2Sa 6 | CrhCTB | STEP | Давут кене 30 000 энъ яхшы Исраиль аскерлерини топлады.

‏ 2 Samuel 6

Васиет Сандыгъыны Ерусалимге кетирелер

1 Давут кене 30 000 энъ яхшы Исраиль аскерлерини топлады. 2 ^aО, бутюн халкънен берабер Алланынъ Адыны, Ордулар Раббисининъ Адыны ташыгъан Сандыкъны – Керувларнынъ Устюнде Отургъан РАББИнинъ Сандыгъыны Баале-Ехудадан ^{▼▼Баале-Ехуда – бу шеэрнинъ башкъа ады – Кирьят-Ярим.} алмагъа чыкъты. 3 ^cАлланынъ Сандыгъыны Авинадавнынъ дагъ устюндеки эвинден чыкъарып, янъы арабагъа къойдылар ве алып чыкътылар. Авинадавнынъ эки огълу – Узза ве Агъё янъы арабаны алып кеттилер. 4 Бойлеликнен, Алланынъ Сандыгъыны янъы арабада Авинадавнынъ дагъ устюндеки эвинден чыкъардылар. Агъё Сандыкънынъ огюнде кете эди. 5 Давут ве Исраиль огъуллары РАББИнинъ огюнде байрам япып, кипарис агъачындан ясалгъан чешит чалгъы алетлеринде ве сантыр, арфа, даре, шакъылдакъ ве зиллерде чалдылар.

6 ^dНакъон арманына кельгенде, бугъалар абындылар ве Алланынъ Сандыгъы авдарылды. Узза къолуны узатып, оны тутып къалды. 7 Лякин РАББИ Уззагъа ачувланды ве онынъ урьметсизлиги ичюн оны шу ерде ольдюрди. Бойлеликнен, о Алланынъ Сандыгъы янында ольди.

8 РАББИ Уззаны ургъаны ичюн, Давут пек ачувланды. Шу ер шимдиге къадар Перец-Узза ^{▼▼Перец-Узза – къ. еуд. бу ибаренинъ айтылувы «парац-Узза» (Уззаны урды) ибаресининъ айтылувына ошай.} деген ад ташый.

9 Давут шу куню РАББИден пек къоркъты ве:

– РАББИнинъ Сандыгъыны насыл этип озюме кетирейим? – деди.

10 Бунынъ ичюн Давут РАББИнинъ Сандыгъыны озюне, Давут Шеэрине алып кетмеге истемеди ве ёлдан бурулып, гъатлы Овед-Эдомнынъ эвинде къалдырды. 11 ^fРАББИнинъ Сандыгъы гъатлы Овед-Эдомнынъ эвинде учь ай къалды, ве РАББИ онъа ве бутюн союна берекет берди. 12 Давуткъа: «РАББИ Озюнинъ Сандыгъы хатири ичюн Овед-Эдомнынъ союна ве онынъ бутюн барлыгъына берекет берди», – дегенде, Давут барып, Овед-Эдомнынъ эвинден Алланынъ Сандыгъыны Давут Шеэрине тантаналы суретте кечирди. 13 РАББИнинъ Сандыгъыны алып кеткенлернинъ эр алты адымындан сонъ Давут бир бугъа ве бир бесленген тананы къурбан чала эди. 14 ^gДавут, кетен эфод кийип, бар кучюнен РАББИнинъ огюнде ойнай эди. 15 Бойле этип, багъыра-чагъыра, борулар чалып, Давут ве исраиллилер РАББИнинъ Сандыгъыны алып кеттилер.

16 ^hРАББИнинъ Сандыгъыны Давут Шеэрине кетиргенде, Микъал, Шаулнынъ къызы, пенджереден бакъты ве РАББИнинъ огюнде секирген ве ойнагъан Давут падишаны корип, оны кореджек козю олмады.

17 ⁱРАББИнинъ Сандыгъыны кетирдилер ве оны озь ерине, Давут азырлагъан чадырнынъ ортасына къойдылар. Сонъ Давут РАББИнинъ огюнде къурбанлар чалып бутюнлей якъты, аманлыкъ къурбанларыны да чалды. 18 ^jКъурбанларны чалып битирген сонъ, Давут халкъкъа Ордуларнынъ РАББИси Адындан эйилик тиледи 19 ве бутюн халкъкъа: исраиллилернинъ эм акъайына, эм апайына – эр бирине бирер отьмек, басылгъан хурма ве юзюм къурусы даркъатты. Сонъ эр кес озь эвине къайтты.

20 Давут озь эвини багъышламагъа къайткъан сонъ, Микъал, Шаулнынъ къызы, оны къаршылап чыкъты ве:

– Бугунь Исраиль падишасы хызметчилерининъ къадын къуллары огюнде насыл да шурет къазанды! Бир ахмакъ киби, сен озюнънинъ айып ерлеринъни косьтердинъ! – деди.

21 ^kДавут исе Микъалгъа:

– Мен буны РАББИнинъ огюнде яптым. О, мени сенинъ бабанъ ве бутюн бабанънынъ союндан яхшы корьди ве Озюнинъ халкъына Исраильге ёлбашчы этип къойды. Шунынъ ичюн мен РАББИнинъ огюнде шенъленип ойнайджагъым! – деди. 22 – Мен даа да бетер алчакъланырым, озь козьлеримде алчакъ олурым, амма сен айткъан къадын къулларынынъ козю огюнде шанлы-шуретли олурым! – деди.

23 Бундан сонъ Шаул къызы Микъал озюнинъ олюмине къадар бир бала догъмады.