‏ Colossians 3

1 ^aБойлеликнен, эгер сизлер Месихнен берабер тирильген олсанъыз, коклердеки шейлерни къыдырынъыз; анда Месих Алланынъ онъ тарафында отура. 2Ер юзюндеки дегиль, коклердеки шейлерни тюшюнинъиз. 3 ^bСизлер ольдинъиз, ве янъы омрюнъиз Месихнен бирликте Аллада сакълыдыр. 4 ^cСизинъ омрюнъиз – Месих. О, пейда оладжакъ вакъытта сизлер Онен берабер шуретте пейда оладжакъсынъыз.

Эски ве янъы омюр

5 ^dОнынъ ичюн, сизинъ гуналы табиатынъызны: ороспулыкъ, пислик, ахлякъсызлыкъ, яман арзулар ве путперестликке тенъ олгъан ачкозьликни ёкъ этинъиз. 6 ^eБулар ичюн Алланынъ гъазабы Онынъ сёзюни динълемегенлернинъ башына тюшеджек. 7 ^fСизлер де бир вакъытлары бойле ёллардан бара эдинъиз, оларнынъ арасында яшай эдинъиз.

8 ^gШимди исе буларнынъ эписини: гъазап, ачув ве яманлыкъны бир четке къоюнъыз; агъызынъыздан ифтира ве сёгюш чыкъмасын. 9 ^hБири-биринъизге ялан айтманъыз, чюнки сизлер ичинъиздеки эски адамны яман япкъанларынен берабер озюнъизден айырдынъыз 10 ⁱве янъы адамнынъ табиатыны алдынъыз; о, бильги ярдымынен Яратыджынынъ къыяфетине коре янъы ола. 11 ^jМында шимди не юнан бар не еудий, не сюннетли бар не сюннетсиз, не варвар бар не скиф, не къул бар не азат, лякин тек Месих бар. О – эр шей ве эр шейдедир.

12 ^kШунынъ ичюн, Алланынъ азиз ве севимли сайлангъан адамлары олып, шефкъат, мераметлик, эйилик, алчакъгонъюллик, йымшакълыкъ ве сабыргъа кийининъиз. 13 ^lБири-биринъизге чыданъыз; эгер бир адам экинджисине шикяет этсе, бири-биринъизни багъышланъыз. Месих сизлерни багъышлагъан киби, сизлер де бири-биринъизни багъышланъыз. 14 ^mБуларнынъ устюне севгини кийинъиз, чюнки о, буларнынъ эписини эр шейден яхшы багълай.

15 ⁿЮрегинъизде Месихнинъ аманлыгъы падишалыкъ этсин; сизлер, бир беденнинъ азалары олып, бунъа чагъырылдынъыз.

Миннетдар олунъыз.

16 ^oИчинъизде Месихнинъ сёзю бутюн зенгинлигинен яшасын. Бутюн икметнен бири-биринъизни огретинъиз ве тенбиеленъиз; сизинъ юреклеринъизде Аллагъа зебурлар, макътав йырлары ве рухий тюркюлерни миннетдарлыкънен йырланъыз. 17 ^pНе айтсанъыз я да не япсанъыз, эписини Рабби Исанынъ Адына япынъыз ве Онынъ ярдымынен Алла Бабагъа шукюр этинъиз.

Янъы омюрдеки бизим араларымыз

18 ^qКъадынлар, Раббиде яшагъанларгъа ярашкъаны киби, акъайларынъызгъа бойсунынъыз.

19 ^rАкъайлар, апайларынъызны севинъиз, оларгъа серт олманъыз.

20 ^sБалалар, ана-бабаларынъызнынъ сёзюни эр шейде динъленъиз. Рабби буны бегене.

21Бабалар, балаларынъызны ачувландырманъыз, ёкъса олар рухтан тюшеджеклер.

22 ^tКъуллар, дюньядаки эфендилеринъизнинъ сёзюни эр шейде динъленъиз, козьге корюнмеге, адамларнынъ разылыгъыны къыдыргъанлар киби дегиль, буны саф юрекнен, Алладан къоркъып япынъыз. 23Эр бир япкъан ишинъизни адамлар ичюн дегиль, Рабби ичюн киби, джан-юрекнен япынъыз. 24 ^uБилесиз ки, сиз Рабби Месихке хызмет этесиз ве Раббиден мирас мукяфатыны аладжакъсынъыз. ^vКим исе яманлыкъ япса, япкъанына коре джезасыны аладжакъ. Алла адамларгъа тенъ бакъа.25