‏ 2 Timothy 3

Сонъки куньлер акъкъында

1 ^aДаа шуны биль: сонъки куньлерде агъыр вакъытлар келеджек. 2 ^bАдамлар тек озьлерини ве акъчаны севеджеклер, макътанчакъ, къопай, куфюрагъыз, ана-бабаны урьмет этмеген, яхшылыкъ анъламагъан, яман, 3 ^cсевгисиз, багъышламагъан, ифтираджы, озюни къолда тутмагъан, мераметсиз, яхшылыкъны кореджек козю олмагъан, 4саткъын, фикирсиз, къопай адамлар оладжакълар. Алланы дегиль, эгленджени севеджеклер. 5Озьлерини диндар косьтерип, диндар омюрнинъ кучюни инкяр этеджеклер. Бойле адамлардан узакълаш.

6Оларнынъ арасында фикирсиз къадынларнынъ эвлерине сокъулып, оларны ёлдан ургъан адамлар да бар. Бу къадынлар гуна астындалар ве чокъ тюрлю истеклерге берильген. 7Олар эр вакъыт бир шейни огренелер, амма ич бир вакъыт акъикъатны билип оламайлар. 8Янн ве Ямбр Мусагъа насыл къаршы чыкъкъан олсалар, бу адамлар да акъикъаткъа къаршы чыкъалар. Акъыллары бозукъ, иманда сынавдан кечип оламагъан адамлардыр. 9 ^dАмма олар узакъкъа бармаз. Янн ве Ямбрнынъ акъылсызлыгъы белли олгъаны киби, оларнынъ акъылсызлыгъы да эписине ачыкъ-айдын олур.

Насиатлар

10Сен эр вакъыт меним артымдан юре эдинъ, огретювимни, яшайышымны, макъсадымны, иманымны, сабырымны ве севгимни билесинъ, 11 ^eбашыма кельген къувувларны ве азапларымны да билесинъ. Антиохия, Иконий ве Листра шеэрлеринде мени къува эдилер, Рабби исе мени эписинден къуртарды.

12 ^fИса Месихнен бирликте диндар яшамагъа истеген адамларнынъ эписи къувувгъа огърар. 13 ^gЯманлар ве доландырыджылар исе башкъаларыны алдата-алдата, озьлерини де алдатып, яман ишлерини девам этеджеклер.

14Сен исе огренген ве къатты инангъан шейлерде тур; бу огретювни кимден алгъанынъны билесинъ. 15 ^hСен Мукъаддес Языны балалыгъынъда огрендинъ. Язы Иса Месихке иман ярдымынен къуртулышны насыл алмагъа акъыл огретмек мумкюн. 16 ⁱБутюн Язы Алланынъ Рухундан ильхам алып язылгъандыр ве огретмек, гунаны ярыкъкъа чыкъармакъ, адамларны догъру ёлгъа къоймакъ, инсафлыкъ ёлунда тербие бермек ичюн файдалыдыр, ^jве бойлеликнен, Алланынъ адамына эр шейни япмагъа къабилиетини бере, оны эр бир яхшы ишке азырлай.17