‏ 2 Samuel 22

Давут Раббиге шурет йыры йырлай

1РАББИ Давутны эписи душманларындан ве Шаулдан къуртаргъан куню Давут РАББИге бу йырны йырлады: 2РАББИ – меним къаям, меним къалем ве меним Къуртарыджымдыр,
3 ^aАллам – меним къаям, меним къорунгъан еримдир.
О – меним къалкъаным, къуртулышымнынъ къувети,
юксек енъильмез керменим, сакълангъан еримдир, меним Къуртарыджымдыр.
Сен мени зорбалыкълардан къорчалайсынъ!
4 ^bМакътавгъа ляйыкъ РАББИмни чагъыраджагъым,
ве О, мени душманларымдан къуртараджакъ.
5 ^cОлюм далгъалары мени сарып алды,
акъсызлыкънынъ чокълугъы зияде къоркъузды.
6 ^dДжеэннем зынджыры мени багълады,
олюм озю козьлериме бакъты.
7 ^eБашым беляда къалгъанда, РАББИмни чагъырдым, Аллама ялвардым!
Сарайындан О, сесимни эшитти,
яйгъаргъаным Онынъ къулагъына барып етти.
8 ^fЕр юзю тепренип титреди,
коклернинъ темеллери титреп, еринден къыбырдады,
чюнки О, ачувланды.
9 ^gБурнундан тютюн чыкъты,
агъзындан эр шейни ёкъ этиджи атеш фышкъырды,
алевленген комюр сепильди.
10 ^hО, коклерни ачып, ашагъы тюшти,
аякъларынынъ тюбюнде къаранлыкъ эди.
11 ⁱКерувнынъ устюне отурып, учты, ельнинъ къанатларында учып кетти.
12 ^jОзюни къаранлыкънен орьтти,
къара, сувдан агъырлашкъан булутларгъа сарылды.
13Онынъ огюнде йылтырагъан нур джайылды,
Ондан эр шей комюр киби алевленди.
14 ^kРАББИ коклерден гудюрдеди,
Юдже Алланынъ сеси котерильди.
15 ^lОкълар атып, душманларыны дагъытты,
йылдырымнен оларны шашмалатты.
16 ^mРАББИнинъ къоркъунчлы сесинден,
Онынъ ачувлы нефесинден
денъизнинъ сув башы ачылды,
ер юзюнинъ темеллери корюнди.
17 ⁿЮкъарыдан элини узатып, О, мени алды,
терен сувлардан чыкъарды,
18 ^oкучьлю душмандан сакълады,
мени кореджек козю олмагъанлардан,
менден кучьлю душманларымдан къорчалады.
19Башыма беля тюшкенде,
олар манъа уджюм эттилер,
лякин РАББИ манъа ярдым этти.
20 ^pО, мени чаресиз алдан чыкъарды,
менден разы олгъаны ичюн, мени къуртарды.
21 ^qРАББИ инсафлыгъыма коре манъа мукяфат берди,
эллеримнинъ темизлигине коре къайтарды.
22Мен РАББИнинъ эмирлерини туттым,
Алламнынъ огюнде яманлыкъ япмадым.
23Къарарларынынъ эписи – козюм огюнде,
низамнамелеринден чекильмедим мен.
24 ^rОнынъ огюнде къабаатсыз эдим,
гуна япмакътан сакъындым.
25РАББИ инсафлыгъыма коре манъа мукяфат берди,
Онынъ огюнде темизлигиме коре къайтарды.
26Ишанчлы адамнен Сен ишанчлысынъ,
къабаатсыз адамнен – бутюнлей догърусынъ.
27Темиз адамнен – темизсинъ,
яланджыгъа яланына коре бересинъ.
28 ^sАлчакъгонъюллини къуртарасынъ,
макътангъан адамны корип, алчакълатасынъ.
29 ^tСен, РАББИ, – меним нурумсынъ!
РАББИ къаранлыгъымны айдынлата.
30Сенинъ къуветинънен ордуларны къырам,
Алламнен берабер диварларгъа чыкъам.
31 ^uАлланынъ ёлу къусурсыздыр!
РАББИнинъ сёзю къавийдир!
Онъа умют багълагъанларнынъ эписини О, къорчалай!
32 ^vРАББИден гъайры, башкъа Алла бармы?
Алламыздан гъайры, башкъа сарсылмаз къая бармы?
33Алла манъа кучь бере,
догъру ёлны косьтере.
34 ^wАякъларымны джейран киби тез япа,
мени юксеклерге къоя.
35 ^xКъолларымны дженк этмеге азырлай,
эллеримни тунч яйны тартмагъа огрете.
36Манъа берильген къуртарувынъ – къалкъан кибидир,
мераметинъ мени къуветлештире.
37Аякъ тюбюмдеки ёлны кениш япасынъ,
аякъларыма таймагъа ёл бермейсинъ.
38Душмаларымнынъ пешинден къувалайым,
оларны ёкъ этем.
Олар тамамынен гъайып олмагъандже,
артыма къайтмайым.
39Мен оларны енъем, агъыр яралайым.
Олар бир даа котерильмейлер,
аягъым астына йыкъылалар.
40 ^yМанъа дженк этмек ичюн кучь бересинъ,
манъа къаршы исьян котергенлерни огюмде ерге йыкъасынъ.
41 ^zДушманларымны менден къачмагъа меджбур этесинъ,
менден нефретленгенлерни ёкъ этем.
42 ^aaОлар ярдым истейлер, амма оларны къуртаргъан кимсе ёкъ.
РАББИни чагъыралар, амма О, оларны эшитмей.
43 ^abМен оларны тозгъа айландырам,
ердеки топракъ киби япам,
сокъакъ чамурыны киби таптап эзем.
44 ^acСен мени халкъымнынъ исьянындан къорчаладынъ,
тюрлю миллетлерге башлыкъ этмек ичюн, сакъладынъ.
Мен бильмеген халкъ манъа хызмет эте,
45 ^adябанджылар манъа ялтакъланып бойсуналар,
эмирлеримни эшитип, шу ань беджерелер.
46 ^aeЯбанджыларнынъ отьлери патлай,
къалтырап, сакълангъан ерлеринден чыкъалар.
47РАББИ яшай! Онъа, меним къаяма, шукюрлер олсун!
Меним Алламны, Къуртарыджымны,
къаямны шуретленъиз!
48 ^afАлла, Сен меним ичюн интикъам аласынъ,
халкъларны манъа бойсундырасынъ,
49 ^agмени душманларымдан къуртарасынъ.
Сен мени манъа къаршы чыкъкъанлардан юксельттинъ,
мераметсиз адамлардан къуртардынъ!
50 ^ahШунынъ ичюн, РАББИ, чешит тюрлю миллетлернинъ огюнде
Санъа шукюрлер этеджегим,
Адынъа шан йырларыны йырлайджагъым!
51 ^aiСен Озь падишанъны къуртарасынъ,
Озь Месихинъе Давуткъа ве эвлятларына эбедиен севгинъни косьтересинъ!