a Юх 1.12
b1 Юх 2.5; 3.24; 4.13
cМт 11.30; Юх 14.15; 2 Юх 1.6
dЮх 16.33; Эф 6.16
eМт 14.33; 1 Юх 4.15
f Юх 14.17; 15.26
hЮх 5.36
iМт 3.17; 1 Юх 1.10
jЮх 1.4; 5.26; 11.25; 1 Юх 1.2
k Юх 20.31
lМт 7.7-8; Юх 14.13-14; 1 Юх 3.22
m Мт 12.31-32; Мк 3.29; Еуд 6.4-6; 10.26
n Збр 118.3; 1 Юх 3.9
oЛк 4.6; Гал 1.4
pЮх 1.1; 20.28
q 1 Кор 10.7, 14

‏ 1 John 5

Иман дюньяны енъер

1 aИсанынъ Месих олгъанына инангъан эр бир адам Алладан догъулгъандыр. Бабаны севген эр бир адам Онынъ Баласыны да севе. 2 bБиз Алланы севип, Онынъ эмирлерини беджерсек, Алланынъ балаларыны севгенимизни билемиз. 3 cАлланы севмек – Онынъ эмирлерини беджермектир. Онынъ эмирлери исе агъыр дегиль, 4 dчюнки Ондан догъулгъан эр ким дюньяны енъе. Дюньяны енъген гъалебе – иманымыздыр. 5 eДюньяны ким енъип ола? Иса – Алланынъ Огълу, деп инангъан адамдыр!

Иса Месих акъкъында шаатлыкъ

6 fСув ве къанны кечип кельген – Иса Месихтир. О, тек сувны дегиль, сув ве къанны кечип кельди. Онъа Рух шаатлыкъ япа, ве Рух – акъикъаттыр. 7Шунынънен, учю шаатлыкъ япа: 8Рух, сув ве къан. Олар учю бирлик. ▼
▼Орта асырлардаки базы эльязмаларда 7-нджи ве 8-инджи ает бойледир: «Шунынънен, учю кокте шаатлыкъ япа: Баба, Сёз ве Мукъаддес Рух. Ве бу учю бирдир. Ерде де учю шаатлыкъ япа: Рух, сув ве къан. Олар учю бирлик».
 9 hБиз адамларнынъ шаатлыкъларыны къабул этсек, Алланынъ шаатлыгъы олардан устюндир. Чюнки бу – Алланынъ шаатлыгъыдыр, Озь Огълу акъкъында берген шаатлыкътыр. 10 iКим Алланынъ Огълуна инанса, онынъ юрегинде Алланынъ шаатлыгъы бар. Аллагъа инанмагъан исе Алланы яланджы этип косьтере, чюнки Онынъ Озь Огълу акъкъында берген шаатлыгъына инанмай. 11 jШаатлыкъ исе будыр: Алла бизге эбедий омюр берди, ве бу омюр – Онынъ Огълундадыр. 12Кимде Онынъ Огълу олса, онда омюр бар. Кимде Алланынъ Огълу олмаса, онда омюр ёкъ.

Эбедий омюр

13 kМен буны сизге, Алла Огълунынъ Адына инангъанларгъа яздым. Онынъ ичюн билинъиз: сиз эбедий омюрге саип олдынъыз. 14 lБиз де Онынъ огюнде о къадар джесюр оламыз ки, Онынъ ирадесине коре бир шей истеп сорасакъ, О, бизни эшите. 15Эгер Алла истеклеримизни эшиткенини бильсек, истеклеримизни О беджереджегини де билемиз.

16 mЭгер бир адам озь агъа-къардашынынъ олюм кетирмейджек гуна япкъаныны корьсе, онынъ ичюн дува окъусын. Алла олюм кетирмейджек гуна япкъан адамгъа омюр багъышлар. Лякин олюм кетиреджек гуна да бар. Онынъ акъкъында дува окъунъыз демейим. 17Эр бир яманлыкъ – гунадыр, амма олюм кетирмейджек гуна бар.

18 nАлладан догъулгъан эр бир адам гуна ичинде яшамагъаныны билемиз. Оны Алладан Догъулгъан къорчалай; яман онъа тиймей. 19 oБиз Алладан олгъанымызны билемиз, бутюн дюнья исе яманнынъ укюминдедир. 20 pДаа шуны билемиз: Алланынъ Огълу кельди ве, биз Акъикъий Олгъанны таныйыкъ деп, бизге акъыл берди. Биз акъикъий Аллада, Онынъ Огълу Иса Месихте булунамыз. Бу – акъикъий Алла ве эбедий омюрдир.

21 qБалалар, путлардан сакъынынъыз.
Copyright information for CrhCTB