‏ 1 Kings 1

Давутнынъ къартайгъанда яшайышы

1Давут падиша къартайып, баягъы яшкъа кирген сонъ, оны къалын урбаларгъа кийиндирип башладылар, лякин о, эписи бир ушюй эди. 2 ^aОнынъ хызметчилери онъа: «Падиша-эфендимизге яш бир къыз къыдырып тапсынлар, о, падишанынъ янында олур, оны бакъар, онен берабер ятар, сонъ падиша-эфендилеримиз къызар», – дедилер. 3 ^bБутюн Исраиль топракъларында дюльбер къыз къыдырып башладылар ве шунамлы Авишагъны тапып, падишагъа кетирдилер. 4Къыз пек дюльбер эди. О, падишаны бакъып, онъа хызмет этти. Лякин падиша онен джынсий мунасебетте олмады.

Адонья тахткъа отурмагъа тырыша

5 ^cДавутнынъ Хаггит апайындан олгъан огълу Адонья макътанып: «Мен падиша оладжагъым», – дей эди. Озюне арабалар, атлылар ве огюнде чапкъан элли къаравул алды. 6 ^dБабасы исе: «Сен нечюн бойле шейлер япасынъ»? – деп, ич бир вакъыт огълуна акъыл огретмеди. Адонья пек дюльбер ве Авишаломдан сонъ догъгъан эди.

7 ^eАдонья, Церуя огълу Ёавнен ве руханий Авиатарнен меслеатлашты, ве олар онъа ярдым этти. 8 ^fЛякин руханий Цадокъ, Ехояда огълу Беная, Натан пейгъамбер, Шимий, Рей ве Давутнынъ батырлары Адоньянынъ тарафыны тутмадылар.

9 ^gАдонья, Эн-Рогель янындаки Зохелет ташы янында бир къач къой-эчки, бугъа ве семиз таналарны сойып, падишанынъ огъуллары олгъан эписи агъа-къардашларыны ве падишагъа хызмет эткен эписи Ехуда акъайларыны давет этти. 10 ^hЛякин Натан пейгъамберни, Бенаяны, анавы батырларыны ве къардашы Сулейманны давет этмеди.

Сулейман тахткъа отура

11О заман Натан Сулейманнынъ анасы Бат-Шевагъа:

– Хаггит огълу Адонья падиша олгъаны акъкъында эшиттинъми? Давут падиша-эфендилеримизнинъ исе бундан хабери ёкъ. 12Шимди санъа меним меслеатым: озь джанынъны ве огълунъ Сулейманнынъ джаныны къуртар. 13 ⁱБар, Давут падишагъа кир де, онъа бойле айт: «Сен, падиша-эфендилерим, манъа, къулунъа: “Сенинъ огълунъ Сулейман менден сонъ падиша оладжакъ ве тахтыма отураджакъ”, – деп, сёз бермеген эдинъми? Айса не ичюн шимди Адонья тахткъа отурды?» 14Сен анда падишанен даа лаф эткенде, мен сенинъ артынъдан кирип, сёзлеринъе къошулырым, – деди.

15Бат-Шева падишанынъ ятакъ одасына келип кирди. Падиша пек къарт эди. Шунамлы Авишагъ онъа хызмет эте эди. 16Бат-Шева падишанынъ огюнде эгилип селямлашты. Падиша ондан:

– Не ишинъ бар? – деп сорады. 17О:

– Эфендилерим! Сен манъа, къулунъа: «Сенинъ огълунъ Сулейман менден сонъ падиша оладжакъ ве тахтыма отураджакъ», – деп, РАББИ-Таалянънен ант этип, сёз бермеген эдинъми? 18Шимди исе, ана, Адонья тахткъа отурды. Сенинъ исе, падиша-эфендилерим, бу акъта хаберинъ ёкъ. 19О, бир талай бугъа, семиз тана ве къой-эчки сойып, падиша огъулларынынъ эписини давет этти, руханий Авиатарны да, орду башы Ёавны да давет этти. Къулунъ Сулейманны исе давет этмеди. 20Лякин сен, эфендим, падишасынъ. Озюнъден сонъ падишалыкъ тахтына кимни отуртаджакъ олгъансынъ, деп, эписи исраиллилер сенден беклеп отура. 21Ойле олмаса, падиша-эфендилерим баба-деделери кеткен ерге кеткенинден сонъ, мени ве огълум Сулейманны къабаатлайджакълар, – деди.

22О, даа айткъанда, Натан пейгъамбер кельди. 23Падишагъа:

– Натан пейгъамбер кельди, – дедилер. О, кирди ве ергедже эгилип падишанен селямлашты. 24Натан:

– Падиша-эфендилерим! Сен: «Адонья менден сонъ падишалыкъ япаджакъ ве менден сонъ тахтыма отураджакъ», – деген лаф айткъан эдинъми? 25 ^jО, шимди бир талай бугъа, тана, къой-эчки сойып, падиша огъулларынынынъ эписини, орду башлыкъларыны ве руханий Авиатарны давет этти. Олар шимди онынъ огюнде ашай-ичелер ве: «Яшасын Адонья падиша!» – дейлер. 26Мени, къулунъны, руханий Цадокъны, Ехояда огълу Бенаяны ве къулунъ Сулейманны исе давет этмеди. 27Бу шей падиша-эфендилеримнинъ эмири боюнджа япылмадымы? Не ичюн сен къулунъа падиша-эфендилеримден сонъ тахткъа ким отураджагъы акъкъында бир шей айтмадынъ? – деп сорады.

