1Ki 19 | CrhCTB | STEP | Ахав Изевельге Ильяснынъ эписи япкъанларыны ве эписи пейгъамберлерни къылычнен ольдюргенини айтып берди.

‏ 1 Kings 19

Ильяс Хорев дагъында

1 Ахав Изевельге Ильяснынъ эписи япкъанларыны ве эписи пейгъамберлерни къылычнен ольдюргенини айтып берди. 2 Изевель Ильяскъа бир хаберджи ёллап:

– Эгер мен ярын мына шу вакъыткъа къадар пейгъамберлернинъ джанларыны алгъанынъ киби, джанынъны алмасам, аллаларым бойнумны урсун, мени пек къатты джезаласынлар! – деди.

3 ^aИльяс къоркъып, джаныны къуртармакъ ичюн, аман кетти ве Ехуда ерлериндеки Беэр-Шевагъа кельди. Анда о, яш къулуны къалдырды. 4 ^bОзю исе бир куньлюк узакълыгъында сахрагъа кетип, анда арча тюбюнде отурды ве озюне олюм сорап:

– Етер, я РАББИ! Джанымны ал. Мен баба-деделеримден яхшы дегилим, – деди.

5 Сонъ арча тюбюнде ятып юкълап къалды. Бир мелек онъа тийип:

– Тур, аш аша, – деди.

6 Ильяс бакъса, не корьсюн: башы уджунда къор устюнде бир пите ве бир гугюм сув турмакъта. О, ашады-ичти, сонъ кене юкълап къалды. 7 Алланынъ Мелеги экинджи кере къайтып, кене онъа тийди ве:

– Тур, аш аша, олмаса узакъ ёлгъа чыдап оламазсынъ, – деди. 8 ^cИльяс турып, ашады-ичти ве шу аштан такъат алып, 40 кунь ве 40 гедже кетип, Алланынъ дагъы олгъан Хоревге кельди. 9 Анда къобагъа кирип, онда геджеледи. Апансыздан РАББИ Ильяскъа деди:

– Ильяс, мында не япасынъ?

10 ^dИльяс:

– Мен РАББИ, Ордуларнынъ Алласы ичюн пек къасеветлендим. Исраиль огъуллары Сенинъ васиетинъни къалдырып, къурбан ерлеринъни къырдылар, пейгъамберлеринъни къылычнен ольдюрдилер. Бир мен къалдым, мени де ольдюрмеге истейлер, – деди. 11 ^eРАББИ онъа:

– Чыкъ, РАББИнинъ огюнде дагъда тур. Сонъ РАББИ кечеджек, – деди.

РАББИнинъ огюнде буюк ве кучьлю, дагъларны парчалайджакъ ве къаяларны йыкъаджакъ ель эсти. Лякин РАББИ бу ельнинъ ичинде дегиль эди. Ельден сонъ ер тепренип башлады, лякин РАББИ зельзеленинъ ичинде дегиль эди. 12 ^fЗельзеледен сонъ атеш пейда олды, лякин РАББИ атешнинъ ичинде дегиль эди. Атештен сонъ эшитилир-эшительмез фысылты эшитильди. 13 Шуны эшитип, Ильяс урбасынен бетини сюртти ве чыкъып, къобанынъ агъзы янында турды. Шу вакъыт бир сес ондан:

– Ильяс, мында не япасынъ? – деп сорады. 14 ^gИльяс джевап къайтарып:

– Мен РАББИ, Ордуларнынъ Алласы ичюн пек къасеветлендим, чюнки Исраиль огъуллары Сенинъ васиетинъни къалдырып, къурбан ерлеринъни боздылар, пейгъамберлеринъни къылычнен ольдюрдилер. Бир мен къалдым, мени де ольдюрмеге истейлер, – деди.

15 ^hРАББИ онъа:

– Бар, кельген ёлунънен Дамаск сахрасына кет. Анда келип, Хазаэлни ягънен сюртип, Арамнынъ падишасы эт. 16 ⁱНимший огълу Ехуны исе Исраиль падишалыгъына ягънен сюрт. Авел-Мехола шеэринден олгъан Шафат огълу Эль-Ясаны озюнънинъ еринъе пейгъамберликке ягънен сюрт. 17 ^jХазаэлнинъ къылычындан ким къачса, оны Еху ольдюрир. Ехунынъ къылычындан бир кимсе къуртулса, оны Эль-Яса ольдюрир. 18 ^kАмма Мен исраиллилернинъ арасында Баалгъа тиз чёкмеген ве онынъ путуны опьмеген 7 000 киши сакъладым, – деди.

Рабби Эль-Ясаны чагъыра

19 Ильяс андан кетип, Шафат огълу Эль-Ясаны тапты. Эль-Яса о вакъыт он эки чифт бугъасынен топракъ сюре эди. О, он экинджи чифтининъ янында эди. Ильяс Эль-Ясанынъ янындан кечеяткъанда, онынъ устюне озь урбасыны атты. 20 ^lЭль-Яса бугъаларыны къалдырып, Ильяснынъ пешинден чапты ве онъа:

– Манъа анам-бабамны опьмеге рухсет бер, сонъ сенинъ пешинъден кетерим, – деди.

– Айды, бар, сонъ артынъа къайтып келирсинъ. Меним япкъанымны анълайсынъмы? – деп джевап берди Ильяс.

21 ^mЭль-Яса кетип, эки бугъаны алып сойды, чифт бугъанынъ этини къавурды, адамларгъа даркъатты. Олар ашадылар. Озю исе турып кетти ве Ильяскъа хызмет этип башлады.