2 Samuel 20
1ⲛⲉϥⲙⲙⲁⲩ ⲇⲉ ⲛϭⲓ ⲟⲩⲣⲱⲙⲉ ⲉⲩⲙⲟⲩⲧⲉ ⲉⲣⲟϥ ϫⲉ ⲡϣⲏⲣⲉ ⲙⲡⲁⲣⲁⲛⲟⲙⲟⲥ ⲉⲡⲉϥⲣⲁⲛ ⲡⲉ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲟⲩⲣⲱⲙⲉ ⲛⲓⲉⲙⲉⲛⲓ ⲁⲩⲱ ⲁϥⲥⲁⲗⲡⲓⲍⲉ ϩⲛ ⲧⲥⲁⲗⲡⲓⲅⲝ ⲛⲧⲁⲡ ⲉϥϫⲱ ⲙⲙⲟⲥ ϫⲉ ⲙⲛ ⲙⲉⲣⲓⲥ ϣⲟⲟⲡ ⲛⲁⲛ ϩⲛ ⲇ︤ⲁ︦ⲇ︥ ⲟⲩⲇⲉ ⲙⲛ ⲕⲗⲏⲣⲟⲥ ϣⲟⲟⲡ ⲛⲁⲛ ϩⲛ ⲡϣⲏⲣⲉ ⲛⲓⲉⲥⲥⲁⲓ ⲡⲣⲱⲙⲉ ⲙⲡⲓ︤ⲏ︦ⲗ︥ ⲃⲱⲕ ⲉϩⲣⲁⲓ ⲉⲛⲉⲕⲥⲕⲏⲛⲏ 2ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲕⲧⲟⲟⲩ ⲉⲡⲁϩⲟⲩ ⲉⲃⲟⲗ ϩⲛ ⲇ︤ⲁ︦ⲇ︥ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲛϣⲏⲣⲉ ⲇⲉ ⲛⲓⲟⲩⲇⲁ ⲁⲩⲃⲱⲕ ⲁⲩⲧⲟϭⲟⲩ ⲉⲡⲉⲩⲣⲣⲟ ⲛϫⲓⲛ ⲡⲓⲟⲣⲇⲁⲛⲏⲥ ϣⲁ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ 3ⲁⲩⲱ ⲇ︤ⲁ︦ⲇ︥ ⲁϥⲃⲱⲕ ⲉϩⲟⲩⲛ ⲉⲡⲉϥⲏⲓ ⲉⲧϩⲛⲑⲓ︤ⲗ︦ⲏ︦ⲙ︥ ⲡⲣⲣⲟ ⲇⲉ ⲁϥϫⲓ ⲛⲧⲉϥⲙⲏⲧⲉ ⲛⲥϩⲓⲙⲉ ⲛⲉϥⲡⲁⲗⲗⲁⲕⲏ ⲛⲉⲛⲧⲁϥⲕⲁⲁⲩ ⲉⲡⲁϩⲟⲩ ⲉⲣⲟⲉⲓⲥ ⲉⲡⲉϥⲏⲓ ⲁⲩⲧⲁⲁⲩ ⲉϩⲣⲁⲓ ⲉⲡⲏⲓ ⲛⲧⲉⲫⲩⲗⲁⲕⲏ ⲁϥϭⲱ ⲉϥⲥⲁⲁⲛϣ ⲙⲟⲟⲩ ⲙⲡⲉϥⲃⲱⲕ ⲇⲉ ⲉϩⲟⲩⲛ ϣⲁⲣⲟⲟⲩ ⲛⲉⲩⲟⲧⲡ ⲇⲉ ⲉϩⲟⲩⲛ ⲉⲩⲟ ⲛⲭⲏⲣⲁ ⲉⲩⲟⲛϩ ϣⲁ ⲡⲉϩⲟⲟⲩ ⲙⲡⲉⲩⲙⲟⲩ 4ⲡⲣⲣⲟ ⲇⲉ ⲡⲉϫⲁϥ ⲛⲁⲙⲉⲥⲥⲁⲓ ϫⲉ ⲙⲟⲩⲧⲉ ⲛⲁⲓ ⲉⲛⲉⲣⲱⲙⲉ ⲛⲓⲟⲩⲇⲁ ⲙⲡϩⲟⲩⲛ ⲛϣⲟⲙⲛⲧ ⲛϩⲟⲟⲩ ⲛⲧⲟⲕ ⲇⲉ ⲁϩⲉⲣⲁⲧⲕ ⲙⲡⲉⲓⲙⲁ 5ⲁⲩⲱ ⲁⲙⲉⲥⲥⲁⲓ ⲁϥⲃⲱⲕ ⲉⲙⲟⲩⲧⲉ ⲉⲓⲟⲩⲇⲁ ⲁϥⲱⲥⲕ ⲇⲉ ⲛϫⲓⲛ ⲡⲉⲩⲟⲉⲓϣ ⲛⲧⲁϥⲧⲁⲥⲥⲉ ⲉⲉⲓ ⲛϩⲏⲧϥ 6ⲇ︤ⲁ︦ⲇ︥ ⲇⲉ ⲡⲉϫⲁϥ ⲛⲁⲃⲓⲥⲁ ϫⲉ ⲧⲉⲛⲟⲩ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ϥⲟⲩⲱϣ ⲉⲣⲡⲉⲑⲟⲟⲩ ⲛⲁⲛ ⲉϩⲟⲩⲉ ⲉⲁⲃⲉⲥⲥⲁⲗⲱⲙ ⲧⲉⲛⲟⲩ ϭⲉ ⲛⲧⲟⲕ ϫⲓ ⲛⲛⲉϩⲙϩⲁⲗ ⲙⲡⲉⲕϫⲟⲉⲓⲥ ⲛⲅⲡⲱⲧ ⲛⲥⲱϥ ⲙⲏⲡⲱⲥ ⲛϥϭⲓⲛⲉ ⲛⲁϥ ⲛϩⲉⲛⲡⲟⲗⲓⲥ ⲉⲩⲟⲣϫ ⲛϥⲕⲱ ⲛⲟⲩⲙⲛⲧϩⲁⲗϩⲟ ϩⲓⲣⲛ ⲛⲉⲛⲃⲁⲗ 7ⲁⲩⲱ ⲁϥⲡⲱⲧ ⲛⲥⲱϥ ⲛϭⲓ ⲁⲃⲓⲥⲁ ⲙⲛ ⲛⲉⲣⲱⲙⲉ ⲛⲓⲱⲁⲃ ⲁⲩⲱ ⲡⲉⲭⲉⲣⲉⲑⲑⲓ ⲙⲛ ⲡⲉⲫⲉⲗⲉⲑⲑⲓ ⲁⲩⲱ ⲛⲕⲉⲇⲩⲛⲁⲧⲟⲥ ⲧⲏⲣⲟⲩ ⲁⲩⲉⲓ ⲉⲃⲟⲗ ϩⲛ ⲑⲓ︤ⲗ︦ⲏ︦ⲙ︥ ⲉⲧⲣⲉⲩⲡⲱⲧ ⲛⲥⲁ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ 8ⲛⲧⲟⲟⲩ ⲇⲉ ⲛⲉⲩϩⲁⲧⲙⲡⲛⲟϭ ⲛⲱⲛⲉ ⲉⲧϩⲛⲅⲁⲃⲁⲱⲛ ⲁⲩⲱ ⲁⲙⲉⲥⲥⲁⲓ ⲁϥⲃⲱⲕ ⲉϩⲟⲩⲛ ϩⲓⲑⲏ ⲙⲙⲟⲟⲩ ⲁⲩⲱ ⲓⲱⲁⲃ ⲛⲉϥⲙⲏⲣ ⲛⲧⲉϥϣⲧⲏⲛ ⲛⲣⲉⲃⲧ ⲉⲧϩⲓⲱⲱϥ ⲉⲣⲉⲧⲉϥⲥⲏϥⲉ ⲙⲏⲣ ⲉϩⲟⲩⲛ ⲉⲣⲟⲥ ϩⲓϫⲛ ⲧⲉϥϯⲡⲉ ϩⲓϫⲛ ⲡⲉⲥⲕⲟⲉⲓϩ ⲁⲥⲉⲓ ⲇⲉ ⲉⲃⲟⲗ ⲁⲥϩⲓⲟⲩⲉ 9ⲡⲉϫⲉⲓⲱⲁⲃ ⲇⲉ ⲛⲁⲙⲉⲥⲥⲁⲓ ϫⲉ ⲉⲛⲉⲕⲟⲩⲟϫⲡⲁⲥⲟⲛ ⲁⲩⲱ ⲧϭⲓϫ ⲛⲟⲩⲛⲁⲙ ⲛⲓⲱⲁⲃ ⲁⲥⲁⲙⲁϩⲧⲉ ⲛⲧⲙⲟⲣⲧ ⲛⲁⲙⲉⲥⲥⲁⲓ ⲉϯⲡⲓ ⲉⲣⲱϥ 10ⲁⲩⲱ ⲁⲙⲉⲥⲥⲁⲓ ⲙⲡⲉϥϯⲥⲟ ⲉϩⲟⲣⲃ ⲉⲣⲟϥ ⲉⲕⲧⲉⲧⲥⲏϥⲉ ⲉⲧⲉⲛⲧⲟⲟⲧϥ ⲛⲓⲱⲁⲃ ⲓⲱⲁⲃ ⲇⲉ ⲁϥϫⲟⲧⲥ ⲛϩⲏⲧϥ ⲁⲛⲉⲧⲛϩⲏⲧϥ ⲡⲱⲛ ⲉⲃⲟⲗ ⲉϫⲙ ⲡⲕⲁϩ ⲙⲡⲉϥⲕⲟⲧϥ ⲉⲟⲩⲁϩⲙⲉϥ ⲁϥⲙⲟⲩ ⲁⲩⲱ ⲓⲱⲁⲃ ⲙⲛ ⲁⲃⲓⲥⲁ ⲡⲉϥⲥⲟⲛ ⲁⲩⲡⲱⲧ ⲛⲥⲁ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ 11ⲁⲩⲱ ⲟⲩⲣⲱⲙⲉ ⲁϥⲁϩⲉⲣⲁⲧϥ ϩⲓϫⲱϥ ϩⲛ ⲛⲉϩⲙϩⲁⲗ ⲛⲓⲱⲁⲃ ⲉϥϫⲱ ⲙⲙⲟⲥ ϫⲉ ⲛⲓⲙ ⲡⲉⲧⲟⲩⲱϣ ϩⲛ ⲓⲱⲁⲃ ⲁⲩⲱ ⲛⲓⲙ ϩⲛ ⲛⲁⲇ︤ⲁ︦ⲇ︥ ⲉϥⲟⲩⲏϩ ⲛⲥⲁ ⲓⲱⲁⲃ 12ⲁⲙⲉⲥⲥⲁⲓ ⲇⲉ ⲛⲉϥⲧⲟⲗⲙ ϩⲙ ⲡⲉϥⲥⲛⲟϥ ϩⲛ ⲧⲙⲏⲏⲧⲉ ⲙⲡⲙⲟⲉⲓⲧ ⲙⲙⲟⲟϣⲉ ⲁⲩⲱ ⲡⲣⲱⲙⲉ ⲁϥⲛⲁⲩ ϫⲉ ⲁϥⲁϩⲉⲣⲁⲧϥ ⲛϭⲓ ⲡⲗⲁⲟⲥ ⲧⲏⲣϥ ⲁϥⲡⲉⲉⲛⲉ ⲁⲙⲉⲥⲥⲁⲓ ⲉⲃⲟⲗ ϩⲙ ⲡⲙⲟⲉⲓⲧ ⲛⲧⲥⲱϣⲉ ⲁϥⲛⲟⲩϫⲉ ⲉⲃⲟⲗ ϩⲓϫⲱϥ ⲛⲟⲩϩⲟⲉⲓⲧⲉ ⲕⲁⲧⲁ ⲑⲉ ⲛⲧⲁϥⲛⲁⲩ ⲉⲛⲉⲧⲛⲏⲩ ⲧⲏⲣⲟⲩ ⲉⲁⲩⲡⲱϩ ⲉⲣⲟϥ ⲁⲩⲁϩⲉⲣⲁⲧⲟⲩ 13ⲛⲧⲉⲣⲉϥⲡⲟⲟⲛⲉϥ ⲇⲉ ⲉⲃⲟⲗ ϩⲙ ⲡⲙⲟⲉⲓⲧ ⲛⲣⲱⲙⲉ ⲇⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲁⲩⲡⲁⲣⲁⲅⲉ ⲉⲩⲟⲩⲏϩ ⲛⲥⲁ ⲓⲱⲁⲃ ⲉⲡⲱⲧ ⲛⲥⲁ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ 14ⲁⲩⲱ ⲁϥⲉⲓ ⲉⲃⲟⲗ ϩⲛ ⲛⲉⲫⲩⲗⲏ ⲧⲏⲣⲟⲩ ⲉϩⲣⲁⲓ ⲉⲁⲃⲉⲗ ⲧⲉⲧϩⲛⲃⲁⲓⲑⲙⲁⲭⲁ ⲛⲧⲟⲟⲩ ⲇⲉ ⲧⲏⲣⲟⲩ ⲛⲉⲩϩⲛⲭⲁⲣⲣⲓ ⲁⲩⲥⲱⲟⲩϩ ⲇⲉ ⲉϩⲟⲩⲛ ⲁⲩⲉⲓ ⲉⲩⲡⲏⲧ ⲛⲥⲱϥ 15ⲁⲩⲱ ⲁⲩⲉⲓ ⲁⲩϭⲱ ϩⲓⲣⲱϥ ϩⲛ ⲁⲃⲉⲗ ⲧⲉⲧϩⲙⲃⲁⲓⲑⲙⲁⲭⲁ ⲁⲩⲱ ⲁⲩⲕⲱ ⲛⲟⲩⲧⲏⲛⲉ ϩⲓⲣⲛ ⲧⲡⲟⲗⲓⲥ ⲁⲩⲱ ⲁϥⲁϩⲉⲣⲁⲧϥ ϩⲓϫⲙ ⲡⲥⲟⲃⲧ ⲡⲗⲁⲟⲥ ⲧⲏⲣϥ ⲉⲧⲟⲩⲏϩ ⲛⲥⲁ ⲓⲱⲁⲃ ⲛⲉⲩⲙⲟⲕⲙⲉⲕ ⲉⲧⲁⲩⲉⲡⲥⲟⲃⲧ ⲉⲡⲉⲥⲏⲧ 16ⲁⲩⲱ ⲁⲥⲱϣ ⲉⲃⲟⲗ ⲛϭⲓ ⲟⲩⲥϩⲓⲙⲉ ⲛⲥⲟⲫⲏ ⲉⲃⲟⲗ ϩⲙ ⲡⲥⲟⲃⲧ ⲉⲥϫⲱ ⲙⲙⲟⲥ ϫⲉ ⲥⲱⲧⲙ ⲉⲣⲟⲓ ⲥⲱⲧⲙ ⲉⲣⲟⲓ ⲁϫⲓⲥ ⲉⲓⲱⲁⲃ ϫⲉ ϩⲛⲧⲕ ⲉϩⲟⲩⲛ ⲉⲡⲉⲓⲙⲁ ϫⲉ ⲉⲓⲉϣⲁϫⲉ ⲛⲙⲙⲁⲕ 17ⲁϥϩⲛⲧϥ ⲇⲉ ⲉϩⲟⲩⲛ ⲉⲣⲟⲥ ⲡⲉϫⲁⲥ ⲛⲁϥ ⲛϭⲓ ⲧⲉⲥϩⲓⲙⲉ ϫⲉ ⲉⲛⲉⲛⲧⲟⲕ ⲡⲉ ⲓⲱⲁⲃ ⲡⲉϫⲁϥ ϫⲉ ⲁⲛⲟⲕ ⲡⲉ ⲡⲉϫⲉⲧⲉⲥϩⲓⲙⲉ ⲛⲁϥ ϫⲉ ⲥⲱⲧⲙ ⲉⲛϣⲁϫⲉ ⲛⲧⲉⲕϩⲙϩⲁⲗ ⲡⲉϫⲉⲓⲱⲁⲃ ⲛⲁⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ϯⲥⲱⲧⲙ 18ⲡⲉϫⲁⲥ ϫⲉ ⲟⲩϣⲁϫⲉ ⲡⲉⲛⲧⲁⲩⲧⲁⲩⲟϥ ϩⲛ ⲛⲉϣⲟⲣⲡ ⲉⲩϫⲱ ⲙⲙⲟⲥ ϫⲉ ϩⲛ ⲟⲩϣⲓⲛⲉ ⲁⲩϫⲛⲟⲩϥ ϩⲛ ⲁⲃⲁⲗ ⲁⲩⲱ ϩⲛ ⲇⲁⲛ ⲉⲛⲉⲁⲩⲱϫⲛ ϭⲉ ⲛϭⲓ ⲛⲉⲛⲧⲁⲩⲕⲁⲁⲩ ⲛϭⲓ ⲙⲡⲓⲥⲧⲟⲥ ⲙⲡⲓ︤ⲏ︦ⲗ︥ ϩⲛ ⲟⲩϣⲓⲛⲉ ⲥⲉⲛⲁϣⲓⲛⲉ ϩⲛ ⲁⲃⲉⲗ ⲁⲩⲱ ⲉⲛⲉⲁⲩⲱϫⲛ ϩⲓⲛⲁⲓ 19ⲁⲛⲟⲕ ⲉⲧⲧⲁⲩⲟ ⲛϩⲉⲛⲉⲓⲣⲏⲛⲓⲕⲟⲛ ϩⲛ ⲛⲙⲁ ⲉⲧⲧⲁϫⲣⲏⲩ ϩⲙ ⲡⲓ︤ⲏ︦ⲗ︥ ⲛⲧⲟⲕ ⲕⲕⲱⲧⲉ ⲛⲥⲁ ⲑⲉ ⲙⲙⲟⲩⲟⲩⲧ ⲛⲟⲩⲡⲟⲗⲓⲥ ⲟⲩⲙⲉⲧⲣⲟⲡⲟⲗⲓⲥ ϩⲙ ⲡⲓ︤ⲏ︦ⲗ︥ ⲉⲧⲃⲉ ⲟⲩ ⲉⲕⲛⲁⲧⲁⲕⲟ ⲛⲧⲉⲕⲗⲏⲣⲟⲛⲟⲙⲓⲁ ⲙⲡϫⲟⲉⲓⲥ 20ⲓⲱⲁⲃ ⲇⲉ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲁⲥ ϫⲉ ⲉⲓⲉⲟⲩϫⲁⲓ ⲉⲓⲉⲟⲩϫⲁⲓ ⲉϣⲱⲡⲉ ϯⲛⲁϣⲣϣⲱⲣⲧⲡⲟⲗⲓⲥ ⲁⲩⲱ ⲉϣⲱⲡⲉ ϯⲛⲁⲧⲁⲕⲟⲥ 21ⲙⲡϣⲁϫⲉ ⲁⲛ ϩⲓⲛⲁⲓ ⲡⲉ ⲡⲁⲓ ϫⲉ ⲟⲩⲣⲱⲙⲉ ⲉⲃⲟⲗ ϩⲙ ⲡⲧⲟⲟⲩ ⲛⲉⲫⲣⲁⲓⲙ ⲉⲡⲉϥⲣⲁⲛ ⲡⲉ ⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲉⲁϥⲉⲛⲧⲟⲟⲧϥ ⲉϫⲙ ⲡⲣⲣⲟ ⲇ︤ⲁ︦ⲇ︥ ⲡⲉϯⲕⲱⲧⲉ ⲛⲥⲱϥ ⲙⲁ ⲛⲁⲓϥ ⲙⲙⲁⲧⲉ ⲁⲩⲱ ϯⲛⲁⲃⲱⲕ ⲛⲧⲁⲗⲟ ϩⲓⲣⲛ ⲧⲉⲧⲛⲡⲟⲗⲓⲥ ⲡⲉϫⲉⲧⲉⲥϩⲓⲙⲉ ⲛⲓⲱⲁⲃ ϫⲉ ⲉⲓⲥ ⲧⲉϥⲁⲡⲉ ⲥⲉⲛⲁⲛⲟϫⲥ ⲛⲁⲕ ⲉⲃⲟⲗ ϩⲓϫⲙ ⲡⲥⲟⲃⲧ 22ⲧⲉⲥϩⲓⲙⲉ ⲇⲉ ⲁⲥⲃⲱⲕ ⲉϩⲟⲩⲛ ϣⲁ ⲡⲉⲥⲗⲁⲟⲥ ⲧⲏⲣϥ ⲁⲥϣⲁϫⲉ ⲙⲛ ⲧⲡⲟⲗⲓⲥ ⲧⲏⲣⲥ ϩⲛ ⲧⲉⲥⲥⲟⲫⲓⲁ ⲉⲧⲣⲉⲩϥⲓ ⲛⲧⲁⲡⲉ ⲛⲥⲁⲃⲉⲉ ⲡϣⲏⲣⲉ ⲛⲃⲟⲭⲟⲣⲓ ⲁⲩϥⲓⲧⲥ ⲇⲉ ⲁⲩⲛⲟϫⲥ ⲉⲃⲟⲗ ⲛⲓⲱⲁⲃ ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛ ⲧⲥⲁⲗⲡⲓⲅⲝ ⲛⲁϣⲧⲁⲡ ⲁⲡⲟⲩⲁ ⲡⲟⲩⲁ ⲙⲙⲟⲟⲩ ⲕⲧⲟϥ ⲁϥⲃⲱⲕ ⲉⲡⲉϥⲙⲁ ⲛϣⲱⲡⲉ ⲁⲩⲱ ⲁⲃⲕⲧⲟϥ ⲛϭⲓ ⲓⲱⲁⲃ ⲁϥⲃⲱⲕ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ ⲉⲣⲁⲧϥ ⲙⲡⲣⲣⲟ 23ⲓⲱⲁⲃ ⲇⲉ ⲛⲉϥϣⲟⲟⲡ ⲉϫⲙ ⲡⲙⲏⲏϣⲉ ⲧⲏⲣϥ ⲙⲡⲓ︤ⲏ︦ⲗ︥ ⲁⲩⲱ ⲃⲁⲛⲁⲓⲁⲥ ⲡϣⲏⲣⲉ ⲛⲓⲱⲇⲁⲉ ⲛⲉϥϣⲟⲟⲡ ⲉϫⲙ ⲡⲉⲭⲉⲣⲉⲑⲑⲓ ⲁⲩⲱ ⲉϫⲙ ⲡⲉⲫⲉⲗⲉⲑⲑⲓ 24ⲁⲇⲱⲛⲓⲣⲁⲙ ⲇⲉ ⲛⲉϥϣⲟⲟⲡ ⲉϫⲙ ⲡⲉⲫⲟⲣⲟⲥ ⲁⲩⲱ ⲓⲱⲥⲁⲫⲁⲧ ⲡϣⲏⲣⲉ ⲛⲁⲭⲓⲗⲟⲩⲑ ⲛⲧⲟϥ ⲡⲉⲧⲧⲣⲉⲡⲣⲣⲟ ⲣⲡⲙⲉⲉⲩⲉ 25ⲁⲩⲱ ⲓⲏⲥⲟⲩⲥ ⲛⲧⲟϥ ⲡⲉⲧⲟ ⲛⲅⲣⲁⲙⲙⲁⲧⲉⲩⲥ ⲁⲩⲱ ⲥⲁⲇⲱⲕ ⲙⲛ ⲁⲃⲓⲁⲑⲁⲣ ⲛⲉⲩⲟ ⲛⲟⲩⲏⲏⲃ 26ⲡⲕⲉⲉⲓⲣⲁⲥ ⲡϣⲏⲣⲉ ⲛⲓⲁⲣⲓⲛ ⲛⲉϥⲟ ⲛⲟⲩⲏⲏⲃ ⲛⲇ︤ⲁ︦ⲇ︥
Copyright information for
CopSahBible2