‏ 1 Samuel 2

Ханнанынъ дувасы

1 ^aХанна дува окъуп, бойле деди:

– Сен, РАББИ, манъа къуванч бересинъ,
къуветим Сенден келе!
Душманларымнынъ устюнден кулем –
Сен мени олардан къуртардынъ!
2 ^bРАББИден башкъа мукъаддес ёкъ,
Сенден башкъасы ёкъ!
Алламыз киби къавий таянч ёкъ!
3Кибирли лафларны этменъиз,
агъзынъыздан къопал сёзлер чыкъмасын.
Алла – эр шейни бильген РАББИ,
эр бир япкъан шейнинъ къыйметини кесе!
4 ^cРАББИ, Сен къараманларнынъ яйларыны сындырасынъ,
сюрюнгенлерге исе такъат бересинъ.
5 ^dТокъ олгъанлар отьмек ичюн чалыша,
ач олгъанлар исе раатлана.
Баласыз къадын еди бала тапа,
баласы чокъ олгъан къадын исе баласыз къала.
6 ^eСен, РАББИ, эм джан бересинъ, эм джан аласынъ,
адамларны о бир дюньягъа тюшюресинъ ве коклерге котересинъ.
7 ^fСен фукъаре япасынъ да, зенгинлик бересинъ,
ашалайсынъ да, юксельтесинъ.
8 ^gЙыкъылгъанны топракъ тозундан котересинъ,
чулсузны чёплюк арасындан чыкъарасынъ,
оларны мырзаларнынъ янында отуртасынъ,
оларгъа шуретли тахтны мирас оларакъ бересинъ.
Ернинъ темелини Сен, РАББИ, къойдынъ,
онынъ устюнде дюньяны ерлештирдинъ.
9 ^hСанъа иман эткенлерни догъру ёлда тутасынъ,
имансызлар исе къаранлыкъ ичинде гъайып олалар.
Инсан озь къудретинен гъалебе къазаналмаз.
10 ⁱРАББИ Онъа къаршы чыкъкъанларны ер юзюнден силир,
оларгъа коклерден РАББИнинъ гудюрдиси энер.
РАББИ бутюн дюньяны суд этер.
Озю къойгъан падишасына кучь берер,
Озю сайлагъан Месихни къуветнен пекитип, шуретлер.

11Сонъ Элкъана Рамагъа, эвине кетти. Бала исе руханий Элийнинъ янында РАББИге ибадет этмек ичюн къалды.

Элийнинъ огъуллары япкъан гунасы

12 ^jЭлийнинъ огъуллары ярамай адамлар эди, РАББИни урьмет этмей, 13халкъ огюнде озь руханий борджларыны беджермей эдилер. Бир кимсе къурбан чалып эт пишеяткъанда, руханийнинъ хызметчиси элине учь тишли вилка алып келе, 14оны тавагъа, я да къазангъа, я да башкъа бир савуткъа батыра. Вилкагъа не илишсе, шуны руханий озюне ала эди. Бойле шейни эр бир Шилогъа кельген исраиллинен яптылар. 15Тувар ягъыны якъмаздан эвель биле келип, руханийнинъ хызметчиси къурбан чалгъан адамгъа: «Руханийнинъ къавурмасына эт бер. О сенден пишкен эт алмаз, чий эттен бер», – деп талап эте эдилер. 16 ^kЭгер де бирде-бири: «Башта кереги киби тувар ягъыны якъсынлар, сонъ истегенинъ къадар озюнъе ал», – десе, о: «Ёкъ, шимди бер, эгер бермесенъ, зорлап алырым», – дей эди. 17РАББИнинъ огюнде Элий огъулларынынъ гуналары пек буюк олды, чюнки олар РАББИге кетирильген къурбанны урьмет этмей эдилер.

Смаил Шило шеэринде

18Генч Смаил, кетен эфод кийип, РАББИге хызмет эте башлады. 19Кичик усть урбаларыны онъа анасы тикип, йылда бир кере, акъайынен йыллыкъ къурбан чалмагъа кельгенде, кетире эди. 20Элий Элкъананы ве къадыныны багъышлады ве: «РАББИден сорагъан ве РАББИге берильген бала ерине РАББИ санъа шу къадындан даа бала берсин!» – деп айтты. Сонъ олар озь эвине кеттилер. 21 ^lРАББИ Ханнагъа мерамет эйледи, ве о, юклю олып, даа учь огълан ве эки къыз бала тапты. Яш Смаил исе РАББИнинъ огюнде етишип осьти.

