2Ti 4 | CrhCTB | STEP | Сени Алланынъ огюнде ве падишалыкъ этмек ичюн келеджек, эм тирилерни, эм олюлерни суд этеджек Иса Месихнинъ огюнде тенбиелейим:

‏ 2 Timothy 4

1 ^aСени Алланынъ огюнде ве падишалыкъ этмек ичюн келеджек, эм тирилерни, эм олюлерни суд этеджек Иса Месихнинъ огюнде тенбиелейим: 2 ^bАлланынъ Сёзюни огрет, келишкен ве келишмеген вакъытта азыр ол, буюк сабырнен ве насиатнен гуналарны ярыкъкъа чыкъар, тенбиеле ве юреклендир. 3 Ойле бир вакъыт келеджек ки, адамлар догъру огретювден юзь чевиреджеклер, оджаларыны озь истеклерине коре сайлайджакълар ве озь бегенген шейлерни динълейджеклер, 4 къулакъларыны акъикъат сёзюнден чевирип, масаллар тарафына айланаджакълар. 5 ^cАмма сен эр шейге айыныкъ ол, агъырлыкъкъа даян, Къуванчлы Хаберни даркъат, хызметинъни яхшы беджер.

6 ^dМен, Аллагъа кетирильген ичерлик бахшышы киби тёкюлем, бу дюньядан кетеджек вакътым якъынлашты. 7 ^eМен яхшы курештим, чапувымны битирдим, иманымны сакълап къалдым. 8 ^fЭнди мени инсафлыкъ таджы беклей. Оны манъа адалетли къады олгъан Рабби о куню береджек, ве тек манъа дегиль, Онынъ келювини севгинен беклегенлернинъ эписине де береджек.

Шахсий тилеклер

9 Манъа якъын арада кельмеге тырыш. 10 ^gДемас шимдики дюньяны севип, мени къалдырды ве Тессалонике шеэрине кетти. Креск – Галатиягъа, Тит – Далматиягъа кеттилер. 11 ^hЯнымда тек Лука къалды. Маркны озюнънен берабер алып кель, о манъа хызмет ичюн файдалыдыр. 12 ⁱТихикни мен Эфес шеэрине ёлладым. 13 ^jСен мында кельгенде, Троас шеэринде Къарпнынъ янында мен къалдыргъан урбаны ве китапларны, айрыджа пергамент устюнде язылгъан эльязмаларны алып кель.

14 ^kБакъырджы Эскендер манъа чокъ яманлыкъ этти. Рабби онъа япкъанларына ляйыкъ олгъан джезасыны берсин. 15 Сен ондан сакът ол, чюнки о бизим сёзлеримизге къатты къаршылыкъ косьтерди.

16 Озюмни биринджи кере къорчалагъанымда, ич кимсе меним тарафымны алмады, аксине, эписи мени ташлап кеттилер. Олар бунынъ ичюн джевап бермесин. 17 ^lЯнымда Рабби турды ве манъа кучь берди, ве шу себептен мен Къуванчлы Хаберни бутюнлей бильдирдим, ве оны бутюн халкълар эшитти. Мен арсланнынъ агъзындан къуртулдым. 18 Рабби мени адамларнынъ эр бир яман япкъанларындан къорчалайджакъ ве Озюнинъ коктеки Падишалыгъына сагъ-селямет кирсетеджек. Онъа асырлардан асырларгъа шуретлер олсун! Амин.

Селямлар

19 ^mПрискагъа, Акилагъа ве Онисифорнынъ эвдекилерине селям эт. 20 ⁿЭраст Коринт шеэринде къалды. Трофимни хаста алында мен Милет шеэринде къалдырдым. 21 Къыш башланмаздан эвель кельмеге тырыш. Эвбул, Пуд, Лин, Клавдия ве бутюн дин къардашлары санъа селям этелер. 22 Рабби сенинъ рухунънен бирликте олсун! Эйилик сизнен олсун!