2Ch 3 | CrhCTB | STEP | Сонъ Сулейман Ерусалимде, Мория дагъында РАББИнинъ Сарайыны къурып башлады. Шу ер онынъ бабасына Давуткъа косьтерильген эди. Давут шу ерни евуслы Орнаннынъ ашлыкъ арманында азырлагъан эди.

‏ 2 Chronicles 3

1 ^aСонъ Сулейман Ерусалимде, Мория дагъында РАББИнинъ Сарайыны къурып башлады. Шу ер онынъ бабасына Давуткъа косьтерильген эди. Давут шу ерни евуслы Орнаннынъ ашлыкъ арманында азырлагъан эди. 2 Къурулыш ишлерини Сулейман озь падишалыгъынынъ дёртюнджи йылында, экинджи айнынъ экинджи кунюнде башлады.

3 Алланынъ Сарайыны къургъанда, Сулейман бойле ольчюде темель къойды: эвнинъ узунлыгъы, эски ольчюге коре, 30 метр, кенълиги исе 10 метр ^{▼▼30 метр; 10 метр – къ. еуд. «60 аммах», «20 аммах».} олды. 4 Сарай огюндеки Эйваннынъ узунлыгъы Сарайнынъ кенълигине тенъ эди – 10 метр. Эйваннынъ юксеклиги де 10 метр ^{▼▼Бу терджиме базы къадимий юнан ве суриели эльязмаларгъа коре этильгендир. Мас. ве Септ. эльязмаларында «120 аммах», яни къарарнен 60 метр.} эди. Онынъ ичини темиз алтыннен къаплады. 5 Сарайнынъ Буюк Одасыны кипарис агъачларынен ве сонъра яхшы алтыннен къаплады, алтыннынъ устюнде пальма тереклери ве зынджырчыкълар япты. 6 Сонъ Оданы, гузель олсун деп, паалы ташларнен безетти. Алтын исе Парваим алтыны эди. 7 Сулейман бутюн Сарайны: таван агъачыны, босагъаларыны, диварларыны ве къапуларыны алтыннен къаплады ве диварларда Керувларны ойып япты.

8 Сонъра Сулейман Энъ Мукъаддес Ерни къурды. Онынъ узунлыгъы, Сарайнынъ кенълиги киби, 10 метр эди, ве онынъ кенълиги 10 метр эди. Сонъ 600 чувал ^{▼▼10 метр; 600 чувал – къ. еуд. «20 аммах», «600 киккар».} энъ яхшы алтын алып, алтыннен Оданы къаплады. 9 Алтын мыхлары ярым кило ^{▼▼Ярым кило – къ. еуд. «50 шекель».} агъырлыкъта эди. Сарайнынъ юкъары одаларыны да алтыннен къаплады. 10 ^fСарайнынъ Энъ Мукъаддес Еринде о, эки Керувнынъ образыны кесип яптырды, оларны да алтыннен къаплады. 11 Керувларнынъ къанатлары он метр узунлыгъында эди. Керувларнынъ бири эки бучукъ метр узунлыгъындаки биринджи къанатынен Сарайнынъ диварына тие эди ве эки бучукъ метр узунлыгъындаки экинджи къанатнен башкъа Керувнынъ къанатына тие эди. 12 Экинджи Керув да эки бучукъ метр узунлыгъындаки бир къанатынен Сарайнынъ диварына тие эди ве эки бучукъ метр узунлыгъындаки экинджи къанатынен башкъа Керувнынъ къанатына тие эди. 13 Бу Керувларнынъ къанатлары он метрге керильген эди. Олар озь аякъларында тура эдилер, ве юзьлери Буюк Одагъа чевирильген эдилер.

14 ^gСулейман кок, мавылы къырмызы ве къою къырмызы басмадан ве индже кетенден перде яптырды. Перденинъ устюнде Керувлар япылгъан эди.

Эки бакъыр колонна

15 ^hСарайнынъ огюнде эки колонна япты. Оларнынъ бутюн юксеклиги 17,5 метр эди. Эр бир колоннанынъ тёпесине къоймакъ ичюн капитель япты, онынъ юксеклиги эки бучукъ метр ^{▼▼17,5 метр; эки бучукъ метр – къ. еуд. «35 аммах», «беш аммах».} эди. 16 Сонъра, Энъ Азиз Одада олгъаны киби, зынджырчыкълар япты ве колонналарнынъ тёпесине ерлештирди. Даа юз дане нар япып, оларны зынджырларнынъ устюне къойды. 17 Шу колонналарны Сарайнынъ огюне къойды. Бирисини сагъ тарафтан къойды ве Якин деп адландырды, экинджисини сол тарафкъа къойды ве Боаз деп адландырды.