28Давут джевап берип:

– Манъа Бат-Шеваны чагъырынъыз, – деди. Бат-Шева келип, падишанынъ огюнде турды. 29 ^kДавут емин этип:

– Джанымны эр бир белядан къуртаргъан РАББИнен ант этем! 30Санъа Исраиль Алласы РАББИнен менден сонъ огълунъ Сулейман падишалыкъ япаджакъ деп, ант эттим. Эм о, менден сонъ меним ериме тахткъа отураджакъ. Буны бугунь япарым, – деди. 31 ^lБат-Шева падишагъа ергедже эгилип:

– Падиша-эфендилерим Давут даима яшасын! – деди. 32Давут падиша:

– Манъа руханий Цадокъны, Натан пейгъамберни, Ехояда огълу Бенаяны да чагъырынъыз, – деди.

Олар падишагъа кельдилер. 33 ^mПадиша оларгъа:

– Эфендилеринъизнинъ къулларыны алынъыз да, барып, огълум Сулейманны меним къатырыма отуртып, оны Гихонгъа алып кетинъиз. 34 ⁿАнда руханий Цадокъ ве Натан пейгъамбер оны ягънен сюртип, Исраильнинъ падишасы этсинлер ве борулар чалып: «Яшасын Сулейман падиша!» – деп, илян этсинлер. 35Сонъ онынъ пешинден барынъыз. О, келип, меним тахтыма отураджакъ, меним ериме падишалыкъ япаджакъ. Исраиль ве Ехуда ёлбашчылыгъыны япмагъа мен онъа буюрам, – деди.

36Ехояда огълу Беная падишагъа джевап берип:

– Эфендим падишанынъ Алласы олгъан РАББИ дегени киби олсун, амин! 37РАББИ падиша-эфендилеримнен берабер олгъаны киби, Сулейманнен берабер олсун, онынъ тахтыны эфендим Давут падишанынъ тахтындан да буюк япсын! – деди.

38 ^oСонъ руханий Цадокъ, Натан пейгъамбер ве Ехояда огълу Беная, керетлилер ве пелетлилер барып, Сулейманны Давут падишанынъ къатырына отуртып, оны Гихонгъа алып кеттилер. 39Руханий Цадокъ Корюшюв Чадырындан зейтюн ягъына толу бойнузны алып, Сулейманны ягълады. Сонъ бору чалдылар, ве бутюн халкъ: «Яшасын Сулейман падиша!» – деп къычырды. 40Бутюн халкъ онынъ артындан юрип, къавал чалып ойле къуванды ки, къычыргъанларындан тап ер ярылды.

41Адонья ве онынъ давет этильгенлери ашап-ичкенлеринден сонъ, буны эшиттилер. Ёав бору сесини эшитип:

– Шеэр нечюн о къадар шамата котерген экен? – деди. 42 ^pО, даа айткъанда, руханий Авиатарнынъ огълу Ехонатан кельди, ве Адонья:

– Кир, сен яхшы адамсынъ ве яхшы хабер кетиресинъ, – деди. 43Ехонатан Адоньягъа джевап берип:

– Эбет, эфендимиз Давут падиша Сулейманны падиша этип къойды. 44 ^qПадиша онен берабер руханий Цадокъны, Натан пейгъамберни, Ехояда огълу Бенаяны, керетлилер ве пелетлилерни йиберди. Олар оны падишанынъ къатырына отурттылар. 45Руханий Цадокъ ве Натан пейгъамбер оны Гихонда падишалыкъкъа ягънен сюрттилер. Андан къуванып кеттилер, шунынъ ичюн шеэрде шамата котерильди. Сизинъ эшиткенинъиз шудыр, – деди. 46 ^r– Бундан гъайры, Сулейман энди падиша тахтына отурды. 47 ^sДаа падишанынъ хызметчилери келип, эфендимиз Давут падишаны хайырладылар ве: «Сенинъ Алланъ Сулейманнынъ адыны сенден намлы япсын, онынъ тахтыны сенинъ тахтынъдан буюк этсин», – дедилер. Падиша ятагъындан эгилип селямлашты 48ве: «РАББИге, Исраильнинъ Алласына шукюрлер олсун! Бугунь О, бизге тахтымда отураджакъ падиша берди, манъа буны корьмеге къысмет этти!» – деди.

49Адоньянынъ мусафирлери буны эшитип, пек къоркътылар ве аман турып, озь ёлларынен кеттилер. 50 ^tАдонья исе Сулеймандан къоркъып, барып, къурбан ерининъ бойнузларына япышты. 51Сулеймангъа:

– Анавы Адонья Сулейман падишадан къоркъып, энди къурбан ерининъ бойнузларына япышкъан ве: «Сулейман падиша мени, къулуны, къылычнен ольдюрмейджегине сёз берсин», – айта, – деп хабер эттилер.

52 ^uСулейман:

– Эгер о яхшы адам олса, онынъ башындан бир дане сач биле тюшмез, эгер де яман олса, олер, – деди. 53Сонъ Сулейман оны къурбан еринден кетирмек ичюн адамларны ёллады. О, келип, Сулейман падишанынъ огюнде эгильди. Сулейман онъа:

– Бар, эвинъе къайт, – деди.