1Ki 22 | CrhCTB | STEP | Учь йыл девамында Арам ве Исраиль арасында дженк олмады.

‏ 1 Kings 22

Микъая пейгъамбер ве Ахав падиша

1 Учь йыл девамында Арам ве Исраиль арасында дженк олмады. 2 ^aУчюнджи йылы Ехуда падишасы Ехошафат Исраиль падишасына кельди. 3 ^bИсраиль падишасы хызметчилерине:

– Рамот-Гилад бизимки олгъанындан хаберинъиз бармы? Биз исе не къадар вакъыттан берли индемеймиз, оны Арам падишасы къолундан тартып алмаймыз, – деди.

4 ^cСонъ Ехошафаттан:

– Меннен Рамот-Гиладгъа къаршы дженкке чыкъаджакъсынъмы? – деп сорады. Ехошафат Исраиль падишасына джевап берип:

– Эбет, озюм де, адамларым да, атларым да сенинъ ордунъа къошулмагъа азырмыз, – деди.

5 Сонъ Ехошафат Исраиль падишасына:

– Лякин башта РАББИден сора, – деди.

6 ^dИсраиль падишасы 400-ге якъын пейгъамберни топлап, олардан:

– Рамот-Гиладгъа къаршы дженкке кетейимми я да кетмейимми? – деп сорады. Олар:

– Кет. Рабби оны падишанынъ къолуна береджек, – дедилер.

7 ^eЕхошафат кене:

– Мында даа бир РАББИнинъ пейгъамбери ёкъмы экен? Ондан сорасакъ, – деди. 8 Исраиль падишасы Ехошафаткъа:

– Бар бир адам, ондан РАББИни сорамакъ мумкюн. Лякин меним оны кореджек козюм ёкъ, чюнки о, меним акъкъымда яхшы шей айтмай, тек ярамай хаберлер кетире. Онынъ ады Микъая, Йимланынъ огълу, – деди. Ехошафат онъа:

– Падиша ойле демесин, – деди.

9 Сонъ Исраиль падишасы бир везирини чагъырып, онъа:

– Бар, Йимла огълу Микъаяны тез-тез алып кель, – деди.

10 Исраиль падишасы ве Ехуда падишасы Ехошафат, падиша урбаларыны кийип, озь тахтларында, арман янында, Самариенинъ араба къапусы огюнде отура эдилер. Пейгъамберлер исе оларнынъ огюнде пейгъамберлик эте эдилер. 11 ^fКенаананынъ огълу Цидкия озюне демир бойнузлар япты ве:

– РАББИ бойле дей: «Шу бойнузларнен арамлыларны ёкъ эткендже тюртеджексинъ», – деди.

12 Къалгъан пейгъамберлер де ойле пейгъамберлик эте эдилер:

– Бар, Рамот-Гиладгъа уджюм эт. Гъалебе къазанаджакъсынъ. РАББИ шу шеэрни падишанынъ къолуна береджек.

13 Микъаянынъ артындан йиберильген хаберджи онъа:

– Мына, бутюн пейгъамберлер бир агъыздан падишагъа яхшы шейлер айталар. Сенинъ сёзлеринъ де оларнынъ айткъанларынен бир кельсин. Сен де яхшы шейлер айт, – деди. 14 ^gМикъая исе:

– Тири РАББИнен ант этем! РАББИ манъа айткъаныны айтаджагъым, – деди.

15 О, падишагъа кельди. Падиша ондан:

– Микъая! Рамот-Гиладгъа къаршы дженкке чыкъайыкъмы, ёкъмы? – деп сорады. Микъая онъа джевап къайтарып:

– Бар, Рамот-Гиладгъа уджюм эт. Гъалебе къазанаджакъсынъ. РАББИ шу шеэрни падишанынъ къолуна береджек, – деди.

