‏ 1 Samuel 19

Шаул Давутнынъ артындан къувалай

1Бир кунь Шаул, огълу Ёнатангъа ве хызметчилерине Давутны ольдюрмеге эмир этти. Лякин Шаулнынъ огълу Ёнатан Давутны пек севе эди. 2Шунынъ ичюн о, Давуткъа:

– Меним бабам Шаул сенинъ олюминъни къыдыра. Ярын сакът ол, гизли бир ерге сакълан да, отур, – деп хабер этти. 3– Мен исе бабамнен берабер сен сакълангъан тарлагъа чыкъарым, сенинъ акъкъынъда бабама айтарым ве не бильсем, санъа айтып берерим, – деди.

4Ёнатан Шаулгъа Давутны макътады ве:

– Падишам къулу Давуткъа къаршы гуна ишлемесин. О, санъа къаршы бир шей япмады, ве онынъ япкъан ишлери санъа чокъ файда кетирди. 5 ^aО, фелестинлилерни енъмек ичюн, озь джаныны аямады, ве РАББИ бутюн Исраильге буюк къуртулыш багъышлады. Сен буны корип, къувана эдинъ. Шимди исе не ичюн къабаатсыз къанны тёкип, гуна ишлеп, Давутны себепсиз ольдюрмек истейсинъ я? – деди. 6Шаул Ёнатаннынъ сёзлерини динъледи ве:

– Тири Алланен ант этем! Давут ольмез, – деди.

7Сонъ Ёнатан Давутны чагъырды ве Шаулнынъ сёзлерини онъа айтып берди. Давутны Шаулнынъ огюне кетирди, ве Давут эвеллери киби онынъ янында олды.

8Кене дженк башлады, ве Давут чыкъып, фелестинлилернен урушты. Оларны буюк магълюбиетке огъратты, ве фелестинлилер ондан къачып кеттилер.

9 ^bШаул эвинде отургъанда, Алла онъа кене яман рухны йиберди. Шаулнынъ къолунда сюнгю бар эди. Давут исе чалгъы алетини чала эди. 10Шаул Давутны мызракънен диваргъа мыхлайджакъ олды, лякин Давут чекильди ве мызракъ диваргъа сапланды. Шу геджеси Давут къачып къуртулды. 11 ^cШаул озь хызметчилерини Давутнынъ эвине, оны беклеп сабагъадже ольдюрсинлер деп, ёллады. Давутнынъ къадыны Микъал Давуткъа:

– Эгер бу гедже джанынъны къуртармасанъ, ярын сени ольдюрирлер, – деди.

12 ^dДавутны пенджереден чыкъарды, ве о, къачып къуртарылды. 13Микъал исе бир пут алып, оны тёшекке къойды, башы уджуна эчки терисини къойды ве кийимлернен къапатты. 14Шаул хызметчилерини Давутны якъаламагъа йиберди, лякин Микъал:

– О хаста, – деди. 15Шаул хызметчилерине:

– Давутны бакъынъыз, оны манъа ольдюрмек ичюн тёшегинен берабер кетиринъиз, – деди. 16Хызметчилер келип бакъса, не корьсюнлер: тёшекте пут, башы уджунда исе эчки териси. 17О заман Шаул Микъалгъа:

– Не ичюн мени алдаттынъ, душманымны къачсын деп, не ичюн йибердинъ? – деди. Микъал исе:

– О манъа: «Мени йибермесенъ, сени ольдюририм», – деди, – деп айтты.

18 ^eДавут къачып къуртулды ве Рамагъа, Смаилнинъ янына кельди. Онъа Шаулнынъ эр бир эткен ишлери акъкъында айтып берди. Олар Смаилнен берабер ёлгъа чыкътылар ве Найотта токътадылар.

19Шаулгъа:

– Давут Рамада, Найотта, – деп еткиздилер. 20 ^fШаул хызметчилерини Давутны якъаламагъа йиберди, олар исе Алланынъ шейлерини анълаткъан пейгъамберлерни ве оларнынъ башлыгъы олгъан Смаилни корьдилер. Алланынъ Руху Шаулнынъ хызметчилерине де энди, олар да Алланынъ шейлерини анълатып башладылар.

21Буны Шаулгъа еткиздилер, ве о, башкъа хаберджилерини йиберди. Лякин олар да пейгъамберлик япып башладылар. Сонъ Шаул учюнджи кере хаберджилерини йиберди. Булар да пейгъамберлик япып башладылар. 22Сонъ Шаул озю Рамагъа кетти. Секъудаки буюк къуюгъа къадар кельди ве:

– Смаил ве Давут къайдалар? – деп сорады. Онъа:

– Мына, Рамада, Найотта, – дедилер.

23 ^gШаул анда, Рамадаки Найоткъа кетти. Онъа да Алланынъ Руху энди, ве о, Рамадаки Найоткъа кельгендже ёл бою пейгъамберлик япты. 24 ^hСонъ урбаларыны чыкъарып, Смаил огюнде пейгъамберлик япты, бутюн кунь ве геджеси чыплакъ ятты. Шунынъ ичюн: «Шаул да пейгъамберлерденми?» деген айтым пейда олды.