‏ 1 Chronicles 29

Раббининъ Сарайы къурулышына берильген паралар

1 ^aДавут падиша бутюн топлашувгъа бойле деди:

– Алла сайлап алгъан огълум Сулейман даа яш ве теджрибесиздир. Бу вазифе исе гъает буюктир, чюнки бу бина инсан ичюн дегиль, Алламыз РАББИ ичюндир. 2Бар кучюмнен Алланынъ Сарайы ичюн алтын шейлер ичюн алтын, кумюш шейлер ичюн кумюш, бакъыр шейлер ичюн бакъыр, демир шейлер ичюн демир, агъач шейлер ичюн агъач топладым, шохам ташлары ве къоюладжакъ къыйметли ташлар, мозаик ташлар, гузель чешит ренкли къыйметли ташлар, чешит тюрлю къыйметли ташлар ве беяз ташлар азырладым. 3Алламнынъ Эвини севгеним ичюн, Мукъаддес Эвге азырлагъан шейлерден гъайры, шахсий хазинемден алтын ве кумюш шейлерни Алламнынъ Сарайы ичюн берем: 4 ^b3 000 чувал Офир алтыны ве 7 000 чувал ▼

▼3 000 чувал; 7 000 чувал – къ. еуд. «3 000 киккар», «7 000 киккар».

темиз кумюшни берем. Оны эвлернинъ диварларыны къапламагъа, 5 ^dэр бир алтын шей ичюн, эр бир кумюш шей ичюн, санаат устасынынъ элинден чыкъкъан эр бир шей ичюн берем. Ким даа бугунь РАББИ ичюн бахшыш кетирмек истей?

6Бундан сонъ, къоранталарнынъ башлыкълары, Исраиль къабилелернинъ башлыкълары, бинъбашылары ве юзбашылары ве падишанынъ хызметинде булунгъан башлыкълар бахшыш кетирип башладылар. 7Олар Алланынъ Сарайы къуруджылыгъына 5 000 чувал алтын ве 10 000 алтын пара, 10 000 чувал кумюш, 18 000 чувал бакъыр, 100 000 чувал демир бердилер. 8 ^eКимнинъ къыйметли ташлары олса, оларны РАББИнинъ Сарайы хазинесине бердилер. Оларны гершонлы Ехиэл къабул этти. 9 ^fХалкъ джан-гонъюльден шу къадар шей РАББИге бахшыш кетиргенлери ичюн, пек севинди. Давут падиша да пек севинди.

Давут Алланы шуретлей

10Давут бутюн топлашувнынъ огюнде РАББИге шукюр этти ве бойле деди:

Я РАББИ, бизим бабамыз олгъан Исраильнинъ Алласы,
Санъа асыр-асырдан шукюрлер олсун!
11 ^gЯ РАББИ, улулыкъ, къудрет, шереф, гъалебе ве шан Сенинъкидир!
Коклерде ве ер юзюндеки эр шей Сенинъки!
Сен, РАББИ, Падишасынъ!
Сен эр шейден Юджесинъ!
12 ^hЗенгинлик ве шурет Сенден келир,
Сен эр шейге Укюмдарсынъ!
Кучь ве къудрет Сенинъ элинъдедир,
Сен эр кимни юксельтмек ве къудретли этмек мумкюнсинъ!
13Алламыз, шимди биз Санъа шукюр этемиз!
Сенинъ гузель Адынъны шерефлеймиз!
14Мен кимим, халкъым ким,
бойле буюк бахшышлар кетире бильмек ичюн?
Амма буларнынъ эписи Сенден,
биз тек Сенден кельген шейлерни Санъа къайтарып бердик!
15 ⁱБиз Сенинъ огюнъде гъурбетчимиз,
эписи бабаларымыз киби, кельмешекмиз.
Ер юзюндеки куньлеримиз бир кольге киби,
ве умютимиз ёкъ.
16 ^jЯ РАББИ, бизим Алламыз! Сенинъ Эвинъе, Сенинъ мукъаддес Адынъа
эв къурмакъ ичюн топлагъан бутюн бу шейлер Сендендир,
эписи Сенинъдир!
17 ^kАллам! Билем ки, Сен юреклерни сынайсынъ,
догъру юреклерни севесинъ!
Мен джан-гонъюльден бутюн буларны бахшыш оларакъ бердим,
шимди корем ки, мында топлангъан Сенинъ халкъынъ да
къуванып Санъа бахшышлар кетире.
18Я РАББИ! Бабаларымыз Ибраимнинъ, Исхакънынъ ве Исраильнинъ Алласы!
Халкъынънынъ юрегинде бу эйи дуйгъуларны даима сакъла,
оларгъа Санъа садыкъ къалмагъа ярдым эт.
19 ^lОгълум Сулеймангъа исе Сенинъ эмирлеринъни, шаатлыкъларынъны,
низамнамелеринъни тутмакъ ве беджермек ичюн догъру юрек бер.
Сулеймангъа буларны беджермеге ве мен азырлыкъ япкъан
Сарайны къурмагъа ярдым эт.

20Сонъ Давут бутюн топлашувгъа:

– РАББИге, Алланъызгъа шукюр этинъиз, – деди. Ве бутюн джемаат бабаларынынъ Алласы олгъан РАББИге шукюр этти, РАББИнинъ ве падишанынъ огюнде эгилип, ерге къапанды.

21Эртеси куню халкъ РАББИге къурбанлар чалды, РАББИге бутюнлей якъыладжакъ къурбанлар чалды: 1 000 бугъа, 1 000 къой, 1 000 къозу къурбан эттилер, ичерлик бахшышлары кетирдилер. Бутюн Исраиль халкъындан даа чокътан-чокъ къурбанлар кетирильди. 22 ^mБуюк къуванчнен РАББИнинъ огюнде ашады-ичтилер, ве экинджи кере Давут огълу Сулейманны РАББИнинъ огюнде падишалыкъкъа ягънен сюрттилер. Цадокъны исе руханийликке ягънен сюрттилер.

23 ⁿБойлеликнен, Сулейман бабасы Давут ерине РАББИ берген тахткъа падиша олып отурды. Сулейманнынъ ишлери даима онъундан кельди, бутюн Исраиль онъа бойсунды. 24Бутюн башлыкълар, кучьлю аскерлер, Давутнынъ башкъа огъуллары да Сулейман падишагъа бойсундылар. 25 ^oРАББИ Сулейманны бутюн Исраиль огюнде юксельтти ве ондан эвель Исраильнинъ ич бир падишасында олмагъан шерефни онъа берди.

Давут падишалыгъынынъ нетиджелери

26Йишай огълу Давут бутюн Исраиль топрагъында падишалыкъ этти. 27 ^pИсраильге 40 йыл девамында падишалыкъ этти: Хевронда еди йыл падишалыкъ этти ве Ерусалимде 33 йыл девамында падиша эди. 28Давут пек къарт олып ольди, яшайышына тойып, зенгинлик ве шуретине тойып кечинди. Онынъ ерине огълу Сулейман падиша олды.

29 ^qДавутнынъ бутюн ишлери акъкъында, башындан сонъунадже, гизли шейлерни бильген Смаилнинъ тарих китабында, Натан пейгъамбернинъ тарих китабында ве гизли шейлерни бильген Гъаднынъ китабында язылгъандыр. 30Анда да Давутнынъ бутюн падишалыкъ эткени, онынъ джесюрлиги, Давутнен ве Исраильнен олып кечкен вакъиалар ве бутюн башкъа падишалыкъларнен олып кечкен вакъиалар акъкъында язылгъандыр.