2Ki 5 | CrhCTB | STEP | Арам мемлекети падишасынынъ Нааман адлы орду башлыгъы бар эди. О, буюк адам эди ве эфендисининъ козюнде урьмет къазангъан, чюнки онынъ ярдымынен РАББИ арамлыларгъа дженклерде гъалебелер берген эди. Лякин бу къуветли къараманнынъ тери хасталыгъы бар эди.

‏ 2 Kings 5

Нааманнынъ хасталыкътан тедавийленюви

1 ^aАрам мемлекети падишасынынъ Нааман адлы орду башлыгъы бар эди. О, буюк адам эди ве эфендисининъ козюнде урьмет къазангъан, чюнки онынъ ярдымынен РАББИ арамлыларгъа дженклерде гъалебелер берген эди. Лякин бу къуветли къараманнынъ тери хасталыгъы бар эди.

2 Бир кунь арамлыларнынъ айдутлар сюрюлери Исраильге келип, бир кучючик къыз баланы эсир алгъанлар. Шу къызчыкъ Нааманнынъ къадынына хызметчи олгъан эди. 3 Къызчыкъ озь ханымына:

– Эфендимиз Самариедеки пейгъамберге барып кельсе, о пейгъамбер эфендимизнинъ тери хасталыгъыны тедавийлер эди! – деди.

4 Нааман барып, Исраиль ерлеринден кельген къызчыкънынъ бойле сёзлерини эфендисине айтып берди.

5 Арамнынъ падишасы Наамангъа:

– Бар, мен Исраиль падишасына мектюп ёлларым, – деди.

Нааман озюнен он чувал кумюш, эки чувал ^{▼▼Он чувал; эки чувал – къ. еуд. «он киккар», «6 000 (шекель) алтын».} алтын ве он тюрлю урба алып, барды. 6 Исраиль падишасына мектюпни кетирди. Мектюпте бойле язылгъан эди: «Мына шу мектюпнен берабер мен санъа меним хызметчим олгъан Нааманны ёллайым. Онынъ тери хасталыгъыны яхшы эт».

7 ^cИсраиль падишасы мектюпни алып окъуды да, устюндеки урбасыны йыртты ве:

– Ёкъса, мен ольдюрмек ве олюлерни тирильтмек кучюне саип олгъан Алламмы?! Не ичюн манъа тери хасталыгъыны тедавийлемеге адамны йибере? Мына бакъынъыз да корюнъиз: о, къавгъа чыкъармакъ ичюн мана къыдыра! – деди.

8 Алланынъ адамы Эль-Яса, Исраиль падишасы озь урбаларыны йырткъаны акъкъында эшитип, падишагъа бойле хабер йиберип:

– Не ичюн озь урбаларынъны йырттынъ? О адам манъа кельсин, Исраильде пейгъамбер олгъаныны бильсин, – деди.

9 Нааман озь атлары ве арабасында келип етти ве Эль-Ясанынъ эви огюнде токътады. 10 ^dЭль-Яса онъа бойле хабер йиберди:

– Бар, еди кере Иордан озенинде ювун. Бундан сонъ беденинъ тазеленир, ве сен темизленирсинъ.

11 Нааман ачувланып кетти де, бойле деди:

– Мына мен тюшюндим ки, мытлакъа о чыкъып ве турып, РАББИни, озь Алласыны чагъырыр, къолуны зарарлангъан ериме къояр ве тери хасталыгъымны тедавийлер! 12 Не? Дамасктаки Авана ве Парпар озенлери бутюн Исраиль озенлеринден яхшы дегильми я? Мен шу озенлерде ювунып тедавийленмез эдимми я?

Сонъра айланды да, ачувланып кетти. 13 Онынъ хызметчилери янына келип, онъа бойле дедилер:

– Бабам! Эгер пейгъамбер санъа къыйын бир шей айткъан олса, сен барып да, айткъаныны япмаз эдинъми? О санъа тек: «Ювун ве темизленирсинъ», – деди!

