‏ 1 Chronicles 16

1 ^aАлланынъ Сандыгъыны кетирдилер ве оны Давут азырлагъан чадырнынъ ортасына къойдылар. Сонъра Алла ичюн къурбанлар чалып, оларны бутюнлей якътылар ве аманлыкъ къурбанлары кетирдилер.

2Давут бутюнлей якъыладжакъ къурбанлар ве аманлыкъ къурбанларны чалып битирген сонъ, халкъкъа РАББИнинъ Адындан хайыр тиледи. 3Бутюн исраиллилерге, эм акъайына, эм апайына – эр бирине бирер отьмек, басылгъан хурма ве юзюм къурусы берди.

4 ^bСонъ Давут левийлилернинъ базыларыны РАББИнинъ Сандыгъы янында хызмет этмек, Исраильнинъ Алласы РАББИни алгъышламакъ, шукюрлер этмек ве Оны юксельтмек ичюн къойды. 5 ^cАсафны башлыкъ оларакъ, ондан сонъ Зекъарьяны, Еиэлни, Шемирамотны, Ехиэлни, Маттитьяны, Элиавны, Бенаяны, Овед-Эдомны ве Еиэлни арфа ве сантырларда чалмагъа, Асафны исе зиллерде чалмагъа, 6руханийлер олгъан Беная ве Яхазиэлни исе Алланынъ Васиет Сандыгъы огюнде даима боразан чалсынлар деп, къойды.

Давутнынъ шукюр йыры

7Шу куню Давут биринджи кере Асафкъа ве къардашларына РАББИге шукюр йырыны берди.

8 ^dРАББИге шукюр этинъиз, Онынъ Адыны чагъырынъыз,
халкълар арасында ишлерини бильдиринъиз!
9 ^eОнъа йырланъыз, Онъа чалгъы чалынъыз,
бутюн аджайип япкъанлары акъкъында айтынъыз!
10Мукъаддес Адынен макътанынъыз,
РАББИни къыдыргъанларнынъ юреги къувансын!
11 ^fРАББИни ве Онынъ къудретини къыдырынъыз,
Онынъ юзюни эр вакъыт аранъыз!
12 ^gОнынъ яраткъан аджайип шейлерини ве аляметлерини,
агъзындан чыкъкъан къарарларыны хатырланъыз!
13Эй, Онынъ къулу Исраильнинъ сою,
Озю сайлагъан Якъупнынъ огъуллары!
14 ^hО – Алламыз олгъан РАББИдир,
бутюн ер юзюнде Онынъ падишалыгъы кече.
15 ⁱО, берген васиетни эбедий акъылда тутунъыз,
О, берген сёзюни бинъ несиллер девамында унутманъыз.
16 ^jО, Озь сёзюни Ибраимге
ве Озь антыны Исхакъкъа берген эди.
17Буны Якъупкъа низамнаме деп къойды,
Исраильге эбедий васиет деп берди.
18 ^k«Ханаан ерини санъа береджегим,
о, сенинъ топракъ мирасынъ олур», – деди.
19 ^lО вакъытта оларнынъ сайысы пек аз,
о ерде олар кельмешеклер эди.
20Бир халкътан башкъа халкъкъа,
бир падишалыкътан башкъа девлетке кече эдилер.
21 ^mАлла оларнынъ джаныны агъыртмагъа кимсеге ёл бермеди,
олар ичюн падишаларгъа сертликнен дей эди:
22 ⁿ«Меним сайлагъанларыма тийменъиз,
пейгъамберлериме яманлыкъ этменъиз!»
23Эй, бутюн дюнья, РАББИге йырлар йырланъыз,
Онынъ къуртарувыны кунь-куньден илян этинъиз!
24 ^oШан-шуретини миллетлер арасында хабер этинъиз,
Онынъ аджайип япкъанларыны бутюн халкъларгъа бильдиринъиз!
25 ^pАкъикъатен РАББИ улудыр!
О, чокъ макътавларгъа ляйыкъ!
Бутюн аллалардан зияде Ондан къоркъмакъ керек!
26 ^qХалкъларнынъ бутюн аллалары – бош путлардыр,
РАББИ исе коклерни яратты!
27О, шан ве шурет ичинде,
мукъаддес мескенинде – кучь ве къуванч!
28 ^rЭй, халкъ къабилелери, РАББИни алгъышланъыз,
РАББИнинъ шурети ве къудретини алгъышланъыз!
29РАББИнинъ Адына ярашкъан шуретини беринъиз,
бахшышлар кетирип, Онынъ огюне келинъиз!
Мукъаддес шуретинде олгъан РАББИге ибадет этинъиз!
30Бутюн ер юзю, Онынъ алдында титре!
Дюнья къатты тура, о, къыбырдамаз асла!
31 ^sКоклер севинсин, ер юзю къувансын,
халкълар арасында илян этсинлер:
«РАББИ – падишадыр!»
32 ^tДенъиз ве ичиндекилер янъгъырасын,
тарлалар ве олардаки барлыкъ тантана этсин!
33 ^uРАББИнинъ огюнде ормандаки бутюн тереклер къуванчнен къычырсынлар,
чюнки РАББИ ер юзюни суд этмеге келе.
34 ^vРАББИге шукюр этинъиз,
чюнки О, хайырлыдыр,
Онынъ севгиси эбедийдир!
35Шойле айтынъыз: «Эй, Алла, бизим Къуртарыджымыз! Къуртар бизни!
Халкълар арасындан бизни топлап ал,
башкъа халкълардан къорчала!
Сенинъ мукъаддес Адынъны шуретлейик,
Сенинъ шуретли ишлеринънен макътанайыкъ!»
36 ^wРАББИге, Исраильнинъ Алласына
эбедиен, бутюн асырларда бинъ шукюрлер олсун!

Сонъ бутюн халкъ: «Амин! РАББИге макътав олсун!» – деди.

Ерусалимдеки ве Гивондаки олып кечкен Аллагъа ибадет

37 ^xДавут РАББИнинъ Васиет Сандыгъы огюнде, эр вакъыт Сандыкънынъ янында хызмет этсинлер деп, Асафны ве онынъ къардашларыны къалдырды. 38Оларнен берабер Овед-Эдомны ве 68 агъа-къардашларыны къалдырды. Къапуджылар оларакъ исе Едутуннынъ огълу Овед-Эдомны ве Хосаны къойды. 39 ^yРуханий Цадокъны ве руханий олгъан къардашларыны РАББИнинъ Мескени огюнде, Гивондаки ибадет тёпесинде къалдырды. 40 ^zОлар бутюнлей якъыладжакъ къурбанларны къурбан еринде якъмакъ, даима, саба-акъшам оларны РАББИге кетирмек ве РАББИ Исраильге буюргъан ве Къанунда язылгъан эр бир шейлерни япмакъ керек эди. 41 ^aaРАББИни, Онынъ севгиси даимий олгъаны ичюн, шерефлесинлер деп, Давут анда Хеманны, Едутунны ве башкъа ады-адынен сайлангъанларны да къалдырды.

42 ^abХеман ве Едутун оларнен берабер эди. Олар, РАББИни шуретлемек ичюн керек олгъан боразан, зиллер ве башкъа чалгъы алетлерине джевапкяр эдилер. Едутуннынъ огъуллары исе къапуджылар эдилер.

43Сонъра бутюн халкъ эв-эвине къайтып кетти. Давут да эписи эвдекилерине эйилик тилемек ичюн эвине къайтты.