2Ki 22 | CrhCTB | STEP | Ёшия падиша олгъанда, секиз яшында эди. О, Ерусалимде 31 йыл девамында падишалыкъ этти. Онынъ анасы – Боцкъат шеэринден олгъан Адая къызы Едида эди.

‏ 2 Kings 22

Ехуданынъ падишасы Ёшия

1 ^aЁшия падиша олгъанда, секиз яшында эди. О, Ерусалимде 31 йыл девамында падишалыкъ этти. Онынъ анасы – Боцкъат шеэринден олгъан Адая къызы Едида эди. 2 ^bЁшия РАББИнинъ огюнде догъру ишлер япып яшады, бабасы Давутнынъ ёлларындан сагъгъа-солгъа бурулмайып юрди.

Мусанынъ Къанун Китабы

3 Ёшия 18-инджи йыл падишалыкъ эткенде, падиша Мешуллам огълу Ацальянынъ огълу Шафан языджыны РАББИнинъ Сарайына ёллап:

4 ^c– Руханийлернинъ башлыгъы Хилкиягъа барып кель. О, къапу къаравуллар халкътан топлагъан ве РАББИнинъ Сарайына кетирильген кумюшни сайсын да, 5 оны РАББИнинъ Сарайындаки ишчилернинъ башлыкъларына берсин, олар исе, РАББИнинъ Сарайыны тюзетмек ичюн, ишчилерге даркъатсынлар. 6 Дюльгерлерге, къуруджыларгъа, диварджыларгъа, Сарайны тюзетмеге кереккен терек ве ёнулгъан ташларгъа масраф этсинлер. 7 ^dМасраф этильген кумюшнинъ эсабыны сорамасын, чюнки олар ишанчлы адамлар, – деди.

8 ^eРуханийлернинъ башлыгъы Хилкия языджы Шафангъа:

– РАББИнинъ Сарайында Къанун Китабыны таптым, – деди де, китапны Шафангъа берди. Шафан китапны окъуды. 9 Сонъ Шафан падишагъа кельди, онъа джевап берди ве:

– Къулларынъ эвде тапылгъан кумюшни алдылар ве оны РАББИнинъ Сарайыны тюзеткен ишчилернинъ башлыкъларына бердилер, – деди. 10 Сонъ Шафан лафыны девам этип:

– Хилкия руханий манъа бир китап берди, – деди ве оны гурь сеснен падишагъа окъуды. 11 Падиша Къанун Китабынынъ сёзлерини эшиткенинен, устюндеки урбаларыны йыртты, 12 ^fсонъ руханий Хилкиягъа, Шафан огълу Ахикъамгъа, Микъая огълу Акъборгъа, языджы Шафангъа ве падишанынъ хызметчиси Асаягъа бойле буюрды:

13 ^g– Барынъыз, шу тапылгъан китапнынъ сёзлери акъкъында мен ичюн, халкъым ве бутюн Ехуда ичюн РАББИден соранъыз. РАББИнинъ гъазабы бизге къаршы пек кучьлюдир, чюнки бабаларымыз китапта язылгъан шейлерге бойсунмадылар, онда биз ичюн бутюн язылгъаныны тутмадылар.

14 ^hХилкия руханий, Ахикъам, Акъбор, Шафан ве Асая кетип, пейгъамберлик япкъан къадын Хулдагъа кельдилер. Хулда – урбаларнынъ къаравулы олгъан Хархас огълу Тикванынъ огълу олгъан Шаллумнынъ апайы эди, Ерусалимнинъ Мишне мааллесинде яшады. Олар онен лакъырды эттилер. 15 Хулда оларгъа:

– Исраильнинъ РАББИ-Таалясы Онъа ёллангъан адамгъа бойле дей: 16 «Шу топракъкъа ве мында яшагъанларгъа агъыр белялар тюшюририм, Ехуда падишасы китапта окъугъан шейлернинъ эписини япарым. 17 ⁱЧюнки олар Мени къалдырды, башкъа аллаларгъа къурбанлар чалып, озь ишлеринен Мени ачувландырды. Шу ерге Меним гъазабым зияде алевленди ве энди сёнмейджек». 18 Сизни, РАББИден сорасын деп, ёллагъан Ехуда падишасына о эшиткен сёзлер акъкъында Исраильнинъ РАББИ-Таалясы бойле дей: 19 ^j«Виран олып лянетленеджек бу ер ве онынъ сакинлери акъкъында сёзлеримни эшитип, юрегинъ йымшады, ве сен РАББИнинъ огюнде боюн эгдинъ. Сен урбаларынъны йырттынъ ве Меним огюмде агъладынъ. Онынъ ичюн Мен сени эшиттим, – дей РАББИ. 20 ^k– Шунынъ ичюн де козьлеринъ Мен шу ерге кетиреджек беляларны корьмейджек. Мен сени тынч-аман баба-деделеринъе къошаджагъым, ве сен дефн этиледжексинъ», – деди.

Шу джевапны падишагъа кетирдилер.