1Ki 10 | CrhCTB | STEP | Шева къыраличеси, Сулейман РАББИни насыл шуретлегенини эшитип, оны къыйын суаллернен сынамагъа кельди.

‏ 1 Kings 10

Шева къыраличеси

1 ^aШева къыраличеси, Сулейман РАББИни насыл шуретлегенини эшитип, оны къыйын суаллернен сынамагъа кельди. 2 ^bО, Ерусалимге буюктен буюк байлыкънен кельди: девелер гузель къокъулы шейлернен ве чокътан-чокъ алтын ве къыйметли ташларнен юклю эди. Сулеймангъа келип, онен юрегинде олгъан эр шей акъкъында субет этти. 3 Сулейман онынъ эр суалине джевап берди. Падиша эр шей акъкъында биле эди ве эр шейни Шевагъа анълатып ола эди. 4 Шева къыраличеси Сулейманнынъ акъылыны ве къургъан сарайыны, 5 софрасындаки емеклерини, къулларынынъ отургъан ерлерини, хызметкярларынынъ яхшы ишини, оларнынъ урбаларыны, ички дагъыткъан адамларыны, онынъ РАББИнинъ Сарайында бутюнлей янгъан къурбанларыны корьгенде, пек шашты ве:

6 – Мен яшагъан мемлекетимде сенинъ ишлеринъ ве икметинъ акъкъында эшиткенлерим догъру экен. 7 Амма мен озюм келип, озь козюмнен корьмегенимдже, бу шейлерге инанмай эдим. Энди корем ки, манъа ярысыны да айтмагъан экенлер, – деди. – Сенинъ икметинъ ве зенгинлигинъ мен эшиткенимден де чокъ экен! 8 Сенинъ адамларынъ бахтлыдыр! Сенинъ огюнъде даима тургъан ве акъыллы сёзлеринъни эшиткен хызметкярларынъ да бахтлыдыр! 9 ^cСенден разы олгъан, сени Исраиль тахтына отурткъан Алланъ олгъан РАББИге чокътан-чокъ шукюрлер олсун! Исраильге олгъан эбедий севгиси ичюн РАББИ сени укюмдарлыкъ этмек ве акъкъикъатны къорчаламакъ ичюн падиша этти!

10 Сонъ о, падишагъа 120 чувал ^{▼▼120 чувал – къ. еуд. «120 киккар».} алтын ве чокътан-чокъ гузель къокъулы шейлер ве къыйметли ташлар багъышлады. Шева къыраличеси Сулеймангъа багъышлагъан гузель къокъулы шейлернинъ микъдары ич бир вакъыт о къадар чокъ дегиль эди.

11 ^eШу вакъыт Офирден алтын кетирген Хирамнынъ гемилери Офирден чокътан-чокъ алмуг агъачы ве къыйметли ташлар кетирди. 12 Падиша бу алмуг агъачындан РАББИнинъ Сарайында ве озь эвинде таянчлар яптырды. Бундан гъайры, шу агъачтан чалгъыджылар ичюн сантыр ве арфа яптырды. Бу алмуг агъачы ич бир вакъыт кельмеген эди, ве бугуньгедже о корюльмеген эди.

13 Сулейман падиша Шева къыраличесине озь падиша бахшышындан гъайры, онъа даа сорагъанларынынъ ве истегенлерининъ эписини берди. Сонъ о ве онынъ хызметчилери озь мемлекетине къайттылар.

Сулейманнынъ зенгинлиги

14 Сулеймангъа эр бир йылда кельген алтын 666 чувал ^{▼▼666 чувал – къ. еуд. «666 киккар».} эди. 15 Бундан гъайры даа алыш-веришчилернинъ ве базиргянларнынъ саткъанлары, эписи Арабистан падишаларынынъ ве топракънынъ башлыкълары бергенлери де бар эди.

16 Сулейман падиша дёгюльген алтындан 200 балабан къалкъан яптырды. Эр бир къалкъангъа алты кило алтын ^{▼▼Алты кило алтын – къ. еуд. «600 (шекель) алтын».} кетти. 17 ^hДаа дёгюльген алтындан 300 кичкене къалкъан япты. Эр бирине бир бучукъ кило алтын ^{▼▼Бир бучукъ кило алтын – къ. еуд. «учь мане алтын».} кетти. Падиша оларны Ливан Орманы эвинде къойды.

18 Падиша фильтиштен балабан тахт яптырды ве оны темиз алтыннен къаплады. 19 Тахтнынъ алты басамагъы бар эди. Тахтнынъ артындаки тёпеси томалакъ эди. Отургъан ернинъ эки къолтугъы бар эди, эки къолтукънынъ янында бирер арслан япылгъан эди. 20 Алты басамакънынъ эки тарафындан он эки дане арслан япылгъан эди. Башкъа падишалыкъларда бу корюльмеген шей эди. 21 ^jСулейман падишанынъ эписи ичкен савутлары алтындан ясалгъан эди. Ливан Орманы эвиндеки савутлар да темиз алтындан ясалгъан эди. Кумюштен бир шей яптырылмагъан эди, чюнки Сулейманнынъ заманында кумюшнинъ ич бир къыймети ёкъ эди. 22 ^kПадишанынъ денъизде Таршиш гемилери ^{▼▼Таршиш гемилери – узун сеферге чыдагъан буюк гемилер.} ве Хирамнынъ гемилери бар эди. Таршиш гемилери учь йылда бир кере келип, алтын, кумюш, фильтиш, маймунларны ве тавус къушларыны кетире эдилер.

23 ^mСулейман падишанынъ зенгинлиги ве икмети ер юзюндеки эр бир падишанынъкисинден зияде олды. 24 ⁿЕр юзюндеки бутюн падишалар Сулейманнен корюшмек, онынъ юрегине Алла берген икметини динълемек истей эдилер. 25 Оларнынъ эр бири озюнден бахшышлар кетире эди. Эр йыл кумюш ве алтын савутлар, урбалар, силя, къокъулы шейлер, ат ве къатырлар кетире эдилер.

26 ^oСулейман озюне дженк арабалары ве атлылар топлады. Онынъ 1 400 дженк арабасы ве 12 000 атлы аскери бар эди. О, оларны дженк арабалары олгъан шеэрлеринде ве Ерусалимде, падишанынъ янында ерлештирди. 27 Падиша Ерусалимде кумюшни адий таш ерине сайдырды, кедрлерни исе чокълугъы ичюн Шефелада оськен инджир тереклеринен тенъ этти. 28 ^pАтларны Сулеймангъа Мысыр ве Кеведен кетире эдилер. Падишанынъ алыш-веришчилери бу атларны Кеведен парагъа сатын ала эдилер. 29 Мысырдан кетирильген дженк арабасы 600 кумюш тура эди. Бир ат исе 150 кумюш ^{▼▼600 кумюш; 150 кумюш – къ. еуд. «600 (шекель) кумюш», «150 (шекель) кумюш».} тура эди. Буларны алыш-веришчилер озь къолларынен хитлилернинъ ве арамлыларнынъ эписи падишаларына да кетире эдилер.