Элий озь огъулларыны къабаатлай

22 ^mЭлий энди пек къарт олды. Огъуллары эписи исраиллилерге япкъан шейлерни, Корюшюв Чадыры огюнде топлашкъан апайларнен яткъанларыны эшитти. 23Оларгъа:

– Не ичюн бойле иш япасынъыз? Бутюн халкътан сизлер акъкъынъызда ярамай лафлар эшитем, – деди. 24– Ёкъ, балаларым. РАББИнинъ халкъы айткъан ве мен эшиткен лафлар яхшы дегиль. 25 ⁿБир адам башкъа адамгъа къаршы гуна ишлесе, онынъ ичюн Аллагъа дува этелер. Эгер де адам РАББИге къаршы гуна ишлесе, онынъ ичюн ким дува окъуйджакъ?

Лякин олар бабасыны динълемедилер. РАББИ энди оларгъа олюм къарары чыкъаргъан эди. 26 ^oЯш Смаил исе кет-кете осип етишти, ве РАББИ де, адамлар да ондан разы эдилер.

Элийнинъ къорантасы акъкъында пейгъамберлик

27 ^pЭлийге Алла ёллагъан бир адам келип, деди:

– РАББИ бойле айта:

Сен билесинъ ки, баба-деделеринънинъ эви Мысырда фыравунгъа къуллукъ этип юргенде, Мен оларгъа корюндим. 28 ^qЭписи Исраиль къабилелеринден Озюме руханий оларакъ къурбан ерине якъынлашмагъа, къокъулы отларны якъмагъа, Меним огюмде эфод кийип юрмек ичюн, деденъни сайлап алдым. Исраиль огъуллары чалгъан ве якъкъан къурбанларнынъ къысмыны да деденънинъ эвине бердим. 29Айса не ичюн Мен Эвим ичюн буюргъан шейлерни: Манъа кетирильген къурбанларны ве Манъа берильген ашлыкъ бахшышларыны аякъ асты этесинъиз? Не ичюн сен огъулларынъны Менден артыкъ коресинъ, Меним халкъым Исраильнинъ кетирген шейлернинъ энъ яхшысыны ашап семиресинъиз? 30 ^rРАББИ, Исраильнинъ Алласы бойле дей: Мен о вакъыт дедим ки, сенинъ ве бабанънынъ эви эбедиен Меним руханийлерим оладжакълар. Лякин энди бойле олмайджакъ. Манъа урьмет эткен адамларгъа Мен де урьмет этеджегим, Мени бир шей ерине корьмегенлерни исе Мен де бир шей ерине корьмейджегим. 31 ^sИште, бу куньлер келеята, Мен сенинъ эвинъни ве бабанънынъ эвининъ къуветини кеседжегим, ве эвинъде бир кимсе къартлыгъына етмейджек. 32Эвинъе тюшкен бутюн беляларны кореджексинъ. РАББИ Исраильге хайыр этсе де, эвинъде бир кимсе къартлыгъынадже яшамайджакъ. 33Манъа къурбан чалгъан ер ичюн сенинъ эвинъден бирисини къалдырырым. О, козьлеринъни кёр этеджек ве джанынъны агъыртаджакъ. Сенинъ эписи эркек эвлятларынъ исе вакъытсыз оледжеклер. 34 ^tПинехас ве Хофний огъулларынънен оладжакъ шей санъа алямет олур: олар экиси бир куньде оледжеклер. 35 ^uОзюме садыкъ олгъан бир руханий къояджагъым. О, Меним юрегим ве фикирлеримни биледжек ве бунъа коре япаджакъ. Мен онъа ве онынъ эвлятларына садыкъ оладжагъым, ве олар Меним Месихиме эр заман хызмет этеджеклер. 36Сенинъ эвинъден сагъ къалгъан эр бир адам бир къач кумюш капик ве бир тилим отьмек ичюн онъа бель букип келеджек ве: «Мени кечинмек ичюн, бир руханий вазифесини беджермеге къой», – дейджек.