‏ 2 Samuel 15

Авишалом Давуткъа къаршы чыкъа

1 ^aБундан сонъ Авишалом озюне бир араба, атлар ве огюнде чападжакъ элли къаравул азырлады.

2 ^bАвишалом саба эрте турып, шеэр къапусына кеткен ёлнынъ янында тура эди. Бир кимсе озюнинъ давасынен падишанынъ судуна кетеяткъанда, Авишалом оны янына чагъырып: «Сен къайсы шеэрден келесинъ?» – деп сорай эди. О адам: «Мен, сенинъ къулунъ, Исраильнинъ бойле-бойле къабилесинден», – десе, 3Авишалом онъа: «Сенинъ ишинъ догъру, акълыдыр, лякин падишада сени динълейджек кимсе ёкъ», – дей эди. 4 ^cАвишалом даа: «Эгер бу мемлекетте къады этип мени къойсалар, манъа давасы ве къавгъасы олгъан эр ким келир эди, мен оны догъру суд этер эдим», – дей эди.

5Бирде-бири бель букип, селямлашмакъ ичюн янына кельсе, Авишалом, къолуны узатып, оны къучакълай ве опе эди. 6Падишанынъ судуна кельген эр бир исраиллинен бойле япа эди ве бойлеликнен исраиллилернинъ итибарыны къазана эди. 7Давут падишалыгъы къыркъ йыл девам эткен сонъ, Авишалом падишагъа:

– Мен барып, РАББИге берген адагъымны Хевронда беджерейим, – деди. 8 ^d– Мен Арамда, Гешур топрагъында яшагъанда, бойле адакъ бердим: эгер РАББИ мени Ерусалимге къайтарса, мен РАББИге хызмет этеджегим, – дедим.

9Падиша:

– Аман-эсен бар, – деди, ве Авишалом Хевронгъа кетти.

10Авишалом, бутюн Исраиль къабилелерине гизли хаберджилерни ёллап:

– Бору сеслерини эшиткенде: «Авишалом Хевронда падиша олды», – денъиз, – деди.

11Авишаломнен берабер Ерусалимден 200 адам давет этилип кеткен эди, оларнынъ саф юреклиги ичюн бир шейден хаберлери ёкъ эди. 12 ^eКъурбан чалгъан вакъытта Авишалом Давутнынъ насиатчысы олгъан гилолы Ахитофелни Гило шеэринден чагъыртты. Олар буюк бир анълашма яптылар, ве халкъ Авишаломнынъ янына топлашып чокълашмагъа башлады.

Давут къачып кете

13 ^fБир хаберджи келип, Давуткъа:

– Исраиллилер Авишалом тарафына кечип башлады, – деди.

14 ^gДавут Ерусалимде онынъ янында олгъан хызметчилерине:

– Айды, тез-тез къачайыкъ. Авишаломдан къуртарылып оламамыз. О, бизге уджюм этип, чокътан-чокъ зарар кетиреджек, бизни де ольдюреджек, шеэрни де къылычтан кечиреджек, – деди.

15Хызметчилер падишагъа:

– Биз – къулунъмыз. Сен, падиша, не десенъ, шуны беджерирмиз, – дедилер.

16 ^hСонъ падиша ве бутюн эвиндекилери онынъ артындан джаяв кеттилер. Эвни бакъмакъ ичюн, падиша он дане джариесини къалдырды. 17Падиша ве халкъы джаяв кетип, шеэрнинъ энъ сонъки эвининъ янында токътадылар. 18 ⁱБутюн хызметчилери янында кете эдилер. Керетлилер, пелетлилер ве Гъат шеэринден джаяв кельген 600 гъатлы падишанынъ огюнде кете эдилер.