16 Падиша кене онъа:

– Даа къач кере мен сени, РАББИнинъ Ады ичюн, манъа тек догърусыны айтмагъа ант этмеге меджбур этеджегим? – деди. 17 ^hО исе:

– Чобансыз къалгъан къой-эчки сюрюси киби дагъларгъа дагъылгъан исраиллилерни корем. РАББИ дей: «Оларнынъ башлыгъы ёкъ, эр кес эвине эсен-аман къайтсын», – деди.

18 Исраиль падишасы Ехошафаткъа:

– О манъа тек ярамай пейгъамберлик эте, яхшы пейгъамберлик этмей, демеген эдимми? – деди.

19 ⁱМикъая джевап берип:

– РАББИнинъ сёзлерини динъле! Мен Озь тахтында отургъан РАББИни корьдим. Бутюн коклернинъ ордусы Онынъ сагъ ве сол тарафында турмакъта эди. 20 РАББИ: «Рамот-Гиладгъа кетсин де, анда эляк олсун деп, ким Ахавны къандыраджакъ?» – деди. Бириси бир шей деди, башкъасы башкъа шей деди. 21 Сонъ бир рух чыкъып, РАББИнинъ огюнде турды ве: «Мен оны къандыраджагъым», – деди. РАББИ ондан: «Насыл?» – деп сорады. 22 О исе: «Мен барып, онынъ эписи пейгъамберлерининъ агъызларында яланджы рух олурым», – деди. РАББИ шу рухкъа: «Къандыр оны ве ишинъни беджер. Бар да, бойле де яп», – деди. 23 ^jМына, энди РАББИ сенинъ эписи пейгъамберлеринънинъ агъызларына яланджы рухны къойды. Лякин РАББИ сен ичюн къаза-беля азырлады, – деди.

24 Бундан сонъ Кенаананынъ огълу Цидкия Микъаягъа якъынлашып, онынъ янагъына яндырып:

– Менден чыкъып, РАББИнинъ Руху насыл этип, санъа кельди? – деди.

25 ^kМикъая онъа:

– Корерсинъ сен. Сакъланайым деп, ичери одагъа кирип юрген куню корерсинъ, – деди.

26 Исраиль падишасы:

– Микъаяны алынъыз да, шеэр башлыгъы Амонгъа ве падишанынъ огълу Ёашкъа алып кетинъиз. 27 ^lАнда айтынъыз: «Падиша бойле деди: “Мынавны алынъыз да, оны зиндангъа атынъыз. Мен аман-эсен къайтып кельмегендже, онъа азачыкъ сув ве отьмектен башкъа бир шей берменъиз”», – деди.

28 ^mМикъая исе:

– Эгер аман-эсен къайтып кельсенъ, демек, РАББИ менден айтмады! Бутюн халкъ, буны эшитинъиз! – деди.

Ахавнынъ олюми

29 Сонъ Исраиль падишасы Ехуда падишасы Ехошафатнен берабер Рамот-Гиладгъа къаршы чыкътылар. 30 ⁿИсраиль падишасы Ехошафаткъа:

– Мени танымасынлар деп, мен адий бир урба кийип, дженкке киришейим, сен исе падиша урбаларынъны кий, – деди. Сонъ Исраиль падишасы, оны танымасынлар деп, адий урба кийди ве дженкке киришти.

31 Арам падишасы исе озюнинъ 32 дженк арабалары башлыкъларына шойле эмир этти:

– Исраиль падишасындан башкъа, буюк олсун, кучюк олсун, кимсенен дженклешменъиз.

32 Дженк арабаларынынъ башлыкълары Ехошафатны корип: «Керчектен де, бу Исраиль падишасы», – деп, онен дженклешмек ичюн, арабаларыны чевирдилер. Ехошафат къычырмагъа башлады. 33 Арабаларнынъ башлыкълары, онынъ Исраиль падишасы олмагъаныны анълап, онынъ артындан айландылар.

