‏ 1 Chronicles 23

1 ^aДавут къартайып ве яшайышына тойып, огълу Сулейманны Исраильнинъ падишасы этти.

Левийлилернинъ хызметлери

2Давут Исраильнинъ эписи башлыкъларыны, руханийлерини ве левийлилерни топлады. 3 ^bОтуз яшындан кечкен левийлилернинъ сайысы бельгиленди. Олар джеми оларакъ 38 000 киши эди. 4Оларнынъ арасындан РАББИнинъ Эвинде хызмет этмеге 24 000 киши айырылды. 6 000 исе языджы ве къады оладжакъ эди. 5 ^c4 000 къапуджы олмакъ керек эди, ве 4 000 адам Давут яптыргъан чалгъы алетлеринде чалып, РАББИни шерефлемек керек эди.

6 ^dДавут левийлилернинъ эписини, Левийнинъ эвлятларына коре, болюклерге айырды: Гершон, Кехат ве Мерарий. 7 ^eГершонлылардан – Ладан ве Шимий.

8 ^fЛадан огъуллары: биринджиси Ехиэл, сонъ Зетам ве Ёэль – учь киши.

9Шимийнинъ огъуллары: Шеломот, Хазиэл ве Харан – учь киши. Олар Ладан къоранталарынынъ башлыкълары эди. 10Шимийнинъ башкъа огъуллары: Яхат, Зиза, Еуш ве Бриа – дёрт киши. Олар Шимийнинъ огъуллары эдилер. 11Яхат биринджи, Зиза исе экинджиси эди. Еуш ве Брианынъ балалары аз эди, шунынъ ичюн олар бабасынен берабер бир къоранта оларакъ эсаплана эдилер, ве вазифелери де бир эди.

12 ^gКехатнынъ огъуллары: Амрам, Йицхар, Хеврон ве Уззиэл – дёрт киши.

13 ^hАмрамнынъ огъуллары: Харун ве Муса.

Харун ве онынъ огъуллары эбедиен улу азизликлерни багъышламакъ ичюн, РАББИнинъ огюнде къокъулы отларны якъмакъ, Онъа хызмет этмек ве Онынъ Адынен даима яхшылыкъ тилемек ичюн айырылгъан эдилер.

14 ⁱАлланынъ адамы Муса ве онынъ огъуллары Левий къабилесинен эсапланды.

15 ^jМусанынъ огъуллары: Гершом ве Элиэзер.

16 ^kГершомнынъ огъуллары: биринджиси Шевуэл эди.

17 ^lЭлиэзернинъ огъуллары: биринджиси Рехавья. Элиэзернинъ башкъа огъуллары олмады, Рехавьянынъ исе огъуллары чокъ эди.

18Йицхарнынъ огъуллары: биринджиси Шеломит.

19 ^mХевроннынъ огъуллары: биринджиси Ерия, экинджиси Амарья, учюнджиси Яхазиэл ве дёртюнджиси Екъамеам эди.

20 ⁿУззиэлнинъ огъуллары: биринджиси Микъа, экинджиси Йишшия.

21 ^oМерарийнинъ огъуллары: Махлий ве Муший. Махлийнинъ огъуллары Элазар ве Киш.

22 ^pЭлазар огъул корьмейип ольди, онынъ тек къызлары олды. Кишнинъ огъуллары оларгъа эвлендилер.

23 ^qМушийнинъ огъуллары: Махлий, Эдер ве Еремот – учь киши.

24 ^rЛевий огъулларынынъ къоранталары ве къоранталарнынъ башлыкълары булар эдилер. Къоранта башлыкъларынынъ эр бир ады-адынен эсаплангъан эди. Олар йигирми яшыны кечкен сонъ, РАББИнинъ Эвинде ибадет хызметини беджере эдилер. 25 ^sДавут бойле айткъан эди: «РАББИ, Исраильнинъ Алласы, Озюнинъ халкъына тынчлыкъ берди ве оны Ерусалимде эбедиен ерлештирди. 26Шунынъ ичюн левийлилерге Алланынъ Мескенини ве ибадет хызметинде къулланылгъан чешит шейлерни ташымагъа кереги ёкъ». 27Бойлеликнен, Давутнынъ сонъки эмирлерине коре, йигирми яшыны кечкен левийлилер сайылып, 28 ^tХарун огъулларынынъ янында хызмет эте эдилер. Олар РАББИнинъ Эвинде, азбары ве Эвнинъ четиндеки одаларда хызмет эте, азиз шейлерни темизлей ве башкъа хызметлерни беджере эдилер. 29Теклиф пителери, ашлыкъ бахшышлары ичюн ун, маясыз пителер, таваларда пишкен ашлар, чешит ашайт малларны къарыштырув, эр тюрлю ольчюлер ичюн олар джевапкяр эдилер. 30Эр саба олар турып, РАББИге шукюр этмеге ве Оны макътамагъа керек эдилер. Эр акъшам да шуны япа эдилер. 31 ^uРаатлыкъ куньлеринде, янъы ай куньлеринде ве эр бир байрам куньлеринде олар бутюнлей якъыладжакъ къурбанларны РАББИге чалып, эр вакъыт, язылгъан къаиделерге коре, РАББИнинъ огюнде олмагъа керек эдилер. Олар бельгиленген сайысына коре, кереги киби хызмет этмек керек эди. 32Левийлилер Корюшюв Чадыры ве Мукъаддес Ер ичюн джевапкяр эдилер, къардашлары Харун огъулларына РАББИнинъ Эвиндеки ибадетлерде ярдым эте эдилер.