‏ Amos 1

Алланынъ суду акъкъында

1 ^aАмоснынъ пейгъамберлик сёзлери. О, Текъоя шеэринде бир айванасравджы эди. Амос Ехуда падишасы Уззиянынъ куньлеринде ве Исраиль падишасы Ёашнынъ огълу Еровоам куньлеринде, зельзеледен эки йыл эвельси, Исраиль акъкъында руялар корьди.

2 ^bАмос бойле деди:
– РАББИ Сиондан гудюрдей,
Ерусалимден сес бере.
Чобанларнынъ отлакълары къуруп къала,
Къармел дагъынынъ устюнде олгъан бутюн ешиллик къаврап къала.

3 ^cРАББИ бойле дей:
– Гуна устюне гуна къазангъанлары ичюн,
Дамаскта яшагъанларны мытлакъа джезалайджагъым.
Чюнки олар Гилад халкъына,
ашлыкъны демир алетлернен бастыргъан дайын, шефкъатсыз янаштылар.
4 ^dХазаэлнинъ эвине атеш ёллайджагъым,
о, Бен-Хададнынъ къавийлештирильген сарайларыны якъып ташлайджакъ.
5 ^eДамаскнынъ араба къапу мандалларыны урып-парлайджагъым,
Авен вадийинде яшагъанларны
ве Бет-Эденден падишаны къырып ташлайджагъым,
ве арамлылар Кир шеэрине сюргюн этиледжек, – дей РАББИ.

6 ^fРАББИ бойле дей:
– Гуна устюне гуна къазангъанлары ичюн,
Гъазада яшагъанларны мытлакъа джезалайджагъым.
Чюнки олар бутюн халкъны сюргюн этти
ве эдомлыларнынъ къолларына берди.
7Гъаза шеэрининъ диварларына атеш ёллайджагъым,
о, къавийлештирильген сарайларыны якъып ташлайджакъ.
8 ^gАшдод шеэринде яшагъанларны
ве Ашкелон падишасыны къырып ташлайджагъым.
Экрон шеэрини юмругъымнен ураджагъым,
ве эр бир къалгъан фелестинли гъайып оладжакъ, – дей РАББИ-ТААЛЯ.

9 ^hРАББИ бойле дей:
– Гуна устюне гуна къазангъанлары ичюн,
Тир шеэринде яшагъанларны мытлакъа джезалайджагъым.
Чюнки олар эписи сюргюн этильгенлерни эдомлыларнынъ къолларына берди,
достлукъ мунасебетлерини акъылгъа кетирмеди.
10Тир диварларына атеш ёллайджагъым,
о, къавийлештирильген сарайларыны якъып ташлайджакъ.

11 ⁱРАББИ бойле дей:
– Гуна устюне гуна къазангъанлары ичюн,
эдомлыларны мытлакъа джезалайджагъым.
Чюнки олар къардашлары исраиллилернинъ артындан къылычнен къувалады,
мераметсиз олды,
ачувына чыкъмагъа ёл берди, ве гъазабы сонъсуз эди.
12Теман шеэрине атеш ёллайджагъым,
о, Боцранынъ къавийлештирильген сарайларыны якъып ташлайджакъ.

13 ^jРАББИ бойле дей:
– Гуна устюне гуна къазангъанлары ичюн,
аммонлыларны мытлакъа джезалайджагъым.
Чюнки олар, озь мемлекетине башкъа топракъларны къошмакъ ичюн,
Гиладда юклю къадынларнынъ къурсакъларыны яра эди.
14 ^kРабба шеэрининъ диварларында атеш якъаджагъым,
о, къавийлештирильген сарайларыны якъып ташлайджакъ.
О уруш куню адамлар чокъ багъыраджакъ,
уджюм куню боран къутураджакъ.
^lОларнынъ падишасы сюргюнликке кетеджек,
онынъ башлыкълары да онен берабер оладжакъ, – дей РАББИ.
15