34 ^oБир аскер, тийсе-тиер, тиймесе-тиймез, деп, яйындан бир окъ атып, Исраиль падишасыны зырхы къошулгъан бир ерден яралады. Падиша озь арабаджысына:

– Арабаны артына айландыр да, мени дженк мейданындан чыкъар, чюнки яраландым, – деди.

35 Шу куню дженк пек шиддетли олды. Падиша арамлыларнынъ къаршысында арабасында тура эди, акъшам исе ольди. Ярасындан акъкъан къан арабасына акъты.

36 Кунеш баткъан вакътында бутюн ордугъа:

– Эр кес озь шеэрине, озь ерлерине къайтсын! – къычырып беян этильди.

37 Падиша ольди. Оны Самариеге кетирдилер ве анда дефн эттилер. 38 ^pАрабасыны исе Самарие хавузында ювдылар. Ороспулар ювунгъан ерде копеклер падишанынъ къаныны ялады. Эр шей РАББИнинъ дегени киби олды.

39 ^qАхавнынъ башкъа ишлери ве онынъ эписи япкъанлары, фильтиштен къургъан эви, онынъ къургъан шеэрлери акъкъында Исраиль падишаларынынъ тарихы китабында язылгъандыр. 40 Ахав баба-деделерине къошулды. Онынъ ерине огълу Ахазья тахткъа отурды.

Ехуданынъ падишасы Ехошафат

41 ^rИсраиль падишасы Ахав падишалыгъынынъ дёртюнджи йылында, Асанынъ огълу Ехошафат Ехуданынъ падишасы олды. 42 Ехошафат падиша олгъанда, 35 яшында эди. Ерусалимде 25 йыл падишалыкъ этти. Онынъ анасы Азува, Шилхийнинъ къызы эди. 43 ^sЕхошафат, бабасы Асанынъ эписи ёлларындан юрип, олардан чекинмеди, РАББИнинъ огюнде догъру ишлер япты. Лякин ибадет тёпелери ёкъ этильмеди, халкъ ибадет тёпелеринде къурбанлар чалмагъа ве къокъулы отлар якъмагъа девам этти.

44 ^tЕхошафат Исраиль падишасынен муаббет яшады.

45 Ехошафатнынъ башкъа ишлери ве онынъ къараманлыкълары ве дженклешкени Ехуда падишаларынынъ тарихы китабында язылгъандыр. 46 ^uЕхошафат, бабасы Асанынъ кунюнден къалгъан эркек путхане ороспуларны топракътан ёкъ этти.

47 ^vО вакъыт Эдом топрагъында падиша ёкъ эди. Онынъ ерине падиша вазифесини беджерген бир адам къоюлды.

48 ^wЕхошафат Офирге алтын алмагъа кетмек ичюн, денъизде Таршиш гемилери яптырды, лякин олар анда келип етиштирмеди, Эцион-Геверде парчаландылар. 49 Бундан сонъ Ахавнынъ огълу Ахазья Ехошафаткъа:

– Меним хызметчилерим сенинъ хызметчилеринънен берабер гемилерде юрсюн, – деди.

Лякин Ехошафат разы олмады.

50 Ехошафат баба-деделерине къошулды ве бабаларынынъ дюрбесинде, бабасы Давут Шеэринде дефн этильди. Онынъ ерине огълу Ехорам падиша олды.

Исраильнинъ падишасы Ахазья

51 Ехуда падишасы Ехошафат падишалыгъынынъ 17-нджи йылында Ахавнынъ огълу Ахазья Самариеде Исраильнинъ падишасы олды. О, Исраильге эки йыл девамында падишалыкъ этти. 52 О, РАББИнинъ огюнде ярамай шейлер япып, ана-бабасынынъ ёлларынен ве бутюн Исраильни гуналаргъа батыргъан, Неват огълу Еровоамнынъ ёлларынен юрди. 53 О, Баалгъа табынып, онъа ибадет этти. Бабасы япкъан эписи ярамай ишлерни япып, Исраильнинъ Алласы олгъан РАББИни ачувландырды.