a Кол 1.10; 2.6
b1 Кор 6.18; Гал 5.19; Эф 5.3
c1 Пётр 4.3-4; Рим 1.26; Эф 4.17-19
d1 Пётр 1.15; Иуда 1.24; Эф 1.4; Кол 1.22
e Юх 6.45; Еуд 13.1
fИкм 17.14; Фаал 18.3; Эф 4.28; 2 Тес 3.8, 10
gРим 13.13
h Эф 2.12
i1 Кор 15.20; 2 Кор 4.14
j 1 Кор 15.51-52
kЕш 27.12; Дан 10.13; 12.1; Мт 16.27; 24.31; 1 Кор 15.23, 52; Иуда 1.9; Сыр 12.7
lЮх 14.3; Фаал 1.9; Сыр 11.12

‏ 1 Thessalonians 4

Алланынъ разылыгъыны къазангъан омюр

1 aСонъунда, дин къардашларым, сиз насыл арекет этмек ве Алланынъ разылыгъыны насыл къазанмакъ керек олгъаны акъкъында бизден огренгенинъиз киби, бойле де яшанъыз. Рабби Исанен сизлерге ялварамыз ве сизлерни чагъырамыз: бундан зияде тырышынъыз. 2Биз Рабби Исанен сизлерге насыл эмирлерни буюргъанларымызны билесинъиз. 3 bАлланынъ истеги бойледир: азиз олунъыз, озюнъизни ороспулыкътан сакъланъыз, 4эр биринъиз озь беденини азизликте ве намуслыкъта тутунъыз, 5 cАлланы бильмеген халкълар киби, беден истеклерине берильменъиз. 6Бу ишлерде ич кимсе дин къардашларына акъсызлыкъ япмасын ве оларны алдатмасын, чюнки, эвельден сизлерге айткъанда тенбиелегенимиз киби, бутюн бу ишлер ичюн Алла джезалайджакъ. 7 dАлла бизлерни писликке дегиль, азизликке чагъырды. 8Шунынъ ичюн, буны къабул этмеген адам инсанны дегиль, сизге Мукъаддес Рухны берген Алланы ред эте.

9 eАгъа-къардашлыкъ севгиси акъкъында сизлерге язмакъ керекмей, чюнки Алла Озю сизни бири-биринъизни севмеге огретти, 10ве сизлер бутюн Македонияда яшагъан агъа-къардашларынъызны бойле севесиз. Сизлерни чагъырамыз: бундан даа зияде тырышынъыз 11 fве, биз сизлерге буюргъанларымыз киби, тынчлыкъта яшамагъа гъайрет этинъиз, озь ишлеринъизнен огърашынъыз, озь къолунъызнен чалышынъыз. 12 gСонъ сиз башкъа адамларнынъ урьметини къазанаджакъсынъыз ве ич бир шейге мухтадж олмайджакъсынъыз.

Раббининъ келюви ве иманлылар джемиетининъ коклерге котерилюви акъкъында

13 hАгъа-къардашлар, умюти олмагъан башкъа адамлар киби кедерленменъиз деп, раметлилер акъкъында сизлерге буны бильдирмеге истеймиз: 14 iэгер биз Исанынъ ольгенине ве тирильгенине инансакъ, Алла Исагъа иманнен ольгенлерни Онен берабер алып кетиреджегине де инанамыз.

15 jБуны сизлерге Раббининъ сёзюнен айтамыз: биз, Раббининъ келеджегине къадар тири къалгъан адамлар, ольгенлерден биринджи олмамыз. 16 kГурюльтинен айтылгъан эмир эшитильгенде, баш мелекнинъ сеси янъгъырагъанда ве Алланынъ борусы чалгъанда, Рабби Озю коктен энеджек ве Месихке иманнен ольгенлер биринджи олып тириледжеклер. 17 lСонъ о вакъытта биз, тири къалгъан адамлар да, оларнен берабер Раббини авада къаршыламакъ ичюн, апансыздан ашагъыдан алынаджакъмыз, булутлар ичинде котериледжекмиз ве бойле этип, эбедиен Раббинен берабер оладжакъмыз. 18Шунынъ ичюн, бойле сёзлернен бири-биринъизнинъ гонълюни алынъыз.
Copyright information for CrhCTB