14 Бундан сонъ Нааман барып, Алланынъ адамы айткъаны киби, Иордан озенине еди кере далып чыкъты, ве онынъ бедени кичик баланынъ бедени киби темиз олды. 15 ^eСонъ о ве онен берабер олгъанларнынъ эписи Алланынъ адамына къайтып кельдилер. Келип, онынъ огюнде турып:

– Шимди мен билем ки, Исраильден башкъа бир ерде Алла ёкъ экен! Энди менден, сенинъ къулунъдан, бир бахшыш къабул эт, – деди.

16 ^fЛякин Эль-Яса онъа:

– РАББИнинъ огюнде турып ант этем: ёкъ, къабул этмем! – деди.

Нааман не къадар меджбур этмесин, Эль-Яса разы олмады.

17 Бундан сонъ Нааман:

– Ойле олса, къулунъа эки къатыр котерип аладжакъ топракъ берсинлер. Къулунъ энди РАББИден башкъа аллаларгъа бутюнлей якъыладжакъ къурбанлар чалмайджакъ ве бахшышлар бермейджек. 18 Тек бир шейни РАББИ багъышласын: меним падишам Риммон путунынъ эвине ибадетке баргъанда, меним къолума таянгъанда, мен де Риммоннынъ эвинде ибадет этерим. Меним ибадетим ичюн РАББИ мени, къулунъны, багъышласын, – деди.

19 Эль-Яса онъа:

– Аман-эсен бар, – деди.

Нааман онынъ янындан кетип, бираз ёл кечкен сонъ, 20 ^gАлланынъ адамы Эль-Ясанынъ хызметчиси Гехазий бойле тюшюнди: «Мына эфендим шу арамлы Нааман кетирген шейлерини онынъ къолундан алмады. РАББИнинъ огюнде ант этем: шимди артындан чапарым да, ондан бир шей алырым!»

21 Сонъ Гехазий Нааманнынъ артындан чапып кетти. Нааман артындан чапып кельген адамны корьди, оны къаршыламагъа арабасындан тюшти ве:

– Не олды? Хайырлымы? – деп сорады. 22 Гехазий джевап берип:

– Хайырлы! Эфендим мени санъа бойле деп йиберди: «Манъа Эфраим дагълы топрагъындан эки пейгъамбер энди кельди. Оларгъа бир чувал ^{▼▼Бир чувал – къ. еуд. «бир киккар».} кумюш ве эки къат урба берсе», – деди.

23 Нааман онъа:

– Ялварам, эки чувал ^{▼▼Эки чувал – къ. еуд. «эки киккар».} кумюш ал! – деп оны къандырды. Сонъ эки чувал кумюшни ве эки къат урбаны алды да, эки хызметчисине берди. Олар буны Гехазийнинъ огюнде алып кеттилер. 24 Байырнынъ янына кельгенде, Гехазий эписини оларнынъ къолундан алды да, эвинде сакълады. Хызметчилерни артына къайтарды, ве олар кеттилер. 25 Гехазий эфендисине къайтып кельгенде, Эль-Яса ондан:

– Гехазий, къайдан келесинъ? – деп сорады. Гехазий исе:

– Ёкъ-ёкъ, къулунъ бир якъкъа бармады, – деди.

26 Эль-Яса онъа:

– Шу адам арабасындан сени къаршыламагъа тюшкенде, анда мен рух оларакъ эдим. Шимди кумюш, урбалар я да зейтюн тереклеринен юзюм багъчаларыны алмагъа, къой-эчкилер ве туварларны, акъай-апай къулларны алмагъа вакъыт кельдими? 27 ^jНааманнынъ хасталыгъы санъа ве сенинъ эвлятларынъа омюрбилля япышсын! – деди.

Сонъ хызметчиси тери хасталыгъына огърагъаны ичюн, къар киби беяз олып, онынъ огюнден чыкъып кетти.