‏ 1 Kings 4

Сулейманнынъ янында олгъан ёлбашчылар

1Сулейман падиша бутюн Исраильге падишалыкъ япты. 2 ^aМына онынъ башлыкълары: Цадокъ огълу Азарья – руханий; 3 ^bШиша огъуллары Элихореф ве Ахия – кятиплер; Ахилуд огълу Ехошафат – тарихчы; 4 ^cЕхояда огълу Беная – орду башлыгъы; Цадокъ ве Авиатар – руханийлер; 5 ^dНатан огълу Азарья – виляет башлыкъларынынъ башы; Натан огълу Завуд – руханий ве падишанынъ меслеатчысы; 6 ^eАхишар – падиша эвининъ башлыгъы ве Авда огълу Адонирам – зорлап чалыштырылгъан ишчилернинъ башлыгъы эди.

7Сулейманнынъ бутюн Исраильге къойгъан виляет башлыкълары он эки киши эди. Олар падишаны ве онынъ бутюн эвини ашнен теминлей эдилер. Эр бири йылнынъ бир айыны ашнен теминлей эди. 8Мына оларнынъ адлары: Бен-Хур – Эфраим дагъында; 9Бен-Декер – Макъац, Шаалвим, Бет-Шемеш ве Элон-Бет-Ханан шеэринде; 10Бен-Хесед – Арубботта (онынъ къолунда даа Сокъо ве бутюн Хефер шеэри эди); 11 ^fБен-Авинадав – бутюн Нафат-Дор шеэринде (онынъ къадыны Сулейманнынъ къызы Тафат эди); 12 ^gАхилуд огълу Баана – Таанакъ, Мегиддо ве Йизреэлден ашагъы яткъан, Царетан якъынларындаки Бет-Шеан ерлеринде, Бет-Шеандан Авел-Мехолагъа къадар, Ёкъмеамнынъ башкъа тарафына къадар биле; 13 ^hБен-Гевер – Рамот-Гилад шеэринде (Гилад шеэринде Менашше огълу Яирнинъ койлери онынъ къолунда эди; бундан гъайры, Башандаки Аргов виляети ве алтмыш буюк, диварларнен къоралангъан ве бакъыр килитлернен килитленген шеэрлер де онынъ къолунда эди); 14Иддо огълу Ахинадав – Маханаим шеэринде; 15Ахимаац – Нафталий еринде (о озюне къадын оларакъ Сулейманнынъ къызы Басематны алды); 16Хушай огълу Баана – Ашер топрагъында ве Беалот шеэринде; 17Паруах огълу Ехошафат – Йиссакъар топрагъында; 18Эла огълу Шимий – Биньямин топрагъында; 19 ⁱУрий огълу Гевер – Гилад топрагъында (аморлыларнынъ падишасы Сихоннынъ топрагъында ве Башан падишасы Огнынъ топрагъында) эди. Бу топракъта о, бирден-бир башлыкъ эди.

Сулейманнынъ заманындаки парлакъ яшайыш

20 ^jДенъиз ялысындаки къум киби чокълашкъан Ехуда ве Исраиль адамлары ашай-иче ве шенълене эди.

21 ^kСулейман Фират дерьясындан башлап Фелестин топракъларына къадар, тап Мысыр сынъырларына къадар джайрагъан эписи падишалыкъларда укюмдарлыкъ япа эди. Бу мемлекетлер Сулейманнынъ бутюн омрю девамында онъа бахшышлар кетире ве хызмет эте эдилер.

22Сулейман ве софрасында ашагъанларнынъ бир куньлюк ашы бу къадар эди: 150 чувал энъ яхшы богъдай уну, 300 чувал ▼

▼150 чувал; 300 чувал – къ. еуд. «30 кор», «60 кор».

башкъа ун, 23он баш семиз тувар, яйладан кетирильген 20 баш тувар, 100 къой-эчки, сыгъынлар, ала кийиклер, гъазеллер ве семиртильген къушлар. 24 ^mСулейман Тифсахтан Гъазагъа къадар, Фират дерьясынынъ гъарп тарафындаки бутюн топракъларгъа ве озеннинъ гъарп тарафындаки эписи падишаларгъа укюмдарлыкъ япа эди. Эписи къомшу мемлекетлернен тынч-муаббет яшай эди. 25 ⁿДандан Беэр-Шевагъа къадар, Сулейман укюмдарлыгъынынъ девамында, Ехуда ве Исраиль топракъларында эр бир адам озь юзюм багъчасы ичинде ве озь инджири тюбюнде бир шейден къоркъмайып яшады.

26 ^oСулейманнынъ арабалары ичюн 40 000 аты ве 12 000 атлысы бар эди.

27Эр ай виляет башлыкъларынынъ бири Сулейман падишагъа ве онынъ софрасына кельген эписи адамларгъа эр бир керек олгъан шейни кетире эди. Етишмеген шейи ёкъ эди. 28Бундан гъайры олар атларгъа ве джуйрюклерге арпа ве тобан кетире эдилер. Эр бири кетиреджек нормасыны бельгиленген ерге кетирип къоя эди. 29Алла Сулеймангъа икмет ве пек чокъ анълайыш, денъиз ялысындаки къум киби чокъ акъыл берди. 30 ^pСулейманнынъ икмети шаркъта яшагъан адамларнынъ икметинден зияде ве Мысырда олгъан бутюн икметинден зияде эди. 31 ^qСулейман эписи адамлардан, эзрахлы Этандан да, Махол огъуллары Хеман, Къалкъол ве Дардадан да акъыллы эди. Бутюн къомшу халкъларда онынъ ады намлы эди. 32 ^rО, 3 000 дане икяе айтып берди, тюркюлери исе 1 005 дане эди. 33О, тереклер акъкъында, Ливанда оськен кедр терегинден башлап, диварлардан оськен эзов отунадже айта эди, айванлар ве къушлар акъкъында, сюйрелип юрген махлюкълар ве балыкълар акъкъында айта эди. 34 ^sСулейманнынъ икметли сёзлерини эшитмек ичюн, эписи миллетлерден онынъ икмети акъкъында эшиткен дюньядаки эписи падишалардан адамлар келе эдилер.