Amos 5
Тёвбе этмеге чагъырув
1Эй, Исраиль эви, Меним сизлер ичюнагълав йырымны динъленъиз:
2 a– Исраиль къыз йыкъылды,
бир даа турып оламаз.
О, озь топрагъында къалдырылды,
оны турсатаджакъ кимсе ёкъ.
3РАББИ-ТААЛЯ бойле дей:
– Исраильде бир шеэрден бинъ адам дженкке чыкъса,
юз адам сагъ къаладжакъ,
юз адам дженк этмеге чыкъса,
он адам сагъ къаладжакъ.
4 bШунынъ ичюн РАББИ Исраиль эвине бойле дей:
– Манъа къайтынъыз, ве сагъ къалырсынъыз.
5 cБет-Эльге кетменъиз,
Гилгалгъа кирменъиз,
Беэр-Шева шеэрине кечменъиз.
Гилгал шеэри сюргюн этиледжек,
Бет-Эль шеэри гъайып оладжакъ.
6 dРАББИге къайтынъыз, ве сагъ къалырсынъыз.
Ёкъса О, атеш киби, Юсуф эвине атыладжакъ
ве Бет-Эльни якъып ёкъ этеджек.
Янгъынны сёндюреджек кимсе олмаз.
7Эй, адалетни зеэрге чевиргенлер,
акъикъатны ерге ургъанлар!
8 eАлла Улькер ве Орион йылдыз такъымларыны яраткъан.
О, зифт къаранлыкъны саба ярыгъына чевире,
куньдюзни геджеге айландыра,
денъиз сувларыны чагъырып,
оларны ер юзюне тёке.
Онынъ Ады – РАББИдир!
9О, кучьлю адамны бирден йыкъа,
къалелерни ёкъ эте.
10 fСиз исе адалетли суд эткенлерни нефрет этесиз,
догърусыны айткъанларны кореджек козюнъиз ёкъ.
11 gСиз фукъарелерни таптайсынъыз,
олардан богъдай бергисини аласынъыз.
Шунынъ ичюн паалы таш эвлер къурарсыз,
лякин анда яшамазсыз,
гузель юзюм багъларыны сачарсыз,
лякин оларнынъ шарабыны ичмезсиз.
12 hКъанунсыз ишлеринъиз не къадар чокъ,
гуналарынъыз не къадар буюк олгъаныны билем.
Сиз инсафлы адамларгъа душманлыкъ япасыз,
къапар аласыз ве фукъарелерни адалетли суд этмейсиз!
13Шунынъ ичюн акъыллы адам бойле вакъыт агъзыны ачмаз,
чюнки заман ямандыр.
14Яманлыкъны япманъыз,
амма эйиликке ынтылынъыз.
О вакъыт сиз сагъ къалырсыз,
ве Ордуларнынъ РАББИ-Таалясы сизнен олур,
Онынъ сизнен олгъаныны айткъанынъыз догъру оладжакъ.
15 iЯманлыкъны кореджек козюнъиз олмасын,
лякин эйиликни севинъиз,
шеэр араба къапусы янында адалетли суд этинъиз.
Бельки о вакъыт РАББИ, Ордуларнынъ Алласы,
Юсуфнынъ эвинден сагъ къалгъанларгъа
мерамет косьтерир.
16 jШунынъ ичюн РАББИ-Тааля, Ордуларнынъ Алласы, бойле дей:
– Бутюн мейданларда къычырып агълайджакълар,
эписи сокъакъларда: «Ах, вай-вай-вай!» – дейджеклер,
койлюлерни матем тутмагъа,
такъмакъчыларны такъмакъламагъа чагъыраджакълар.
17 kБутюн юзюм багъларында къычырып агълайджакълар,
чюнки Мен аранъыздан джезанен кечеджегим, – дей РАББИ.
18 lРАББИнинъ куню келювини истегенлерге беля олсун!
РАББИнинъ куню сизге неге керектир?
О ярыкъ дегиль, къаранлыкъ оладжакътыр.
19О вакъыт бири насыл арсландан къачар да,
огюне аюв чыкъар,
эвине къайтып къолунен диваргъа таяныр да,
къолуны йылан тишлер.
20РАББИнинъ куню ярыкъны дегиль,
къаранлыкъны кетиреджек.
О – гъамлы къаранлыкътыр,
бир парылды биле ёкъ.
21 mБайрамларынъызны кореджек козюм ёкъ,
оларны ред этем,
азиз топлашувларынъызны къабул этмейим.
22Манъа бутюнлей якъыладжакъ къурбанларны
ве ашлыкъ бахшышларыны кетирсенъиз,
Мен олардан разы олмайджагъым,
бакъылгъан бузавларынъыздан чалгъан
аманлыкъ къурбанларынъызны къабул этмейджегим.
23Йырлар шаматасыны Менден узакъ тутунъыз,
арфаларынъызнынъ сесини динълемейджегим.
24Лякин адалет, сув киби, акъсын,
акъикъат да, къурумайджакъ озен киби, олсун.
25 nЭй, Исраиль эви, къыркъ йыл сахрада
Манъа къурбан ве ашлыкъ бахшышларыны кетирдинъизми?
26Сиз падишанъыз Сикъкъутнынъ ве Киййуннынъ путларынъызны,
озюнъиз ичюн япкъан аллаларынъызнынъ йылдызыны алып ташыдынъыз ▼
▼Септ. эльязмасында: «Сиз Молек падишанъызнынъ чадырыны ве алланъыз Рефаннынъ йылдызыны, озюнъиз ичюн япкъан аллаларынъызны котерип юре эдинъиз».
.27 pШунынъ ичюн Мен сизни Дамасктан узакъ ерге сюргюн этеджегим, – дей РАББИ.
Онынъ Ады – Ордуларнынъ Алласыдыр!
Copyright information for
CrhCTB