2 Corinthians 12
Павелнинъ руялары
1 aФайдасыз олса да, макътанмагъа меджбурым. Энди Рабби манъа косьтерген шейлерни ве берген хаберлерни айтаджагъым. 2Мен Месихке инангъан бир адамны билем. Он дёрт йыл эвельси о адам ерден учюнджи кокке къадар апансыздан алынды. О, бедендеми, беденден тыш эдими, бильмейим, Алла биле. 3Билем ки, шу адам (бедендеми, беденден тышмы, бильмейим, Алла биле) 4апансыздан дженнет багъчасына алынды ве инсангъа айтмагъа ясакъ олгъан сёзлерни эшитти. 5Бойле бир адамнен макътансам олур. Амма озюм акъкъымда макътанып олмам, тек къуветсизлигимнен макътанырым. 6Эгер макътансам, акъылсыз олмам, догърусыны айтаджагъым. Лякин озюмни тутып юрем, бирде-бир адам меним акъкъымда озюмде корьген я да эшиткенден зияде тюшюнеджегини истемейим. 7 bМанъа аджайип хаберлер берильген эди. Амма мен къопаймайым ве кибирленмейим деп, бедениме бир тикен, мени чекиштирген Шейтаннынъ хызметчиси берильди. 8Буны менден узакълаштырсын деп, Раббиге учь кере ялвардым. 9 cАмма О, манъа: «Санъа берген эйилигим етер. Адамлар озь къуветсизлигинде Манъа ишанса, оларда Меним бутюн къудретим арекет этип башлай», – деди. Шунынъ ичюн, менде Месихнинъ къудрети яшасын деп, къуванчнен озь къуветсизликлеримнен макътанаджагъым. 10 dШу себептен мен къуветсиз олгъанымда, мени яманлагъанларда, мен мухтадж олгъанымда, Месих ичюн мени къувгъан ве чекиштиргенлерде, мен мемнюн олам. Къуветсиз олгъанымда, меним къудретим осе.Павел коринтлилерни къайгъыра
11 eМен макътанып, акъылсыз киби олдым. Амма мени бунъа озьлеринъиз меджбур эттинъиз. Мени макътамакъ сизге керек эди. Мен ич бир шей олмасам да, анавы «буюк эльчилер»ден бетер дегилим. 12 fСизинъ аранъызда эльчилигимнинъ бельгилери: буюк бир сабыр, аляметлер, аджайип ве къудретли ишлер косьтерильди. 13 gБашкъа иманлылар джемиетлерине нени яптым да, оны сизлер ичюн япмагъаныммы? Тек бир шейни япмадым – сизлерден акъчаны истемедим! Бу къабаатым ичюн мени багъышланъыз! 14 hМына, сизге учюнджи кере бармагъа азырым, амма сизлерге юк олмам; къолунъыздакини дегиль, озьлеринъизни истейим. Балалар ана-бабаларына байлыкъ топламакъ керекмей, ана-бабалар балаларына топламакъ керек. 15 iСизинъ джанларынъыз ичюн олгъанымны ве озюмни биле къуванчнен береджегим. Эгер мен зияде севсем, мени азджа северлерми? 16 jОйле олсун, мен сизлерге юк олмасам да, дерсиз ки, мен сизни айнеджиликнен алдаткъаным. 17Бельки, ёллагъан адамларымнынъ ярдымынен сизлерден бир файда корьгендирим? 18 kМен Титни ве онен берабер бир дин къардашны сизге ёллагъан сонъ, Тит сизлерден файдаландымы? Бизлер бир акъылнен тюшюнмей эдикми? Бир тюрлю арекетлер этмей эдикми? 19 lБельки, биз сизинъ алдынъызда озюмизни акълаймыз, деп тюшюнедирсиз. Биз Месихнен бирликте Алланынъ огюнде айтамыз. Ве айтылгъаннынъ эписи, севгили къардашларым, сизни къавийлештирмеге керек. 20Янынъызгъа кельгенимде, сизлерни мен истемеген алынъызда тапарым ве сизлер мени истемегенинъиз алымда тапарсыз, деп къоркъам. Кельгенимде, къавгъа, пахыллыкъ, гъазап, давалар, яман лафлар, ошек, къопайлыкъ, низамсызлыкъ корерим, деп къоркъам. 21 mДаа къоркъам ки, сизге кельгенимде, Аллам мени сизинъ алдынъызда ашалайджакъ ве мен чокъуларынъызнынъ артындан агълайджагъым, чюнки олар эвель гуналар япкъан олсалар да, эткен ахлякъсызлыкъ, ороспулыкъ ве бозукълыкътан тёвбе этмедилер.
Copyright information for
CrhCTB