2 Samuel 24

1ⲁⲩⲱ ⲁⲥⲟⲩⲱϩ ⲉⲧⲟⲟⲧⲥ ⲛϭⲓ ⲟⲩⲟⲣⲅⲏ ⲛⲧⲉ ⲡϫⲟⲉⲓⲥ ⲉⲧⲣⲉⲥⲙⲟⲩϩ ϩⲙ ⲡⲓ︤ⲏ︦ⲗ︥ ⲁⲩⲱ ⲁⲥⲕⲉⲙⲧⲇ︤ⲁ︦ⲇ︥ ϩⲣⲁⲓ ⲛϩⲏⲧⲟⲩ ⲉϥϫⲱ ⲙⲙⲟⲥ ϫⲉ ⲃⲱⲕ ⲛⲅϫⲓⲏⲡⲉ ⲙⲡⲓ︤ⲏ︦ⲗ︥ ⲙⲛ ⲓⲟⲩⲇⲁ 2ⲁⲩⲱ ⲡⲣⲣⲟ ⲡⲉϫⲁϥ ⲛⲓⲱⲁⲃ ⲡⲁⲣⲭⲱⲛ ⲙⲡⲉϥⲙⲏⲏϣⲉ ⲉϥⲛⲙⲙⲁϥ ⲉϥϫⲱ ⲙⲙⲟⲥ ⲛⲁϥ ϫⲉ ⲃⲱⲕ ⲉⲃⲟⲗ ϩⲛ ⲛⲉⲫⲩⲗⲏ ⲧⲏⲣⲟⲩ ⲙⲡⲓ︤ⲏ︦ⲗ︥ ϫⲓⲛ ⲇⲁⲛ ϣⲁ ⲃⲏⲣⲥⲁⲃⲉⲉ ⲛⲅϫⲓⲏⲡⲉ ⲙⲡⲗⲁⲟⲥ ϫⲉ ⲉⲓⲉⲉⲓⲙⲉ ⲉⲧⲉⲩⲏⲡⲉ ϫⲉ ⲡⲗⲁⲟⲥ ⲛⲁⲣⲟⲩⲏⲣ 3ⲁⲩⲱ ⲓⲱⲁⲃ ⲡⲉϫⲁϥ ϩⲓⲑⲏ ⲙⲡⲣⲣⲟ ϫⲉ ⲡϫⲟⲉⲓⲥ ⲡⲉⲕⲛⲟⲩⲧⲉ ⲉϥⲉⲟⲩⲱϩ ⲉϫⲙ ⲡⲗⲁⲟⲥ ⲛⲁⲁⲣⲟⲟⲩ ⲟⲛ ⲁⲩⲱ ⲟⲛ ⲛⲁⲁⲣⲟⲟⲩ ⲛϣⲉ ⲛⲕⲱⲃ ⲉⲣⲉⲛⲃⲁⲗ ⲙⲡϫⲟⲉⲓⲥ ⲡⲣⲣⲟ ϭⲱϣⲧ ⲉϫⲱⲟⲩ ⲁⲩⲱ ϭⲉ ⲡⲁϫⲟⲉⲓⲥ ⲡⲣⲣⲟ ⲁϩⲣⲁϥ ϥⲕⲱⲧⲉ ⲛⲥⲁ ⲡⲉⲓϣⲁϫⲉ ⲉⲁⲁϥ 4ⲡϣⲁϫⲉ ⲇⲉ ⲙⲡⲣⲣⲟ ⲁϥⲃⲉⲉⲣⲉ ⲡϣⲁϫⲉ ⲛⲓⲱⲁⲃ ⲙⲛ ⲛⲕⲉⲁⲣⲭⲱⲛ ⲙⲡⲙⲏⲏϣⲉ ⲓⲱⲁⲃ ⲇⲉ ⲙⲛ ⲛⲕⲉⲁⲣⲭⲱⲛ ⲙⲡⲙⲏⲏϣⲉ ⲁϥⲉⲓ ⲉⲃⲟⲗ ϩⲓⲧⲟⲟⲧϥ ⲙⲡⲣⲣⲟ ⲉϫⲓⲏⲡⲉ ⲙⲡⲗⲁⲟⲥ ⲙⲡⲓ︤ⲏ︦ⲗ︥ 5ⲁⲩⲱ ⲁⲩϫⲓⲟⲟⲣ ⲙⲡⲓⲟⲣⲇⲁⲛⲏⲥ ⲁⲩⲉⲓ ⲉϩⲣⲁⲓ ⲉⲁⲣⲟⲏⲣ ⲛⲥⲁ ⲟⲩⲛⲁⲙ ⲛⲧⲡⲟⲗⲓⲥ ⲧⲉⲧϩⲛⲧⲙⲏⲧⲉ ⲙⲡⲓⲁ ⲛⲅⲁⲇ ⲙⲛ ⲉⲗⲓⲉⲍⲉⲣ 6ⲁⲩⲱ ⲁⲩⲉⲓ ⲉϩⲣⲁⲓ ⲉⲅⲁⲗⲁⲁⲇ ⲁⲩⲱ ⲉϩⲣⲁⲓ ⲉⲑⲁⲃⲁⲥⲱⲛ ⲁⲩⲱ ⲉϩⲣⲁⲓ ⲉⲏⲥⲑⲱⲛ ⲁⲩⲱ ⲉϩⲣⲁⲓ ⲉⲁⲇⲁⲥⲁⲓ ⲁⲩⲱ ⲁⲩⲉⲓ ⲉϩⲣⲁⲓ ⲉⲇⲁⲛⲓⲇⲁ ⲙⲛ ⲟⲩⲇⲁⲛ ⲁⲩⲱ ⲁⲩⲕⲱⲧⲉ ⲉⲥⲓⲇⲱⲛ 7ⲁⲩⲱ ⲁⲩⲉⲓ ⲉϩⲣⲁⲓ ⲉⲙⲁⲯⲁⲣ ⲛⲧⲉ ⲧⲩⲣⲟⲥ ⲁⲩⲱ ⲉⲙⲡⲟⲗⲓⲥ ⲧⲏⲣⲟⲩ ⲙⲡⲉⲩϩⲉⲟⲥ ⲙⲛ ⲡⲉⲭⲁⲛⲁⲛⲁⲓⲟⲥ ⲁⲩⲱ ⲁⲩⲉⲓ ⲉϩⲣⲁⲓ ⲉⲡⲕⲁϩ ⲛⲓⲟⲩⲇⲁ ⲉϩⲣⲁⲓ ⲉⲃⲏⲣⲥⲁⲃⲉⲉ 8ⲁⲩⲱ ⲁⲩⲃⲱⲕ ⲉⲃⲟⲗ ϩⲙ ⲡⲕⲁϩ ⲧⲏⲣϥ ⲙⲛⲛⲥⲁ ⲛⲁⲓ ⲉϫⲙ ⲡϫⲱⲕ ⲙⲯⲓⲥ ⲛⲉⲃⲟⲧ ⲙⲛ ϫⲟⲩⲱⲧ ⲛϩⲟⲟⲩ ⲁⲩⲉⲓ ⲉϩⲣⲁⲓ ⲉⲑⲓ︤ⲗ︦ⲏ︦ⲙ︥ 9ⲁⲩⲱ ⲓⲱⲁⲃ ⲁϥϯⲧⲏⲡⲉ ⲙⲡⲙⲏⲏϣⲉ ⲙⲡⲗⲁⲟⲥ ⲉⲧⲟⲟⲧϥ ⲙⲡⲣⲣⲟ ⲡⲓ︤ⲏ︦ⲗ︥ ⲇⲉ ⲁⲧⲉϥⲏⲡⲉ ⲣϥⲧⲟⲟⲩ ⲛϫⲟⲩⲱⲧ ⲛⲧⲃⲁ ⲛⲣⲱⲙⲉ ⲛⲇⲩⲛⲁⲧⲟⲥ ⲉⲩⲁⲙⲁϩⲧⲉ ⲛⲧⲥⲏϥⲉ ⲁⲩⲱ ⲛⲣⲱⲙⲉ ⲛⲓⲟⲩⲇⲁ ⲁⲩⲣⲧⲁⲓⲟⲩ ⲛⲧⲃⲁ ⲛⲣⲱⲙⲉ ⲛⲣⲉϥⲙⲓϣⲉ 10ⲡϩⲏⲧ ⲇⲉ ⲛⲇ︤ⲁ︦ⲇ︥ ⲁϥⲟⲩⲱⲙ ⲙⲙⲟϥ ⲙⲛⲛⲥⲁ ⲉⲧⲣⲉϥϫⲓⲏⲡⲉ ⲙⲡⲗⲁⲟⲥ ⲁⲩⲱ ⲇ︤ⲁ︦ⲇ︥ ⲡⲉϫⲁϥ ϩⲓⲑⲏ ⲙⲡϫⲟⲉⲓⲥ ϫⲉ ⲁⲓⲣⲛⲟⲃⲉ ⲉⲙⲁⲧⲉ ϩⲙ ⲡⲉⲛⲧⲁⲓⲁⲁϥ ⲧⲉⲛⲟⲩ ϭⲉ ⲡϫⲟⲉⲓⲥ ⲕⲱ ⲉⲃⲟⲗ ⲛⲧⲁⲛⲟⲙⲓⲁ ⲙⲡⲉⲕϩⲙϩⲁⲗ ϫⲉ ⲁⲓⲣⲁⲑⲏⲧ ⲉⲙⲁⲧⲉ 11ⲇ︤ⲁ︦ⲇ︥ ⲇⲉ ⲁϥⲧⲱⲟⲩⲛ ⲙⲡⲉϥϩⲧⲟⲟⲩⲉ ⲁⲩⲱ ⲡϣⲁϫⲉ ⲙⲡϫⲟⲉⲓⲥ ⲁϥϣⲱⲡⲉ ϣⲁ ⲅⲁⲇ ⲡⲉⲡⲣⲟⲫⲏⲧⲏⲥ ⲡⲉⲧⲛⲁⲩ ⲉⲃⲟⲗ 12ⲉⲧⲣⲉϥⲃⲱⲕ ⲉⲣⲁⲧϥ ⲛⲇ︤ⲁ︦ⲇ︥ ⲉϥϫⲱ ⲙⲙⲟⲥ ⲛⲁϥ ϫⲉ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ⲁⲛⲟⲕ ϣⲟⲙⲛⲧ ⲛϩⲱⲃ ϯⲛⲁϫⲟⲟⲩ ⲉⲣⲟⲕ ⲥⲉⲧⲡⲟⲩⲁ ⲛⲁⲕ ⲉⲃⲟⲗ ⲛϩⲏⲧⲟⲩ ⲛⲧⲁⲁⲁϥ ⲛⲙⲙⲁⲕ 13ⲁⲩⲱ ⲅⲁⲇ ⲡⲉⲡⲣⲟⲫⲏⲧⲏⲥ ⲁϥⲃⲱⲕ ⲉϩⲟⲩⲛ ϣⲁ ⲇ︤ⲁ︦ⲇ︥ ⲁϥⲧⲁⲙⲟϥ ⲉϥϫⲱ ⲙⲙⲟⲥ ⲛⲁϥ ϫⲉ ⲥⲉⲧⲡ ⲟⲩϩⲱⲃ ⲛⲁⲕ ϩⲛ ⲛⲁⲓ ⲉⲧⲣⲉϥϣⲱⲡⲉ ⲏ ⲛⲧⲉⲟⲩϩⲉⲃⲱⲱⲛ ⲧⲁϩⲟⲕ ⲛϣⲟⲙⲧⲉ ⲛⲣⲟⲙⲡⲉ ϩⲓϫⲙ ⲡⲕⲁϩ ⲏ ⲛⲅⲉⲣ ϣⲟⲙⲛⲧ ⲛⲉⲃⲟⲧ ⲉⲕⲡⲏⲧ ϩⲁ ⲡϩⲟ ⲛⲛⲉⲕϫⲁϫⲉ ⲉⲩⲡⲏⲧ ⲛⲥⲱⲕ ⲏ ⲛⲧⲉ ⲟⲩⲙⲟⲩ ϣⲱⲡⲉ ϩⲙ ⲡⲉⲕⲕⲁϩ ⲛϣⲟⲙⲛⲧ ⲛϩⲟⲟⲩ ⲧⲉⲛⲟⲩ ϭⲉ ⲉⲓⲙⲉ ⲛⲅⲛⲁⲩ ⲉⲡϣⲁϫⲉ ⲉϯⲛⲁϫⲟⲟϥ ⲙⲡⲉⲛⲧⲁϥⲧⲛⲛⲟⲟⲩⲧ ϣⲁⲣⲟⲕ 14ⲡⲉϫⲉⲇⲁⲩⲉⲓⲇ ⲛⲅⲁⲇ ⲡⲉⲡⲣⲟⲫⲏⲧⲏⲥ ϫⲉ ⲛⲁⲓ ⲛⲧⲁⲕϫⲟⲟⲩ ϩⲛϩⲟϫϩⲉϫ ⲛⲁⲓ ⲛⲉ ⲉⲡⲧⲏⲣϥ ⲉⲙⲁⲧⲉ ϯⲛⲁⲥⲟⲡⲧⲥ ⲛⲁⲓ ⲉⲧⲣⲁⲉⲓ ⲛⲧⲟϥ ⲉϩⲣⲁⲓ ⲉⲧϭⲓϫ ⲙⲡϫⲟⲉⲓⲥ ϫⲉ ⲛⲉϥⲙⲛⲧϣⲉⲛⲉϩⲧⲏϥ ⲛⲁϣⲱⲟⲩ ⲉⲙⲁⲧⲉ ⲛⲛⲁⲟⲩⲱϣ ϭⲉ ⲉⲧⲣⲁⲓ ⲉϩⲣⲁⲓ ⲉⲧϭⲓϫ ⲛⲛⲣⲱⲙⲉ 15ⲁⲩⲱ ⲇ︤ⲁ︦ⲇ︥ ⲁϥⲥⲱⲧⲡ ⲛⲁϥ ⲙⲡⲙⲟⲩ ⲉⲧⲣⲉϥⲧⲁϩⲟϥ ⲛⲉ ⲛⲉϩⲟⲟⲩ ⲇⲉ ⲛⲉ ⲙⲡⲉϩⲥⲥⲟⲩⲟ ⲁⲩⲱ ⲡϫⲟⲉⲓⲥ ⲁϥⲟⲩⲉϩⲥⲁϩⲛⲉ ⲉⲧⲣⲉⲟⲩⲙⲟⲩ ϣⲱⲡⲉ ϩⲙ ⲡⲓ︤ⲏ︦ⲗ︥ ϫⲓⲛ ϩⲧⲟⲟⲩⲉ ϣⲁ ⲡⲛⲁⲩ ⲛⲟⲩⲱⲙ ⲙⲙⲉⲉⲣⲉ ⲧⲟⲣⲅⲏ ⲇⲉ ⲁⲥⲙⲟⲩϩ ⲉϩⲟⲩⲛ ⲉⲡⲗⲁⲟⲥ ⲁⲩⲱ ⲁⲩⲙⲟⲩ ⲉⲃⲟⲗ ϩⲙ ⲡⲗⲁⲟⲥ ϫⲓⲛ ⲇⲁⲛ ϣⲁ ⲉϩⲣⲁⲓ ⲉⲃⲏⲣⲥⲁⲃⲉⲉ ⲛϭⲓ ⲥⲁϣϥ ⲛⲧⲃⲁ ⲛⲣⲱⲙⲉ 16ⲡⲁⲅⲅⲉⲗⲟⲥ ⲇⲉ ⲙⲡϫⲟⲉⲓⲥ ⲁϥⲥⲟⲩⲧⲛⲧⲟⲟⲧϥ ⲉⲃⲟⲗ ⲉⲑⲓ︤ⲗ︦ⲏ︦ⲙ︥ ⲉⲧⲁⲕⲟⲥ ⲁⲩⲱ ⲡϫⲟⲉⲓⲥ ⲁⲩⲥⲉⲡⲥⲱⲡϥ ⲉⲧⲃⲉ ⲧⲉⲓⲕⲁⲕⲓⲁ ⲏ ⲧⲉⲓⲙⲟⲕϩⲥ ⲡⲉϫⲁϥ ⲙⲡⲁⲅⲅⲉⲗⲟⲥ ⲡⲉⲧⲙⲟⲩⲟⲩⲧ ϩⲙ ⲡⲗⲁⲟⲥ ϫⲉ ⲛⲁϣⲉ ⲧⲣⲁϩⲧⲥ ⲛⲧⲁⲥϣⲱⲡⲉ ⲧⲉⲛⲟⲩ ⲁⲛⲓⲧⲟⲟⲧⲕ ⲉⲣⲁⲕ ⲁⲩⲱ ⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲛⲉϥⲁϩⲉⲣⲁⲧϥ ϩⲁⲧⲙ ⲡⲉϫⲛⲟⲟⲩ ⲛⲟⲣⲛⲁ ⲡⲓⲉⲃⲟⲩⲥⲁⲓⲟⲥ 17ⲇ︤ⲁ︦ⲇ︥ ⲇⲉ ⲛⲧⲉⲣⲉϥⲛⲁⲩ ⲉⲡⲁⲅⲅⲉⲗⲟⲥ ⲡⲉϫⲁϥ ϩⲓⲑⲏ ⲙⲡϫⲟⲉⲓⲥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲡⲉ ⲛⲧⲁⲓⲣⲛⲟⲃⲉ ⲁⲛⲟⲕ ⲡϣⲱⲥ ⲁⲓⲉⲓⲣⲉ ⲛⲟⲩϫⲓⲛϭⲟⲛⲥ ⲛⲁⲓ ⲇⲉ ⲛⲉ ϩⲉⲛⲉⲥⲟⲟⲩ ⲛⲉ ⲙⲡⲟⲩⲣⲗⲁⲁⲩ ⲛⲧⲁⲩ ⲧⲉⲛⲟⲩ ϭⲉ ⲡϫⲟⲉⲓⲥ ⲙⲁⲣⲉⲧⲉⲕϭⲓϫ ⲉⲓ ⲉϩⲣⲁⲓ ⲉϫⲱⲓ ⲁⲩⲱ ⲉϫⲙ ⲡⲏⲓ ⲙⲡⲁⲉⲓⲱⲧ 18ⲅⲁⲇ ⲇⲉ ⲡⲉⲡⲣⲟⲫⲏⲧⲏⲥ ⲁϥⲉⲓ ⲉⲣⲁⲧϥ ⲛⲇ︤ⲁ︦ⲇ︥ ⲙⲡⲉϩⲟⲟⲩ ⲉⲧⲙⲙⲁⲩ ⲡⲉϫⲁϥ ⲛⲁϥ ϫⲉ ⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲛⲅⲥⲙⲓⲛⲉ ⲛⲟⲩⲇⲓⲁⲑⲏⲕⲏ ⲙⲛ ⲡϫⲟⲉⲓⲥ ⲛⲅⲧⲁⲙⲓⲟ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ϩⲛ ⲧⲉⲣϫⲛⲟⲟⲩ ⲛⲟⲣⲛⲁ ⲡⲓⲉⲃⲟⲩⲥⲁⲓⲟⲥ 19ⲁⲩⲱ ⲇ︤ⲁ︦ⲇ︥ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲕⲁⲧⲁ ⲡϣⲁϫⲉ ⲛⲅⲁⲇ ⲛⲑⲉ ⲛⲧⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ 20ⲟⲣⲛⲁ ⲇⲉ ⲁϥϭⲱϣⲧ ⲁϥⲛⲁⲩ ⲉⲡⲣⲣⲟ ⲙⲛ ⲛⲉϥϩⲙϩⲁⲗ ⲉⲩⲙⲟⲟϣⲉ ⲉⲣⲟϥ ⲁⲩⲱ ⲟⲣⲛⲁ ⲁϥⲉⲓ ⲉⲃⲟⲗ ⲁϥⲡⲁϩⲧϥ ⲉⲡⲉⲥⲏⲧ ⲉϫⲙ ⲡⲉϥϩⲟ ⲁϥⲟⲩⲱϣⲧ ⲙⲡⲣⲣⲟ ⲇ︤ⲁ︦ⲇ︥ 21ⲁⲩⲱ ⲡⲉϫⲉⲟⲣⲛⲁ ⲛⲁϥ ϫⲉ ⲉⲧⲃⲉ ⲟⲩ ⲡⲁϫⲟⲉⲓⲥ ⲡⲣⲣⲟ ⲁϥⲉⲓ ⲉⲣⲁⲧϥ ⲙⲡⲉϥϩⲙϩⲁⲗ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲛⲧⲁⲓⲉⲓ ⲉⲧⲣⲁϣⲱⲡ ⲛⲧⲟⲟⲧⲕ ⲛⲧⲉⲕⲣϫⲛⲟⲟⲩ ϫⲉ ⲉⲓⲉⲕⲱⲧ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲛⲧⲉⲧⲟⲣⲅⲏ ⲙⲡⲙⲟⲩ ⲗⲟ ϩⲓϫⲙ ⲡⲗⲁⲟⲥ 22ⲟⲣⲛⲁ ⲇⲉ ⲡⲉϫⲁϥ ⲛⲇ︤ⲁ︦ⲇ︥ ϫⲉ ⲡⲁϫⲟⲉⲓⲥ ⲡⲣⲣⲟ ⲙⲁⲣⲉϥϫⲓⲧⲥ ⲛϥⲉⲓⲣⲉ ⲛⲁϩⲣⲙ ⲡϫⲟⲉⲓⲥ ⲙⲡⲁⲅⲁⲑⲟⲛ ⲛⲁϩⲣⲁϥ ⲉⲓⲥ ⲛⲕⲉⲙⲁⲥⲉ ⲉⲧⲣⲉⲕⲧⲁⲗⲟⲟⲩ ⲉϩⲣⲁⲓ ⲛϭⲗⲓⲗ ⲁⲩⲱ ⲉⲓⲥ ⲛⲕⲉⲧⲣⲟⲭⲟⲥ ⲙⲛ ⲛⲉⲥⲕⲉⲩⲏ ⲛⲧⲁϭⲟⲗⲧⲉ ⲉⲁⲁⲩ ⲛϣⲉ ⲉⲡⲉϭⲗⲓⲗ 23ⲛⲁⲓ ⲧⲏⲣⲟⲩ ⲁⲟⲣⲛⲁ ⲧⲁⲁⲩ ⲙⲡⲣⲣⲟ ⲁⲩⲱ ⲟⲣⲛⲁ ⲡⲉϫⲁϥ ⲙⲡⲣⲣⲟ ϫⲉ ⲡϫⲟⲉⲓⲥ ⲡⲉⲕⲛⲟⲩⲧⲉ ⲉϥⲉⲥⲙⲟⲩ ⲉⲣⲟⲕ 24ⲡⲣⲣⲟ ⲇⲉ ⲡⲉϫⲁϥ ⲛⲟⲣⲛⲁ ϫⲉ ⲛϯⲛⲁϫⲓⲧⲟⲩ ⲁⲛ ϩⲓⲛⲁⲓ ⲁⲗⲗⲁ ϩⲛ ⲟⲩϣⲱⲡ ⲉⲓⲛⲁϣⲟⲡⲟⲩ ⲛⲧⲟⲟⲧⲕ ϩⲁ ϩⲟⲙⲛⲧ ⲁⲩⲱ ⲛϯⲛⲁⲧⲁⲗⲟ ⲁⲛ ⲉϩⲣⲁⲓ ⲛⲟⲩϭⲗⲓⲗ ⲙⲙⲁϩ ⲙⲡϫⲟⲉⲓⲥ ⲡⲁⲛⲟⲩⲧⲉ ⲛϫⲓⲛϫⲏ ⲁⲩⲱ ⲇ︤ⲁ︦ⲇ︥ ⲁϥϣⲱⲡ ⲛⲧⲧⲟ ⲛⲧⲉⲣϫⲛⲟⲟⲩ ⲙⲛ ⲛⲉⲕⲉⲙⲁⲥⲉ ⲛⲧⲟⲟⲧϥ ⲛⲟⲣⲛⲁ ϩⲁ ⲧⲁⲓⲟⲩ ⲛⲥⲁⲧⲉⲉⲣⲉ ⲛϩⲁⲧ 25ⲁⲩⲱ ⲇⲁⲩⲉⲓⲇ ⲁϥⲕⲱⲧ ⲙⲡⲙⲁ ⲉⲧⲙⲙⲁⲩ ⲛⲟⲩⲑⲩⲥⲓⲁⲥⲧⲏⲣⲓⲟⲛ ⲙⲡϫⲟⲉⲓⲥ ⲁϥⲧⲁⲗⲟ ⲉϩⲣⲁⲓ ⲉϫⲱϥ ⲛⲟⲩϭⲗⲓⲗ ⲙⲛ ϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲁⲩⲱ ⲁϥⲟⲩⲱϩ ⲉⲧⲟⲟⲧϥ ⲉⲧⲁⲗⲟ ⲉϩⲣⲁⲓ ⲛⲥⲟⲗⲟⲙⲟⲛ ⲉϫⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲉⲡϩⲁⲏ ⲉⲃⲟⲗ ϫⲉ ⲛⲉⲣⲉⲡϩⲱⲃ ⲥⲟⲃⲕ ⲉⲧⲁⲗⲟϥ ⲉϩⲣⲁⲓ ⲛϣⲟⲣⲡ ⲁⲩⲱ ⲡϫⲟⲉⲓⲥ ⲁϥϯϩⲧⲏϥ ⲉϫⲙ ⲡⲕⲁϩ ⲁⲩⲱ ⲧⲟⲣⲅⲏ ⲙⲡⲙⲟⲩ ⲁⲥⲗⲟ ⲙⲙⲁⲩ ϩⲓϫⲙ ⲡⲓ︤ⲏ︦ⲗ︥
Copyright information for CopSahBible2