Dan 10 | CrhCTB | STEP | Фарс падишасы Кореш учюнджи йыл падишалыкъ япкъанда, Алла Даниялгъа (онынъ башкъа ады Белтешаццар эди) бир хабер ёллады. Бу хабер догъру олып, буюк дженк акъкъында эди . Лякин Даниял бу хаберни яхшы анълады, корьген шейлернинъ фаркъына барды.

‏ Daniel 10

Даниялнынъ Хиддекель дерьясы янында корьген тюшю

1 ^aФарс падишасы Кореш учюнджи йыл падишалыкъ япкъанда, Алла Даниялгъа (онынъ башкъа ады Белтешаццар эди) бир хабер ёллады. Бу хабер догъру олып, буюк дженк акъкъында эди ^{▼▼Мында даа бойле терджиме этмеге мумкюн: «Хабер оладжакъ шейлер акъкъында эди, ве шу хаберни анъламагъа пек къыйын эди».}. Лякин Даниял бу хаберни яхшы анълады, корьген шейлернинъ фаркъына барды. 2 О куньлери мен, Даниял, учь афта матем тута эдим. 3 Учь афта ичинде мен агъзыма не леззетли аш, не эт къойдым, не шарап ичтим, не де башымны ягънен ягъладым.

4 ^cБиринджи айнынъ 24-юнджи куню мен буюк Хиддекель дерьясы ялысында тура эдим. 5 ^dКозьлеримни котерип бакъсам, кетен урбасына кийинген, белине темиз алтындан ^{▼▼Къ. еуд. «Уфаз алтыны».} къушакъ багълангъан бирини корьдим. 6 ^fБедени – сары хризолит киби эди, юзю – йылдырым киби парылдай эди, козьлери – янгъан лампатлар киби эди. Къолларынен аякълары – йылтыравукъ бакъыр киби парылдай, сеси – чокъ адамнынъ давушы киби эди.

7 ^gЯнъгъыз мен, Даниял, буны корьдим. Янымда олгъан адамлар исе ич бир шейни корьмеди, амма олар пек къоркътылар ве сакъланмагъа къачтылар. 8 Мен янъгъыз къалдым ве бу аджайип шейни корьдим. Мен такъаттан кесильдим, чырайым ап-акъ кесильди, менде кучь къалмады. 9 ^hСонъ мен шу адамнынъ сесини эшиттим. Оны эшиткенде, мен сезгисиз къалдым ве, бетимнен ерге тюшип, бойле алда яттым. 10 ⁱСонъ манъа бир къол токъунды, мени котерди, ве мен тизлеримнен къолларымда турдым. 11 ^jАдам манъа:

– Эй, Даниял, Алла севген адам! Аякъкъа тур. Мен санъа ёлландым. Айтаджакъ сёзлеримни яхшы этип динъле, – деди.

О манъа бу сёзлерни айткъанда, мен титреп аякъкъа турдым.

12 ^kЛякин о манъа бойле деди:

– Къоркъма, Даниял! Аллагъа алчакъ гонъюльнен кельмеге ве окъугъан шейлерни анъламагъа юрегинъде къарар эткенинънен, биринджи куню де дуванъ эшитильди. Шунынъ ичюн де мен кельдим. 13 ^lФарс падишалыгъынынъ башлыгъы 21 кунь манъа къаршы турды. Мен фарслы башлыкъларгъа къаршы бир озюм олгъанда, буюк башлыкълардан олгъан Микъаиль манъа ярдымгъа кельди. 14 ^mШимди исе сонъки куньлерде халкъынънен не оладжагъыны санъа бильдирмеге кельдим. Сен корьген руя келеджек куньлер акъкъындадыр.

15 О манъа бу сёзлерни айткъанда, мен бетимнен ерге яттым да, тилим тутулды. 16 ⁿАмма адам огълуна ошагъан бири дудакъларыма тийди, ве мен агъзымны ачып, лаф этип башладым. Къаршымда тургъангъа:

– Эфендим! Мен корьген шей мени пек эеджанландырды, ве мен такъаттан кесильдим. 17 Мен, къулунъ, сеннен, эфендим, насыл лаф этейим? Мен такъаттан кесильдим, нефесим токътады, – дедим.

18 Инсангъа ошагъан бирев кене манъа тийип, мени къуветлендирди 19 ^oве бойле деди:

– Къоркъма, Алла севген адам! Сенде эр шей эсен-аман олсун! Джесаретли ве кучьлю ол!

О меннен лаф эткенде, мен къуветлендим ве онъа бойле дедим:

– Айт, эфендим! Сен манъа кучь бердинъ.

20 – Санъа не ичюн кельгенимни билесинъми? – деп сорады о. – Шимди мен къайтып, Фарс башлыгъынен дженк этеджегим. Дженкни битиргенимнен, Юнанистан башлыгъы келеджек. 21 ^pЛякин башта Акъикъат китабында нелер язылгъаныны санъа бильдиреджегим. Оларгъа къаршы турмакъ ичюн башлыгъынъыз Микъаильден гъайры манъа къол тутаджакъ ёкъ.