‏ 2 Kings 13

Исраильнинъ падишасы Ехоахаз

1 ^aАхазьянынъ огълу Ёаш Ехудада 23-юнджи йыл падишалыкъ эткенде, Ехунынъ огълу Ехоахаз Исраиль падишасы олды. О, 17 йыл девамында Самарие шеэринде падишалыкъ этти. 2 ^bО, РАББИнинъ огюнде ярамай шейлер япты, Исраильни гуналаргъа батыргъан Неват огълу Еровоамнынъ ёлларында юрди, олардан вазгечмеди. 3 ^cШунынъ ичюн РАББИ исраиллилерге пек гъазапланды. О, оларны чокъ вакъыткъа Арамнынъ падишасы Хазаэлге ве Хазаэлнинъ огълу Бен-Хададгъа берди. 4 ^dЕхоахаз РАББИге дувалар этти. РАББИ оны эшитти, чюнки исраиллилернинъ, Арамнынъ падишасы ичюн чеккен сыкъынтысыны коре эди. 5 ^eРАББИ исраиллилерге бир къуртарыджы йиберди, исраиллилер арамлыларнынъ укюминден къуртулды, ве эвелькиси киби озь эвлеринде хавфсыз яшап башладылар. 6 ^fЛякин олар Исраильни гуналаргъа батыргъан Еровоамнынъ гуналарындан вазгечмедилер, гуналар япып яшадылар. Ашера путуна табынма диреги Самарие шеэринде еринде къалды. 7Ехоахазнынъ ордусындан тек 50 атлысы, 10 дженк арабасы ве 10 000 джаяв аскери къалгъан эди, чюнки Арамнынъ падишасы оларны топракъ тозуны киби таптап, ордусыны ёкъ этти.

8Ехоахазнынъ башкъа ишлери, онынъ эписи япкъан шейлери ве онынъ къараманлыгъы акъкъында Исраиль падишаларынынъ тарихы китабында язылгъандыр. 9Ехоахаз кечинип, баба-деделерине къошулды ве Самарие шеэринде дефн этильди. Онынъ еринде огълу Ёаш падиша олды.

Исраильнинъ падишасы Ёаш

10Ёаш Ехудада 37-нджи йыл падишалыкъ эткенде, Ехоахазнынъ огълу Ёаш Исраиль падишасы олды. О, Самарие шеэринде 16 йыл девамында падишалыкъ япты. 11 ^gО, РАББИнинъ огюнде ярамай шейлер япты, Исраильни гуналаргъа батыргъан Неват огълу Еровоамнынъ гуналарындан вазгечмеди, оларны япып яшады. 12 ^hЁаш акъкъында башкъа шейлери, онынъ эписи япкъан ишлери, онынъ къараманлыгъы ве Ехуда падишасы олгъан Амацьягъа къаршы дженки акъкъында Исраиль падишаларынынъ тарихы китабында язылгъандыр. 13Ёаш кечинип, баба-деделерине къошулды, ве онынъ тахтына Еровоам кечти. Ёаш исе Исраиль падишаларынынъ къабринде Самарие шеэринде дефн этильди.

Эль-Ясанынъ олюми

14 ⁱЭль-Яса хаста эди. Шу хасталыкъ сонъра онъа олюм кетирди. Исраиль падишасы Ёаш онъа келип агълады ве:

– Бабам, бабам! Исраильнинъ арабасы ве атлылары! – деди.

15Эль-Яса онъа:

– Яйнен окъларны ал, – деди.

Ёаш яйнен окъларны алды. 16Сонъ Эль-Яса Исраиль падишасына:

– Яйны чек, – деди. О, яйны чекти. Эль-Яса озь къолларыны падишанынъ къолларына къойды.

17 ^j– Шаркъкъа бакъкъан пенджерени ач, – деди Эль-Яса.

О, ачты. Эль-Яса:

– Ат, – деди.

О, атты. Бундан сонъ Эль-Яса бойле деди:

– Бу окъ – РАББИден кельген къуртарыджы окътыр, о, сени Арамдан къуртараджакъ. Сен арамлыларны Афек шеэри янында бутюнлей енъеджексинъ.

18Сонъ Эль-Яса:

– Окъларны ал, – деди.

Падиша окъларны алды. Сонъ Эль-Яса Исраиль падишасына:

– Ерге ур, – деди.

О, учь кере ерге урып токътады. 19Алланынъ адамы онъа ачувланып:

– Беш-алты кере ургъан олсанъ, арамлыларны бутюнлей ёкъ этеджек эдинъ, шимди исе арамлыларны тек учь кере енъеджексинъ! – деди.

20Эль-Яса ольди ве дефн этильди. Йылындан моавлыларнынъ айдутлар сюрюлери топракъларны басты.

21Бир кунь бир адамны дефн эткенде, адамлар бир айдутлар сюрюсини корьди. Олюни Эль-Ясанынъ къабири ичине атып къачтылар. Олю Эль-Ясанынъ кемиклерине тийип тирильди ве аякъларына турды.

Исраиль ве Арам арасындаки дженк

22 ^kАрамнынъ падишасы олгъан Хазаэл, Ехоахазнынъ бутюн падишалыгъы боюнджа исраиллилерни хорлай эди. 23Лякин РАББИ оларны аджып, мерамет эйледи. Ибраим, Исхакъ ве Якъупкъа берген васиети ичюн, исраиллилерни ёкъ этмеге истемеди ве Озюнден бугуньгедже ред этмеди.

24Арамнынъ падишасы Хазаэл ольди. Онынъ ерине огълу Бен-Хадад падиша олды. 25 ^lХазаэлнинъ огълу Бен-Хадад Ехоахаздан дженкте Исраильнинъ бир къач шеэрлерини запт этти. Ехоахазнынъ огълу Ёаш исе Бен-Хададгъа къаршы дженк этип, шу шеэрлерни къайтарды. Ёаш оны учь кере енъди ве Исраиль шеэрлерини кери къайтарды.