‏ 1 Corinthians 14

Пейгъамберлик япмакъ ве башкъа тиллерде лаф этмек къабилиети

1 ^aЭр шейден зияде севгиге ынтылынъыз, Рухнынъ бахшышларыны да, айрыджа пейгъамберлик япмакъ къабилиетини алмагъа истенъиз. 2Ким белли олмагъан тильде лаф этсе, адамларгъа дегиль, Аллагъа айта. Рухнынъ кучюнен сырларны айтса да, оны ич кимсе анъламай. 3Пейгъамберлик япкъан исе адамларны огрете, юреклендире ве оларнынъ гонъюллерини ала. 4Белли олмагъан тильде лаф эткен адам озюни огрете, пейгъамберлик япкъан исе иманлылар джемиетини огрете. 5 ^bЭнди сиз эпинъиз белли олмагъан тиллерде лаф эткенинъизни истейим, лякин пейгъамберлик япкъанынъызны даа зияде истейим. Пейгъамберлик япкъан адам белли олмагъан тиллерде лаф эткен адамдан буюк. Амма айтылгъан шейлерни терджиме эте бильген адам олса, терджиме этсин ве бойле этип, иманлылар джемиетини огретсин.

6Сонъ, дин къардашларым, мен сизге келип, белли олмагъан тиллерде лаф этип башласам, амма не Алланынъ сёзлерини анълатсам, не акъыл огретсем, не пейгъамберлик япсам, не сизни ич бир шейге окъутсам, сизлерге насыл файда кетиририм? 7Тамам бойле джансыз чалгъы алетлери де, меселя къавал я да арфа фаркълы сеслер чыкъармаса, адам къавал я да арфада чалынгъаныны къайдан биледжек? 8 ^cЭгер боразан дженкке чагъыргъанда, бельгисиз сес чыкъарса, ким дженкке азырланаджакъ? 9Бойлеликнен, эгер башкъа тильде айткъанда, сизинъ лафынъыз анълашылмаса, сизни динълегенлер не айткъанынъызны къайдан биледжеклер? Сизлер авагъа айткъан киби олурсыз. 10Дюньяда чокъ ве чешит тюрлю тиллер бар, ве олардан ич бириси манасыз дегиль. 11Амма мен бир тильнинъ манасыны анъламасам, мен о тильде лаф эткен адам ичюн эджнебий олам, лаф эткен адам да мен ичюн эджнебийдир. 12Сизнен де ойле: Рухнынъ бахшышларыны истеп, иманлылар джемиетини къавийлештиреджек къабилиетлернен зенгин олунъыз.

13Шунынъ ичюн, белли олмагъан тильде лаф эткен адам оны анълатмакъ къабилиетини алмакъ ичюн дува окъусын. 14Мен белли олмагъан тильде дува окъугъанда, рухум дува окъуса, акъылым исе дувагъа къошулмай. 15 ^dАйса не япайым? Рухнен дува окъурым, акъылнен де дува окъурым. Рухнен макътавлар йырларым, акъылнен де йырларым. 16 ^eЭгер сен тек Рухнен Аллагъа шукюр этсенъ, буны анъламагъан адам сенинъ шукюр дуванъа насыл «Амин» дейджек? О, сенинъ не айткъанынъны бильмей де! 17Сен яхшы шукюр этсенъ де, башкъа адам файда корьмей. 18Аллагъа шукюр, мен эпинъизден чокъ белли олмагъан тиллерде лаф этем. 19Иманлылар джемиетинде исе анълашылмаз тильде бинълернен сёз айткъаныма коре, башкъаларыны огретмек ичюн анълайышлы беш сёз айткъаным яхшыдыр.

20 ^fДин къардашлар, балалар киби тюшюнменъиз. Яманлыкъкъа коре, бала киби къабаатсыз олунъыз, акъылгъа коре исе буюк адамлар киби олунъыз. 21 ^gКъанунда Раббининъ бойле айткъанлары язылгъан: Мен шу халкънен башкъа тиллерде, башкъа агъызларнен лаф этеджегим. Амма о вакъытта да олар Мени динълемезлер.

22 ^hДемек, тиллер иманлылар ичюн дегиль, Аллагъа инанмагъанлар ичюн аляметтир. Пейгъамберлик исе – инанмагъанлар ичюн дегиль, иманлылар ичюндир. 23 ⁱЭгер бутюн иманлылар джемиети бир ерде топланып, эписи башкъа тиллерде лаф этип башласалар ве тиллерни анъламагъан я да инанмагъанлардан кимдир о ерге кирсе: «Сизлер акъылдан тайдынъыз», – демезми? 24Амма эписи пейгъамберлик япкъанда, Аллагъа инанмагъан я да башкъа тиллерни анъламагъан адам кирсе, эшиткен эр шей оны гунакяр олгъанында къабаатлар ве суд этер. 25 ^jО вакъыт онынъ юрек сырлары ачыкъ-айдын олур, ве о, бетинен ерге атылып: «Алла керчектен аранъыздадыр!» – деп, Аллагъа ибадет этер.

Алланынъ хызметинде тертип

26 ^kДемек, дин къардашларым, бундан насыл нетидже чыкъараджакъмыз? Топлашкъанынъызда, сизлерден кимде макътав йыры, огретюв, Алладан бир хабер, башкъа тильде бир къач сёзлер я да терджимеси бар олса, буларнынъ эписи иманлылар джемиетини къавийлештирсин. 27Эгер ким башкъа тильде лаф этмеге истесе, эки я да энъ чокъ учь адам бирер-бирер айтсын, ве бир адам айткъанларыны чевирсин. 28Эгер тильни чевирген адам олмаса, башкъа тильде лаф эткен адам иманлылар джемиетинде сесини чыкъармайып отурсын, озюне ве Аллагъа айтсын. 29 ^lПейгъамберлер де экиси я да учю лаф этсин, къалгъанлар исе айтылгъанларны тюшюнип динълесинлер. 30Эгер отургъанларнынъ бирине Алладан бир хабер кельсе, биринджи лаф эткен индемесин. 31Эр биринъиз невбетнен пейгъамберлик япа билесинъиз, ве эписи огренсин ве юрекленсин. 32Пейгъамберлернинъ рухлары пейгъамберлерге бойсуна. 33Алла тертипсизлик Алласы дегиль, муаббетлик Алласыдыр. Алланынъ бутюн азизлер джемиетлеринде олгъаны киби, 34 ^mсизинъ джемиетлеринъизде де къадынлар сесини чыкъармасынлар. Къанунда айтылгъаны киби, къадынларгъа сёзге чыкъмагъа мумкюн дегиль, олар башлыкъ этмесин. 35Эгер бир шейни огренмеге истеселер, бу акъта эвде озь акъайларындан сорасынлар. Иманлылар джемиетинде къадынгъа лаф этмек – масхаралыкътыр.

36Сизге коре, Алланынъ Сёзю сизден башлангъанмы? Я да тек сизге етип кельгенми? 37Эгер бириси озюни пейгъамбер я да рухий адам сайса, сизлерге язгъанларым – Раббининъ эмирлери олгъаныны анъласын. 38Ким буны къабул этмесе, оны да къабул этмесинлер.

39 ⁿБойлеликнен, дин къардашлар, пейгъамберлик япмагъа ынтылынъыз, амма башкъа тиллерде лаф этмеге де ясакъ этменъиз. 40 ^oТек эр шей догъру ве тертипли олсун.