2Ki 1 | CrhCTB | STEP | Ахавнынъ олюминден сонъ, Моав Исраильге къаршы котерильди.

‏ 2 Kings 1

Ильяс пейгъамбер ве Ахазья падиша

1 ^aАхавнынъ олюминден сонъ, Моав Исраильге къаршы котерильди.

2 ^bАхазья исе Самариедеки эвининъ юкъары одасынынъ пармакълыгъындан йыкъылып яраланды. Эльчилерине эмир берип: «Барынъыз, Экрон шеэрининъ алласы олгъан Баал-Зевувдан соранъыз ки, Мен ярамдан тедавийленир экенимми?» – деп, оларны ёллады.

3 ^cРАББИнинъ Мелеги тишбели Ильяскъа бойле деди:

– Тур, Самарие падишасынынъ эльчилерини къаршыламагъа чыкъ да, оларгъа бойле айт: «Не? Исраильнинъ Алласы ёкъмы ёкъса? Экрон алласы олгъан Баал-Зевувдан сорамагъа кетесинъизми? 4 Шунынъ ичюн РАББИ бойле дей: “Яткъан тёшегинъден турмайджакъсынъ, мытлакъа оледжексинъ!”»

Бундан сонъ Ильяс кетти.

5 Эльчилер къайтып кельдилер. Ахазья олардан:

– Нечюн къайтып кельдинъиз? – деп сорады.

6 Олар:

– Бир адам бизни къаршыламагъа чыкъты ве бойле айтты: «Барынъыз, сизни йиберген падишагъа къайтып кетинъиз, онъа бу сёзлерни айтынъыз: “РАББИ бойле дей: Не? Исраильнинъ Алласы ёкъмы ёкъса? Экрон алласы олгъан Баал-Зевувдан сорамагъа кетесинъизми? Шунынъ ичюн, яткъан тёшегинъден турмайджакъсынъ, мытлакъа оледжексинъ!”» – дедилер.

7 Ахазья:

– Сизни къаршыламагъа чыкъып, бу сёзлерни айткъан адамнынъ корюниши насыл эди? – деп сорады.

8 ^dОлар:

– Шу адам пек юньлю, белиндеки къушагъы териден эди, – дедилер.

Ахазья исе:

– Бу – тишбели Ильяс, – деди.

9 Сонъра падиша эллибашыны элли аскеринен бирликте Ильяскъа йиберди. Эллибашы онъа барды. Ильяс исе дагънынъ тёпесинде отурмакъта эди. Эллибашы онъа:

– Эй, Алланынъ адамы! Падиша санъа ашагъы тюшмеге риджа эте, – деди.

10 ^eИльяс эллибашына джевап берип:

– Эгер мен Алланынъ адамы олсам, коктен атеш энсин де, сени де, аскерлеринъни де якъсын, – деди.

Шу дакъкъасы коктен атеш энип, эллибашыны ве онынъ аскерлерини якъты.

11 Падиша башкъа эллибашы ве элли аскерини ёллады. О да:

– Эй, Алланынъ адамы! Падиша санъа айта: «Тез тюш мында!» – деди.

12 Ильяс кене джевап берип:

– Эгер мен Алланынъ адамы олсам, коктен атеш энсин де, сени де, аскерлеринъни де якъсын, – деди.

Шу дакъкъасы коктен Алланынъ атеши энип, эллибашыны ве онынъ аскерлерини якъты.

13 Падиша озь учюнджи эллибашыны ве элли аскерини йиберди. Учюнджи эллибашы келип, Ильяснынъ огюнде тизлерине йыкъылып, мераметини тилеп:

– Эй, Алланынъ адамы! Меним джанымны ве бу сенинъ къулларынъ олгъан элли аскернинъ джанларыны аджы! 14 Мына коктен атеш энди де, менден эвель кельген эки эллибашыны ве оларнынъ эллишер аскерини якъты. Лякин меним джанымны аджы! – деди.

15 РАББИнинъ Мелеги Ильяскъа:

– Ондан къоркъма, тюшип онен бар, – деди, ве Ильяс турып падишагъа кетти. 16 О, падишагъа:

– РАББИ бойле дей: «Сен Экрон алласы олгъан Баал-Зевувдан сорамагъа эльчилер йибердинъ. Исраильнинъ Алласы ёкъмы ёкъса? Онынъ сёзюни сорамагъа мумкюн дегильми? Шунынъ ичюн яткъан тёшегинъден турмайджакъсынъ, мытлакъа оледжексинъ!» – деди.

17 Ильяскъа айтылгъан РАББИнинъ сёзлерине коре олды: Ахазья ольди. Онынъ ерине къардашы Ёрам тахткъа кечти, чюнки Ахазьянынъ огълу ёкъ эди. Бу вакъиа Ехуда падишасы олгъан Ехошафат огълу Ехорамнынъ падишалыгъынынъ экинджи йылында олып кечти. 18 Ахазьянынъ башкъа ишлери акъкъында Исраиль падишаларынынъ тарихы китабында язылгъандыр.