‏ 2 Timothy 2

Иса Месихнинъ яхшы аскери

1Огълум, Иса Месихте тапкъан эйиликнен къавийлеш. 2Чокъ шаатларнынъ огюнде менден эшиткен бутюн шейлерни ишанчлы адамларгъа айтып бер. О вакъыт олар да башкъаларны огретип олур. 3 ^aИса Месихнинъ яхшы бир аскери киби, азапларгъа даян. 4Башлыгъынынъ разылыгъыны къазанмакъ ичюн, ич бир аскер куньделик ишлернен огърашмаз. 5 ^bСпорт ярышларына къошулгъан адам къанунларны бозса, енъиш таджыны киймез. 6 ^cЧалышкъан койлю берекеттен озь пайыны биринджи олып алмакъ керек. 7Айткъанларымны яхшы анъла. Рабби эр шейни санъа анълатыр.

8 ^dДавутнынъ союндан олгъан, Мен даркъатаяткъан Къуванчлы Хаберге коре олюлерден тирильген Иса Месихни акълынъда тут. 9 ^eБу Къуванчлы Хабер ичюн мен, яманлыкъ япкъан адам киби, зынджырларгъа багъланып, азап чекем. Амма Алланынъ Сёзюни зынджырларнен багъламагъа мумкюн дегиль!

10 ^fШу себептен, сайлагъан адамлар ичюн эр шейге даянам, олар да Иса Месихте олгъан къуртулышны ве эбедий шуретни алсынлар. 11 ^gБу сёзлер догърудыр: Эгер Онен берабер ольген олсакъ, Онен берабер яшайджакъмыз.
12 ^hЭгер сабыр этсек, Онен берабер падишалыкъ япаджакъмыз.
Эгер Оны инкяр этсек, О да бизни инкяр этеджек.
13 ⁱЭгер ишанчлы олмасакъ, О ишанчлы олып къаладжакъ,
чюнки О Озюни инкяр этип оламай.

Яхшы ишке ляйыкъ

14 ^jБу шейлерни хатырлатып тур, адамларны Раббининъ огюнде тенбиеле, олар сёзлер акъкъында даваларны башламасынлар. Бойле даваларнынъ файдасы ёкъ, олар тек динълейиджилерни ёкъ этелер. 15Алланынъ козю огюнде ляйыкъ олмагъа гъайретнен тырыш, утанмайып чалышкъан ишчи ол, акъикъат сёзюни догъру къулланып огрет. 16 ^kБош, алласыз лафлардан узакълаш. Бу лафларгъа берильгенлер баргъан сайын алласыз олалар. 17 ^lОларнынъ лафлары гангрена киби даркъала. Мына, Хименай ве Филит бойле адамлардандыр. 18 ^mТирилиш куню энди кельди, деп, олар акъикъат ёлундан урулып, базыларнынъ иманыны бозалар. 19 ⁿЛякин Алла къойгъан темель къавийдир, онда бойле сёзлер печат киби къоюлгъан: «Рабби ким Онынъки олгъаныны биле» ве «Раббининъ Адыны тилине алгъан эр бир адам яманлыкътан узакълашсын!»

20 ^oБуюк бир эвде тек алтындан ве кумюштен япылгъан савутлар дегиль, олардан гъайры агъачтан ве балчыкътан ясалгъан савутлар да олур. Оларнынъ базылары айры къулланув ичюн, башкъалары адий къулланув ичюндир. 21Озюни мен айткъан шейлерден темизлеген адам яхшы савут киби олур, элялланыр ве эр бир яхшы ишке ярар, ве Эфендиси онен файдалана билир.

22 ^pЯшлыкънынъ истеклеринден къач. Раббини чагъыргъан бутюн адамларнен берабер темиз юректен инсафлыкъ, иман, севги ве тынчлыкъ-аманлыкъкъа ынтыл. 23 ^qАхмакъ ве джаиль давалардан узакълаш. Олар тек къавгъагъа себеп олгъаныны билесинъ. 24Алланынъ къулуна къавгъалашмагъа мумкюн дегиль. Аксине, Алланынъ къулу эписинен мераметли, огретмеге азыр, сабырлы олмакъ керек. 25 ^rО, озюне къаршы тургъанларгъа йымшакълыкънен огют-насиат бермек керек. Бельки, Алла бойле адамларгъа тёвбе этмеге ёл ачар, ве олар акъикъатны билир, 26 ^sозюне келирлер ве оларны эсирге алгъан, озь истегенини япмагъа меджбур эткен Шейтаннынъ къапкъанындан къуртулырлар.