2Sa 8 | CrhCTB | STEP | Бир къач вакъыт кечкен сонъ, Давут фелестинлилерни енъди, оларны бойсундырды ве оларнынъ къолларындан Метег-Хаамманы тартып алды.

‏ 2 Samuel 8

Давутнынъ гъалебелери

1 Бир къач вакъыт кечкен сонъ, Давут фелестинлилерни енъди, оларны бойсундырды ве оларнынъ къолларындан Метег-Хаамманы тартып алды. 2 Сонъ о, моавлыларны енъди. Моавлыларны ерге серип, оларны аркъаннен ольчеп, учьке больди. Эр учюни аркъаннен ольчеп, учьте экисини ольдюрди, бир аркъанны исе сагъ къалдырды. Сонъ моавлылар Давутнынъ къуллары олды ве салым тёледилер.

3 ^aСонъ Давут Реховнынъ огълу Хададезерни – Цова падишасыны – енъди. О заман Хададезер Фират дерьясындаки укюмдарлыгъыны гъайрыдан тиклемеге кете эди. 4 ^bДавут 1 700 атлы ве 20 000 джаяв аскерни алды. 100 дженк араба атыны къалдырып, бутюн дженк арабаларына екильген атларнынъ дамарларыны кести. 5 Дамасктан арамлылар Цова падишасы Хададезерге ярдымгъа кельдилер, лякин Давут арамлыларнынъ 22 000 аскерини ольдюрди. 6 Сонъ Давут Дамаск-Арамда къаравул отрядларыны къойды. Арамлылар Давутнынъ къуллары олдылар ве салым тёледилер. Давут баргъан еринде РАББИ оны къорчалай эди.

7 ^cДавут, Хададезернинъ хызметчилеринде олгъан алтын къалкъанларыны алып, оларны Ерусалимге кетирди. 8 Хададезернинъ Бета ве Беротай шеэрлеринден исе Давут падиша пек чокъ бакъыр алды.

9 Хамат топрагъынынъ падишасы Тои Давутнынъ Хададезер ордусыны енъгени акъкъында эшитип, 10 озюнинъ огълу Ёрамны Давут падишагъа, онен селямлашмагъа ве, Хададезернен дженклешип енъгени ичюн, оны хайырламагъа ёллады, чюнки Хададезер Тоинен дженклешмекте эди. Ёрам кумюш, алтын ве бакъыр бахшышлар кетирди. 11 ^dДавут, озюне бойсундыргъан башкъа халкълардан тутып алгъан кумюш ве алтынны РАББИге багъышлагъаны киби, бу шейлерни де РАББИге багъышлады. 12 Давут оларны арамлылардан, моавлылардан, аммонлылардан, фелестинлилерден, амалеклилерден ве Рехов огълундан, Цова падишасы Хададезерден тартып алгъан эди.

13 ^e18 000 арамлыларны Туз вадийинде ольдюрип къайткъан сонъ, Давут озюне буюк нам къазанды. 14 ^fЭдомда о, къаравул отрядларыны къойды. Бутюн Эдомда къаравул отрядларыны къойды ве эписи эдомлылар Давутнынъ къуллары олдылар. Давут къайда бармасын, РАББИ оны къорчалай эди.

15 ^gДавут бутюн Исраильге падишалыкъ япты, озюнинъ бутюн халкъыны акълы суд этти. 16 ^hЦеруя огълу Ёав – орду башлыгъы, Ахилуд огълу Ехошафат – тарихчы эди. 17 ⁱАхитув огълу Цадокъ ве Авиатар огълу Ахимелек – руханийлер, Серая – языджы эди. 18 ^jЕхояда огълу Беная керетлилер ве пелетлилер болюгининъ башлыгъы эди, ве Давутнынъ огъуллары руханийлер эдилер.