2Ch 1 | CrhCTB | STEP | Давут огълу Сулейман озь падишалыгъында къавийлешти. РАББИ онен эди ве оны пек юксельтти.

‏ 2 Chronicles 1

Сулейман, Раббиден акъыл сорап, дува эте

1 ^aДавут огълу Сулейман озь падишалыгъында къавийлешти. РАББИ онен эди ве оны пек юксельтти.

2 Сулейман бутюн Исраильге: бинъбашыларгъа, юзбашыларгъа, къадыларгъа, Исраильнинъ эписи башлыкъларына ве къоранталарнынъ башлыкъларына топлашмагъа эмир этти. 3 ^bСонъра Сулейман ве онен берабер бутюн джемаат Гивондаки ибадет тёпесине кеттилер, чюнки анда Алланынъ Корюшюв Чадыры бар эди. Оны РАББИнинъ къулу Муса сахрада къургъан эди. 4 ^cДавут, Алланынъ Сандыгъы ичюн Ерусалимде чадыр къурып, Сандыкъны Кирьят-Яримден озю азырлагъан ерге кетирген эди. 5 ^dБецалелнинъ (Бецалел – Урийнинъ огълу, Урий – Хурнынъ огълу эди) бакъырдан япылгъан къурбан ери РАББИнинъ Мескени огюнде олды. Сулейман джемаатнен берабер Алланы чагъырды. 6 Анда, РАББИнинъ огюнде, Корюшюв Чадырынынъ огюнде тургъан бакъыр къурбан еринде, Сулейман бинъ дане бутюнлей якъыладжакъ къурбанлар кетирди.

7 Шу гедже Алла Сулеймангъа кельди ве ондан:

– Сора, санъа не берейим? – деп сорады.

8 ^eСулейман Аллагъа:

– Сен Давут бабама буюк севгинъни косьтердинъ ве мени онынъ ерине падиша оларакъ къойдынъ. 9 ^fШимди, РАББИ-Тааля, мени ер тозу киби чокъ халкъкъа падиша этип къойып, бабама берген сёзюнъ ерине кельсин. 10 Бу халкъкъа ёлбашчылыкъ этмек ичюн, манъа бильги ве акъыл бер, чюнки Сенинъ бойле бир буюк халкъынъа ким укюмдарлыкъ этип оладжакъ? – деди.

11 Алла Сулеймангъа шойле деди:

– Сенинъ юрегинъде бойле шейлер олгъаны ичюн, сен Менден зенгинлик, байлыкъ ве шан-шуретни ве душманларынънынъ джаныны сорамагъанынъ ичюн, озюнъе узун омюр биле сорамагъанынъ ичюн, лякин Меним халкъыма укюмдарлыкъ этмеге бильги ве акъыл сорагъанынъ ичюн, 12 ^gсанъа акъыл ве бильги береджегим. Бундан гъайры, Мен санъа ойле зенгинлик, байлыкъ ве шан-шуретни береджегим ки, сенден эвель олгъан падишаларнынъ биринде о къадар олмады, ве сенден сонъ келеджек падишаларнынъ биринде де о къадар олмаз.

Сулейманнынъ кучю ве зенгинлиги

13 Сулейман Гивондаки ибадет тёпесинден, Корюшюв Чадырындан Ерусалимге къайтып кельди ве Исраильге падишалыкъ этип башлады.

14 ^hСулейман дженк арабалары ве атлыларны топлады. О, 1 400 дженк арабасы ве 12 000 атлы топлады ве оларны дженк арабалары олгъан шеэрлеринде ве Ерусалимде, падишанынъ янында ерлештирди. 15 Падиша Ерусалим шеэринде кумюшнинъ ве алтыннынъ фиятыны адий ташларнынъ фиятынен бир этти, кедр тереклери исе Шефелада оськен инджир тереклери киби чокъ олды. 16 ⁱАтларны Сулеймангъа Мысыр ве Кеведен кетире эдилер. Падишанынъ алыш-веришчилери оларны Кеведен парагъа сатын алдылар. 17 Олар Мысырдан бир дженк арабасыны 600 кумюш парагъа, бир атны исе 150 кумюш парагъа ^{▼▼600 кумюш пара; 150 кумюш пара – къ. еуд. «600 (шекель) кумюш», «150 (шекель) кумюш».} сатын алып кетирдилер. Сонъра олар озь къолларынен буларны хитлилернинъ ве арамлыларнынъ эписи падишаларына да кетирдилер.