1Ki 5 | CrhCTB | STEP | Сулейманны зейтюн ягъынен ягълап, бабасынынъ ерине падиша эткенлери акъкъында эшитип, Тирнинъ падишасы Хирам онъа хызметкярларыны ёллады. Хирам бутюн омюр Давутнынъ якъын досту эди.

‏ 1 Kings 5

Сулейман Раббининъ Сарайыны къурмагъа азырлана

1 ^aСулейманны зейтюн ягъынен ягълап, бабасынынъ ерине падиша эткенлери акъкъында эшитип, Тирнинъ падишасы Хирам онъа хызметкярларыны ёллады. Хирам бутюн омюр Давутнынъ якъын досту эди. 2 Сулейман Хирамгъа бойле айтсынлар деп, адамларны ёллады:

3 ^b«Билесинъ ки, меним бабам Давут къомшу халкъларнен дженк эткени себебинден, РАББИ шу халкъларны онынъ аягъы тюбюне серильтмегендже, РАББИ олгъан Алласына Сарай къурып оламады. 4 ^cШимди исе РАББИ-Таалям манъа эр тарафтан тынчлыкъ берди: душманларым да ёкъ, къаза-белялар да ёкъ. 5 ^dРАББИ бабам Давуткъа айтты: “Сенинъ огълунъ, сенинъ еринъе тахтынъа Мен отуртаджакъ огълунъ Меним Намыма Сарай къураджакъ”. Бунынъ ичюн мен РАББИге, меним Аллама Сарай къурмагъа ниетлендим. 6 Сен мен ичюн Ливандан кедр тереклерини кесмеге эмир эт. Меним къулларым сенинъ къулларынънен берабер чалышаджакълар. Сенинъ къулларынъ ичюн не къадар сорасанъ, кира парасыны береджегим. Сен билесинъ ки, бизде сидонлылар киби терек кесмеге бильгенлер ёкъ».

7 Хирам, Сулейманнынъ хаберини эшитип, пек къуванды ве:

– Шу чокътан-чокъ олгъан миллетке укюмдарлыкъ этмек ичюн Давуткъа акъыллы огъул берген РАББИге бугунь шукюрлер олсун! – деди 8 ве Сулеймангъа бойле джевап йиберди: – Манъа не ичюн йибергенинъни эшиттим ве кедрнен кипарис тереклери акъкъындаки эписи истеклеринъни ерине кетиририм. 9 Къулларым оларны Ливандан Акъ денъиз ялысына алып келирлер, сонъ мен оларны бири-бирлерине багълап, денъизден сен манъа бельгилеген ерге кетиртирим, о ерде дагъыттырырым, ве сен оларны алырсынъ. Амма сен де меним истегимни яп: меним эвиме аш кетирт.

10 Хирам Сулеймангъа, истегине коре, кедр тереги ве кипарис тереги берди. 11 Сулейман исе Хирамнынъ эвине аш оларакъ 100 000 чувал богъдай ве 100 чапчакъ ^{▼▼100 000 чувал; 100 чапчакъ – къ. еуд. «20 000 кор», «20 кор».} темиз зейтюн ягъыны берди. Бу къадар Сулейман Хирамгъа эр йыл бере эди.

12 ^fРАББИ Сулеймангъа айткъаны киби, икмет берди. Сулейман ве Хирам, бири-биринен тынч-муаббет яшадылар ве экевлешип анълашма тиздилер.

13 ^gСулейман падиша эписи исраиллилерни чалышмагъа меджбур этти. Чагъырылгъан адамларнынъ сайысы 30 000 адам эди. 14 ^hОлар, айда он бинъер киши Ливангъа невбетнен ёллана эдилер. Бир ай олар Ливанда ола эдилер, эки ай исе эвлеринде. Адонирам оларнынъ башлыгъы эди. 15 Сулейманнынъ даа 70 000 юк ташыгъан ве 80 000 дагъларда таш кескен адамы бар эди. 16 Булардан гъайры, Сулейман ишке 3 300 башлыкъ къойды. Олар чалышкъан адамларнынъ ишини бакъа эдилер. 17 ⁱПадиша эвнинъ темелини къоймакъ ичюн, буюк паалы ташлар кесип кетирмеге эмир этти, 18 ^jве Сулейманнынъ ве Хирамнынъ къуруджыларынен гиваллылар ташларны кести, Сарайнынъ къурулышына агъач ве ташларны да азырладылар.