩⲱ ⲡⲉⲭⲉⲣⲉⲑⲑⲓ ⲧⲏⲣϥ ⲙⲛ ⲡⲉⲫⲉⲗⲉⲑⲑⲓ ⲧⲏⲣϥ ⲁⲩⲱ ⲛⲅⲉⲑⲑⲁⲓⲟⲥ ⲧⲏⲣⲟⲩ ⲉⲩⲛⲁⲣⲥⲟⲟⲩ ⲛϣⲉ ⲛⲣⲱⲙⲉ ⲛⲉⲛⲧⲁⲩⲉⲓ ⲉⲣⲁⲧϥ ⲛⲅⲉⲑ ⲉⲩⲙⲟⲟϣⲉ ⲁⲩⲡⲁⲣⲁⲅⲉ ϩⲱⲟⲩ ϩⲓⲑⲏ ⲙⲡⲣⲣⲟ 19ⲡⲣⲣⲟ ⲇⲉ ⲡⲉϫⲁϥ ⲛⲛⲉⲧϩⲓⲡⲅⲉⲑⲑⲁⲓⲟⲥ ⲙⲛ ⲛⲉϥⲣⲱⲙⲉ ϫⲉ ⲉⲧⲃⲉ ⲟⲩ ⲛⲧⲟⲕ ϩⲱⲱⲕ ⲉⲕⲛⲁⲉⲓ ⲛⲙⲙⲁⲛ ⲕⲟⲧⲕ ⲛⲅⲟⲩⲱϩ ⲏ ⲛⲅⲱⲡ ⲉⲡⲣⲣⲟ ϫⲉ ⲛⲧⲕ ⲟⲩϣⲙⲙⲟ ⲛⲧⲟⲕ ⲁⲩⲱ ϫⲉ ⲛⲧⲟⲕ ⲛⲧⲁⲕⲡⲉⲉⲛⲉ ⲣⲁⲧⲕ ⲉⲃⲟⲗ ϩⲛ ⲅⲉⲑ 20ⲁⲩⲱ ⲉϣϫⲉ ⲛⲧⲁⲕⲉⲓ ⲛⲥⲁϥ ⲙⲡⲟⲟⲩ ϭⲉ ⲉⲓⲛⲁⲡⲟⲟⲛⲉⲕ ⲉⲃⲟⲗ 21 30 ⲛⲧⲟϥ ⲛⲉϥⲙⲟⲟϣⲉ ⲉⲣⲉⲣⲁⲧϥ ϩⲓ ⲡⲉⲥⲏⲧ ⲁⲩⲱ ⲡⲗⲁⲟⲥ ⲧⲏⲣϥ ⲉⲧⲛⲙⲙⲁϥ ⲁⲡⲟⲩⲁ ⲡⲟⲩⲁ ϩⲱⲃⲥ ⲛⲧⲉϥⲁⲡⲉ ⲁⲩⲱ ⲛⲉⲩⲙⲟⲟϣⲉ ⲉⲩⲣⲓⲙⲉ 31ⲁⲩⲧⲁⲙⲉⲇ︤ⲁ︦ⲇ︥ ⲉⲩϫⲱ ⲙⲙⲟⲥ ϫⲉ ⲁⲭⲓⲧⲟⲫⲉⲗ ϣⲟⲟⲡ ⲙⲛ ⲛⲉⲧⲟ ⲛϣⲟϫⲛⲉ ⲙⲛ ⲁⲃⲉⲥⲥⲁⲗⲱⲙ ⲡⲉϫⲉⲇⲁⲩⲉⲓⲇ ϫⲉ ϫⲱⲱⲣⲉ ⲉⲃⲟⲗ ⲙⲡϣⲟϫⲛⲉ ⲛⲁⲭⲓⲇⲟⲫⲉⲗ ⲡϫⲟⲉⲓⲥ ⲡⲁⲛⲟⲩⲧⲉ 32ⲇⲁⲩⲉⲓⲇ ⲇⲉ ⲛⲉϥⲙⲟⲟϣⲉ ϣⲁ ⲉϩⲣⲁⲓ ⲉⲡⲧⲟⲟⲩ ⲙⲡⲛⲟⲩⲧⲉ ⲡⲙⲁ ⲛⲧⲁϥⲟⲩⲱϣⲧ ⲛϩⲏⲧϥ ⲙⲡⲛⲟⲩⲧⲉ ⲁⲩⲱ ⲉⲓⲥ ϩⲏⲏⲧⲉ ⲁϥⲉⲓ ⲉⲣⲁⲧϥ ⲛϭⲓ ⲭⲟⲩⲥⲉⲓ ⲡⲉϣⲃⲏⲣ ⲟⲛ ⲛⲇ︤ⲁ︦ⲇ︥ ⲉⲣⲉⲧⲉϥϣⲧⲏⲛ ⲡⲏϩ ϩⲓⲱⲱϥ ⲁⲩⲱ ⲉⲣⲉⲧⲉϥⲁⲡⲉ ⲙⲉϩ ⲛⲉⲓⲧⲛ 33ⲡⲉϫⲉⲇ︤ⲁ︦ⲇ︥ ϫⲉ ⲉⲕϣⲁⲛⲉⲓ ⲛⲙⲙⲁⲓ ⲕⲛⲁϣⲱⲡⲉ ϩⲓϫⲱⲓ ⲉⲓϥⲓ ϩⲁⲣⲁⲕ 34ⲉⲕϣⲁⲛⲕⲧⲟⲕ ⲇⲉ ⲉϩⲣⲁⲓ ⲉⲧⲡⲟⲗⲓⲥ ⲉⲕⲉϫⲟⲟⲥ ⲛⲁⲃⲉⲥⲥⲁⲗⲱⲙ ϫⲉ ⲛⲉⲕⲥⲛⲏⲩ ⲁⲩⲡⲁⲣⲁⲅⲉ ⲁⲩⲱ ⲡⲉⲕⲉⲓⲱⲧ ⲡⲣⲣⲟ ⲁϥⲡⲁⲣⲁⲅⲉ ⲙⲙⲟⲓ ⲧⲉⲛⲟⲩ ϭⲉ ⲁⲛⲅ ⲡⲉⲕϩⲙϩⲁⲗ ⲁⲛⲟⲕ ⲡⲣⲣⲟ ⲕⲁⲁⲧ ⲛⲧⲁⲱⲛϩ ⲛⲉⲓⲟ ⲛϩⲙϩⲁⲗ ⲙⲡⲉⲕⲉⲓⲱⲧ ⲛϣⲟⲣⲡ ⲧⲉⲛⲟⲩ ϭⲉ ϩⲱⲱϥ ⲁⲛⲅ ⲡⲉⲕϩⲙϩⲁⲗ ⲁⲛⲟⲕ ⲛⲅϫⲱⲱⲣⲉ ⲉⲃⲟⲗ ⲛⲁⲓ ⲙⲡϣⲟϫⲛⲉ ⲛⲁⲭⲓⲧⲟⲫⲉⲗ 35ⲁⲩⲱ ⲉⲓⲥ ϩⲏⲏⲧⲉ ϥⲙⲙⲁⲩ ⲛⲙⲙⲁⲕ ⲛϭⲓ ⲥⲁⲇⲱⲕ ⲙⲛ ⲁⲃⲓⲁⲑⲁⲣ ⲛⲉⲟⲩⲏⲏⲃ ⲁⲩⲱ ϣⲁϫⲉ ⲛⲓⲙ ⲉⲧⲉⲕⲛⲁⲥⲟⲧⲙⲟⲩ ⲉⲃⲟⲗ ϩⲙ ⲡⲏⲓ ⲙⲡⲣⲣⲟ ⲉⲕⲉϫⲟⲟⲩ ⲉⲥⲁⲇⲱⲕ ⲙⲛ ⲁⲃⲓⲁⲑⲁⲣ ⲛⲉⲟⲩⲏⲏⲃ 36ⲉⲓⲥ ϩⲏⲏⲧⲉ ⲟⲛ ⲥⲉⲛⲙⲙⲁⲕ ⲛϭⲓ ⲡⲉⲩϣⲏⲣⲉ ⲥⲛⲁⲩ ⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲙⲛ ⲓⲱⲛⲁⲑⲁⲛ ⲡϣⲏⲣⲉ ⲛⲁⲃⲓⲁⲑⲁⲣ ⲛⲧⲉⲧⲛϫⲁⲟⲩ ⲛⲁⲓ ⲉⲃⲟⲗ ϩⲓⲧⲟⲟⲧⲟⲩ ⲛϣⲁϫⲉ ⲛⲓⲙ ⲉⲧⲉⲧⲛⲛⲁⲥⲟⲧⲙⲟⲩ 37ⲁⲩⲱ ⲭⲟⲩⲥⲉⲓ ⲡⲉϣⲃⲏⲣ ⲛⲇ︤ⲁ︦ⲇ︥ ⲁϥⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲁⲃⲉⲥⲥⲁⲗⲱⲙ ϩⲱⲱϥ ⲉϥⲛⲁⲧⲁⲁϥ ⲉϩⲟⲩⲛ ⲉⲑⲓ︤ⲗ︦ⲏ︦ⲙ︥
Copyright information for
CopSahBible2