‏ 1 Thessalonians 5

Тенбиелер

1 ^aАгъа-къардашлар, бу шейлер оладжакъ вакъты ве заманлары акъкъында сизлерге язмакъ керекмеймиз. 2 ^bОзьлеринъиз яхшы билесинъиз ки, Раббининъ куню, гедже хырсыз киби, келеджек. 3 ^cАдамлар: «Тынчлыкъ-аманлыкъ ве хавфсызлыкъ», – деп юргенде, о вакъыт олюм оларгъа апансыздан, догъаджакъ къадынгъа агъры киби, келеджек, ве олар ондан къачып кетмейджеклер.

4 ^dСизлер исе, агъа-къардашлар, къаранлыкъта дегильсиз, шу кунь сизлерни, хырсыз киби, басып алмаз. 5 ^eЭпинъиз ярыкънынъ огъулларысынъыз ве куньдюзнинъ огъулларысынъыз. Биз гедженинъки я да къаранлыкънынъки дегильмиз. 6 ^fШунынъ ичюн, башкъалары киби, юкъламайыкъ, лякин уяныкъ ве айыныкъ олайыкъ. 7Юкълагъанлар гедже юкълайлар, ве ичкиджилер гедже ичип тоялар. 8 ^gЛякин биз, куньдюзнинъкилер олып, айыныкъ олайыкъ, иман ве севгини, кокрек къорчаламасы киби, ве къуртулыш умютини, башлыкъ киби, кийип отурайыкъ. 9 ^hАлла бизни гъазапкъа дегиль, Рабби Иса Месихнен къуртулышны алмагъа тайин этти. 10 ⁱИса биз ичюн ольди, ве шунынъ ичюн биз тири я да олю олсакъ да, Онен берабер яшайджакъмыз. 11Шунынъ ичюн, шимди япкъанынъыз киби, бири-биринъизни юреклендиринъиз ве къавийлештиринъиз.

Огютлер ве селямлар

12 ^jАгъа-къардашлар, сизге ялварамыз: аранъызда чалышкъанларны, Раббиде сизлерге ёлбашчылыкъ япкъанларны ве огют бергенлерни урьмет этинъиз, 13 ^kяпкъан ишлери ичюн оларгъа севгинен буюк сайгъы косьтеринъиз. Бири-биринъизнен муаббет яшанъыз.

14 ^lСизлерге даа ялварамыз, агъа-къардашлар: тенбеллерни огютленъиз, рухтан тюшкенлерни юреклендиринъиз, кучьсюзлерге ярдым этинъиз, эписине сабырлы олунъыз. 15 ^mСакъынынъыз, ич кимсе яманлыкъкъа яманлыкънен къайтармасын. Аксине, эр вакъыт бири-биринъизге ве бутюн адамларгъа яхшылыкъ къыдырынъыз.

16 ⁿЭр вакъыт къуванынъыз, 17 ^oдаима дува окъунъыз, 18 ^pэр бир шей ичюн шукюр этинъиз. Буны сизлерден, Иса Месихке инангъанлардан Алла истей. 19 ^qРухнынъ алевини сёндюрменъиз, 20пейгъамберлик сёзлерине сайгъысызлыкъ косьтерменъиз, 21 ^rэр шейни сынап бакъынъыз, яхшылыкъкъа япышынъыз, 22эр бир яманлыкълардан озюнъизни сакъланъыз.

23 ^sАманлыкъ Алласы Озю сизлерни бутюнлей азиз этсин, ве, Раббимиз Иса Месих кельгенде, сизинъ рухунъыз, джанынъыз ве беденинъиз бус-бутюн олып, къабаатсыз сакълансынлар. 24 ^tСизлерни чагъыргъан ишанчлыдыр, ве О, буны беджерир.

25 ^uАгъа-къардашлар, бизлер ичюн дува окъунъыз.

26 ^vБутюн агъа-къардашларны азиз опюшнен селямланъыз. 27 ^wБу мектюпни бутюн агъа-къардашларгъа окъумагъа сизге Раббининъ Адынен буюрам.

28Раббимиз Иса Месихнинъ эйилиги сизлернен олсун!