‏ Acts 2

Мукъаддес Рухнынъ энгени

1 ^aБерекет Байрамы кельгенде, шегиртлернинъ эписи бир ерде топлашып тура эдилер. 2Апансыздан коктен кучьлю ельнинъ уфюргенине ошагъан бир увулты чыкъты да, олар тургъан эвни бутюнлей толдурды. 3 ^bОларгъа атешке ошап айры-айры олгъан тиллер корюнди, эр бирининъ устюне къонды. 4 ^cЭписи Мукъаддес Рухкъа толдылар ве Рух оларгъа муим шейлер айтмагъа берген къабилиетинен эджнебий тиллерде лакъырды этип башладылар.

5Шу вакъыт Ерусалимде дюньянынъ эр бир халкъындан кельген иманлы еудийлер булуна эдилер. 6Бу шамата чыкъкъанда, чокъ адам топлашты. Эр бири озь тилинде лакъырды эткенини эшитип, шаштылар. 7Эписи тааджипленип ве айретте къалып, озьара:

– Бу лакъырды эткенлернинъ эписи галилеялылар дегильми? 8Насыл ола да, эр биримиз озь ана тилимизни эшитемиз? 9Партлылар, мадайлылар ве эламлылар, Месопотамия, Еудие, Къаппадокия, Понт ве Кучюк Асияда яшагъан, 10Фригия, Памфилия, Мысыр ве Ливиянынъ Кирене этрафындаки ерлерде яшагъан, Римден кельген 11 ^dеудийлер ве еудий динини къабул эткенлер, критлилер ве араплар олып, биз тиллеримизде Алланынъ буюк ишлери акъкъында айткъанларыны эшитемиз, – дедилер. 12Эписи шашып къалып, бир-бирине:

– Бу насыл шей? – деп тааджиплендилер. 13 ^eБашкъалары исе масхара этип:

– Олар татлы шарап ичип тойгъанлар, – дедилер.

Пётрнынъ нуткъу

14О вакъыт Пётр он бир эльчинен берабер турып, кучьлю сеснен халкъкъа мураджаат этти:

– Эй, Еудие акъайлары ве Ерусалимде яшагъан эписи адамлар! Сёзлериме къулакъ асып, шуны билинъиз: 15бу адамлар, сиз тюшюнгенинъиз киби, сархош дегиллер. Шимди даа саба саат докъуз! 16 ^fМында олгъан шей исе Ёэль пейгъамбернен бильдирильген эди: 17 ^gМына, сонъки куньлерде бойле шей оладжакъ, – дей Алла:
– Мен эписи адамларнынъ устюне
Озь Рухумны ягъдыраджагъым.
Сизинъ огъул ве къызларынъыз пейгъамберлик япаджакълар,
йигитлеринъиз руялар кореджеклер,
къартларынъыз беджериледжек тюшлер кореджеклер.
18О куньлерде къулларымнынъ устюне де
Озь Рухумны ягъдыраджагъым,
олар да пейгъамберлик япаджакълар.
19 ^hЮкъарыда кокте аджайип шейлер япаджагъым,
ашагъыда ер юзюнде бельгилер береджегим,
къан, атеш ве къою думан киби тютюн ёллайджагъым.
20 ⁱРаббининъ улу ве шанлы куню кельмезден эвель,
кунеш къаранлыкъ оладжакъ,
ай къан киби оладжакъ.
21 ^jО вакъыт Раббининъ Адыны айтып чагъыргъан
эр бир адам къуртуладжакъ.