19Падиша гъатлы Иттайгъа:

– Сен не ичюн бизнен берабер кетесинъ? Къайт, Авишалом падишанен берабер къал. Сен исраилли дегильсинъ, мында башкъа ерлерден сюргюн этильгенсинъ. 20Даа тюневин кельдинъ, мен бугунь сени бизнен кетмеге зорлайыммы? Мен кетеджек еримни озюм де бильмейим. Къайт, адамларынъны да озюнънен берабер ал. Алланынъ мерамети ве садыкълыгъы сеннен олсун!

21 ^jИттай падишагъа бойле джевап берди:

– РАББИнинъ огюнде ве сенинъ, падиша-эфендим, огюнъде ант этем: сен къайда барсанъ, мен де анда оладжагъым. Ольсем де, тири къалсам да, манъа эписи бир.

22Давут Иттайгъа:

– Айды, меннен кет, – деди. Сонъ гъатлы Иттай, онынъ адамлары ве бала-чагъалары падишанен кеттилер.

23 ^kБутюн ерли халкъ окюр-окюр агълагъанда, падиша бутюн халкънен берабер Кидрон вадийини кече эди. Сонъ бутюн халкъ сахрагъа догъру ёл алды.

24 ^lАнда руханий Цадокъ ве Левий къабилесинден адамлар да бар эдилер. Олар Алланынъ Васиет Сандыгъыны алып кеттилер. Алланынъ Сандыгъыны ерге къойып, руханий Авиатар, бутюн халкъ шеэрден чыкъмагъандже, бир тёпеде турды.

25Падиша Цадокъкъа:

– Алланынъ Сандыгъыны шеэрге къайтар. Эгер мен РАББИнинъ козюнде мерамет къазансам, О мени кери къайтарыр, оны ве мескенини корьмеге имкян берер. 26 ^mЭгер де О: «Ёкъ, сенден разы дегилим», – десе, мына мен мындам. О, Озюнинъ истегенини япсын, – деди.

27 ⁿПадиша руханий Цадокъкъа:

– Козь-къулакъ ол! Эсен-аман шеэрге къайт. Огълунъ Ахимаац ве Авиатар огълу Ехонатан – сиз бу эки огълунъызнен берабер къайтынъыз. 28Мен сахрадаки вадийде сизден хабер кельгендже беклерим, – деди.

29Цадокъ ве Авиатар Алланынъ Сандыгъыны Ерусалимге къайтардылар ве анда къалдылар.

30 ^oДавут исе агълай-агълай Зейтюн дагъына чыкъты. Онынъ башы къапалы эди, озю ялынаякъ кете эди. Онен берабер олгъан адамлар да башларыны къапатып агълай-агълай кете эдилер.

31 ^pДавуткъа:

– Ахитофел Авишаломнен берабер санъа къаршы анълашма япты, – дедилер. Давут:

– РАББИ! Ахитофелнинъ огреткен шейни ахмакълыкъкъа чевир! – деди.

32 ^qДавут Аллагъа ибадет эткен тёпеге чыкъкъанда, онъа аркълы Хушай расткельди. Устюндеки урбасы йыртыкъ, башы устюнде топракъ эди. 33 ^rДавут онъа:

– Эгер сен меннен берабер кетсенъ, манъа къыйын оладжакъ. 34 ^sЛякин шеэрге къайтып, Авишаломгъа: «Падишам, мен сенинъ къулум, бугуньге къадар бабанънынъ къулу эдим. Шимди исе сенинъ къулунъ оладжагъым», – деп, меним хатирим ичюн Ахитофелнинъ насиатыны боз. 35Анда Цадокъ ве Авиатар руханийлер бар. Оларгъа падишанынъ эвинде эр бир эшиткен шейни айтып бер. 36 ^tОларнен берабер эки огъуллары да бар: Цадокънынъ огълу Ахимаац ве Авиатарнынъ огълу Ехонатан. Олардан эшиткен эр бир хаберни манъа ёлла, – деди.

37 ^uБойле этип, Давутнынъ досту Хушай шеэрге кельди. Авишалом исе тамам шу вакъыт Ерусалимге кирмекте эди.