‏ 2 Chronicles 25

Ехуданынъ падишасы Амацья

1Амацья 25 яшында олгъанда, падиша олды ве 29 йыл девамында Ерусалимде падишалыкъ япты. Анасынынъ ады – ерусалимли Ехоаддан эди. 2О, РАББИнинъ огюнде догъру ишлер япты, амма буны чин юректен япмады. 3 ^aО, падишалыкъны озь къолларында яхшы пекиткен сонъ, падиша бабасыны ольдюрген хызметчилерини ольдюрди. 4 ^bЛякин оларнынъ балаларыны ольдюрмеди, чюнки Мусанынъ Къанун Китабында РАББИ шойле буюргъандыр: «Бабалар озь балалары ичюн ольмесинлер, балалар да озь бабалары ичюн ольмесинлер, амма эр кес озь гунасы ичюн оледжек».

Эдомнен олгъан дженк

5 ^cАмацья ехудалыларны топлады ве оларнынъ сойларына коре оларгъа бинъбашыларны ве юзбашыларны къойды. О, ехудалыларны ве биньяминлилерни топлап, халкъны 20 яшындан башлап сайды. Оларнынъ арасындан о, энъ яхшы, дженкке азыр, мызракънен ве къалкъаннен силялангъан 300 000 аскерни тапты. 6О, даа исраиллилерден 100 000 джесюр аскерни 100 чувал ▼

▼100 чувал – къ. еуд. «100 киккар».

кумюшке тутты. 7Лякин онъа Алланынъ адамы келип, шойле деди:

– Падиша! Исраиль аскерлери сеннен дженкке чыкъмасынлар. РАББИ исраиллилернен, бутюн Эфраим огъулларынен берабер дегиль. 8Сен дженкке чыкъсанъ ве джесюр олып дженклешсенъ де, Алла сени душманынънынъ огюнде ерге атаджакъ. Санъа ярдым этмеге я да сени ерге атмагъа Алланынъ къудрети бар.

9Амацья Алланынъ адамындан:

– Я энди мен Исраиль ордусына берген 100 чувал паранен не оладжакъ? – деп сорады. Алланынъ адамы:

– РАББИ санъа ондан чокъусыны да бере билир, – деп джевап берди.

10Бундан сонъра Амацья Эфраим топрагъындан онъа кельген ордуны айырды ве озь ерлерине къайтмагъа буюрды. Олар ехудалыларгъа пек ачувландылар, лякин ачувгъа толу алда озь ерлерине къайтып кеттилер.

11 ^eАмацья исе джесаретини топлап, озь ордусыны алып кетти ве Туз вадийине кельди ве 10 000 Сеир аскерлерини ольдюрди. 12 ^fЕхуда огъуллары даа 10 000 сеирлини тири алдылар. Оларны бир къаянынъ тёпесине кетирип, къая тёпесинден ашагъы аттылар. Оларнынъ эписи урулып парчаландылар.

13Шу арада, дженкке кетмесин деп, Амацья кери къайтаргъан орду Ехуданынъ базы шеэрлерининъ арасында, Самариеден Бет-Хоронгъа къадар дагъылдылар ве бу шеэрлерде 3 000 адам ольдюрдилер ве бир чокъ шейлер чайпап алдылар.

14 ^gАмацья исе эдомлыларны енъип къайткъанда, Сеир халкъынынъ путларыны да алып кельди ве оларны озюне аллалар оларакъ къойды. О, оларнынъ огюнде бель эгди ве къокъулы отлар якъты.

15РАББИ Амацьягъа пек ачувланды ве бир пейгъамбер ёллады. Пейгъамбер онъа:

– Сен нечюн бу халкънынъ аллаларына табынасынъ? Олар озь халкъыны биле сенинъ къолларынъдан къуртарып оламадылар, – деди.

16Пейгъамбер бу сёзлерни айткъан сонъ, падиша онъа:

– Сенинъ падишагъа акъыл огретмеге не акъкъынъ бар? Лафынъны битир, ёкъса сени ольдюреджеклер! – деди. Пейгъамбер:

– Мен билем: сен шу ярамай ишни япкъанынъ ве меним сёзюмни динълемегенинъ ичюн, Алла сени ёкъ этмеге къарар этти, – деп, сёзюни кести.

Исраильнен олгъан дженк

17Ехуданынъ падишасы Амацья акъыл танышып, Исраильнинъ падишасы Ёашкъа (Ёаш – Ехоахазнынъ огълу, Ехоахаз – Ехунынъ огълу эди) адамларыны ёллады ве онъа:

– Кель, юзьме-юзь корюшейик, – деди.

18 ^hИсраильнинъ падишасы Ёаш исе Ехуданынъ падишасы Амацьягъа бойле джевап йиберди:

– Ливанда оськен когем Ливанда оськен кедр терегине бойле хабер йиберген: «Къызынъны апай оларакъ меним огълума бер». Лякин Ливандаки кийик айванлар кельген де, шу когемни таптагъанлар. 19Сен: «Мына, мен эдомлыларны енъдим», – дединъ. Сенинъ юрегинъ макътанып пек юксельди. Сен эвинъде отур. Не керек яман беляны чагъырмагъа? Сен йыкъылырсынъ, Ехуда да сеннен берабер йыкъылыр.

20Амма Амацья оны динълемеди, чюнки бу Алланынъ истеги эди. О, оларны, Эдом аллаларыны къыдыргъанлары ичюн, Ёашнынъ элине береджек олды.

21 ⁱИсраильнинъ падишасы Ёаш кельди ве Ехуданынъ падишасы Амацьянен Ехудадаки Бет-Шемеш шеэринде юзьме-юзь корюшти. 22Исраиллилер ехудалыларны енъдилер, ве ехудалылар озь чадырларына къачып кеттилер. 23 ^jИсраильнинъ падишасы Ёаш Ехуданынъ падишасы Амацьяны (Амацья – Ёашнынъ огълу, Ёаш – Ехоахазнынъ огълу эди) Бет-Шемеште тутты ве Ерусалимге алып барды. О, Эфраим Къапусындан Коше Къапусына къадар Ерусалим диварынынъ 200 метр ▼

▼200 метр – къ. еуд. «400 аммах».

олгъан къысмыны бозды. 24 ^lО, Алланынъ Сарайында Овед-Эдом бакъкъан алтын, кумюш, бутюн савутларны ве падиша эвининъ байлыгъыны тапты, эм де эсирлерни алды ве Самариеге къайтты.

25Исраильнинъ падишасы Ёаш (Ехоахазнынъ огълу) ольген сонъ, Ехуданынъ падишасы Амацья (Ёашнынъ огълу) даа 15 йыл яшады.

26Амацьянынъ башкъа ишлери, башындан сонъунадже, Ехуда ве Исраиль падишаларынынъ китабында язылгъандыр.

27 ^mАмацья РАББИден вазгечкен сонъ, онъа къаршы Ерусалимде фитне яптылар, ве о, Лакиш шеэрине къачып кетти. Лякин фитнеджилер онынъ артындан Лакишке адамлар йиберип, оны анда ольдюрдилер. 28Сонъ оны атларда кетирдилер ве Ехуданынъ баш шеэринде баба-деделеринен берабер дефн эттилер.