22 ^kЭй, Исраиль акъайлары, бу сёзлерни динъленъиз! Назарет шеэринден олгъан Исанынъ вастасынен Алла къудретли ве аджайип шейлер япты ве бельгилер косьтерди. Сиз буларнынъ эписини билесиз. Оларнынъ эсасында Алла Исаны тасдыкълады. 23 ^lАлла эвельден къарар чыкъаргъаны ве эвельден бильгени киби, Иса сатылгъан эди, ве сиз адалетсиз адамларнынъ къолунен Оны хачкъа мыхлап ольдюрдинъиз. 24 ^mЛякин Алла олюм зынджырларыны узип, Оны тирильтти, чюнки олюм Оны тутып оламаз эди. 25 ⁿДавут Иса акъкъында шойле деген: – Раббини эр вакъыт огюмде коре эдим:
Мен ич бир шейден къоркъмайым деп,
О, меним онъ тарафымдадыр.
26Шунынъ ичюн юрегим къуванчкъа толды,
тилимден шадлыкъ тёкюльди.
Теним умют иле раатнен яшайджакъ.
27 ^oСен джанымны олюлер дюньясында ташлап кетмезсинъ,
Азизинъе чюрюп ёкъ олмагъа ёл бермезсинъ.
28 ^pМанъа аят ёлларыны бильдирдинъ,
Озь огюнъде мени бахыт-къуванчнен толдураджакъсынъ.

29 ^qДин къардашларымыз! Сизлерге бабамыз Давут акъкъында догърудан-догъру айтмагъа рухсет этинъиз: о ольди, оны дефн эттилер ве онынъ къабри бугуньгедже бизде бардыр. 30 ^rО, пейгъамбер олгъаны ичюн, шуны биле эди ки, Алла онынъ союндан олгъан бирини тахткъа отуртаджагъына ант этти. 31 ^sДавут Месихнинъ тириледжегини эвельден корип, Онынъ олюлер дюньясына ташланмайджагъы, бедени исе чюрюмейджеги акъкъында бильдирген эди. 32Алла бу Исаны тирильтти, бунъа биз эпимиз шаат олдыкъ. 33 ^tО, Алланынъ къудретинен юксельтильгенден сонъ, Бабанынъ вадеси боюнджа Мукъаддес Рухны алып, бизге ягъдырды. Шимди сизлер буны корип, эшитип турасыз. 34– 35 ^uДавут озю кокке котерильмеген эди, амма бойле деген: РАББИ меним Раббиме айтты:
– Душманларынъны аякъларынъ астына йыкътырмагъанымдже,
Меним онъ тарафымда отур.

36Бойледже, бутюн Исраиль халкъы буны къатты бильсин ки, Алла сизлер хачкъа мыхлагъан бу Исаны Рабби ве Месих япты!

37 ^vБу сёзлерни эшиткенлер юреклерине окъ санчылгъан киби олдылар, Пётр ве башкъа эльчилерге:

– Дин къардашларымыз, биз не япайыкъ? – дедилер. 38 ^wПётр оларгъа:

– Тёвбе этинъиз, гуналарынъыз багъышланмасы ичюн эр биринъиз Иса Месих Адындан сувгъа батырылып чыкъынъыз. О вакъыт Мукъаддес Рух сизге бахшыш олып бериледжек. 39 ^xБу ваде сизлернен балаларынъызгъа ве даа узакъта олгъан, бизим Алла Раббимиз чагъыргъан эписи адамларгъа берильген, – деди.

40Пётр даа чокъ башкъа сёзлернен оларны тенбиелеп, насиат берип:

– Озюнъизни бу бозукъ несильден къуртарынъыз! – дей эди.

41Бойледже, онынъ сёзюни ачыкъ гонъюльден къабул эткенлер сувгъа батырылып чыкътылар. Шу куню учь бинъге якъын джан иманлыларгъа къошулды. 42Олар эльчилернинъ талиматыны огренип, эр вакъыт бирликте яшай ве хызмет эте, отьмек боле ве дува окъуй эдилер. 43Эр бир джан Алладан къоркъа эди. Эльчилернинъ ярдымынен чокъ аджайип шей ве бельгилер косьтерильди.

Иманлыларнынъ яшайышы

44 ^yЭписи иманлылар бирлик олып, эр шейлерини болип яшай эдилер. 45Мал-мульклерини сатып, эписине, эр кеснинъ ихтияджына коре пай этип, ярдым эте эдилер. 46Олар эр кунь бир юрекнен Алланынъ Сарайында топлаша, эвлеринде отьмек болип, къуванчнен ве адийликнен ашай 47ве Аллагъа шукюр эте эдилер. Оларны бутюн халкъ севе эди. Алла кунь сайын иманлылар сырасына къуртарылгъанларны къоша эди.