‏ Deuteronomy 23

Алланынъ халкъындан чыкъарылмасы акъкъында

1 ^aКимнинъ йымырталары эзильген я да чумийи кесильген олса, онъа РАББИнинъ джемаатына кирмеге олмаз.

2Пич балагъа РАББИнинъ джемаатына кирмеге олмаз. Онынъ онунджы несилине биле РАББИнинъ джемаатына кирмеге олмаз.

3 ^bАммонлыларгъа ве моавлыларгъа РАББИнинъ джемаатына кирмеге олмаз. Оларнынъ онунджы несилине биле ич бир вакъыт РАББИнинъ джемаатына кирмеге олмаз. 4 ^cЧюнки сиз Мысырдан кеткенинъизде, олар сизни пите ве сувнен къаршыламагъанлар ве, сизни къаргъамакъ ичюн, Арам-Нахараим еринден, Петор шеэринден олгъан Беорнынъ огълу Беламны парагъа туткъанлар. 5 ^dЛякин Алланъ олгъан РАББИ Беламны динълемеге истемеген. Алланъ олгъан РАББИ сени севгени ичюн, къаргъышны бахыткъа чевирген. 6Омюрбилля, ич бир вакъыт оларнен барышма, аранъыз аман олгъаныны истеме.

7 ^eЭдомлыларгъа нефрет беслеме, чюнки олар сенинъ сой-сопларынъдыр. Мысырлыларгъа да нефрет беслеме, чюнки сен оларнынъ топрагъында ят олып яшагъансынъ. 8Оларнынъ учюнджи несилинде догъгъан эвлятлары РАББИнинъ джемаатына кирмек мумкюнлер.

Ордуда темизлик къаиделери

9Душманларынъа къаршы сеферге чыкъкъанынъда, эр яманлыкътан сакъын. 10 ^fЭгер аранъызда бирде-бир акъай геджесинен тёшегинде олгъанындан арамланса, ордудан чыкъсын ве анда кирмесин. 11Акъшам тюшкенинен ювунсын да, кунь баткъанда ордугъа кирсин.

12Ордудан тыш озюнъе косьтергич яп ве анда аджетинъизни япмакъ ичюн кет. 13Алетлеринъде куречигинъ де олмакъ керек. Ордудан четте отургъанда, ерни къаз да, ишинъни битирген сонъ, айланып, оны комип къой. 14 ^gСени къуртаргъан, душманларынъны къолунъа берген Алланъ олгъан РАББИ ордунъда юре. Онынъ ичюн ордунъ азиз олсун. Ёкъса РАББИ насылдыр къапатылмагъан айыплыкъны корип, сенден кетеджек.

Джемааттаки яшайыш къаиделери

15Эфендисинден санъа къачып кельген къулны эфендисине къайтарма. 16Сенде, аранъызда, бирде-бир яшагъан еринъде озю бегенип сайлагъан ерде яшасын. Оны хорлама.

17 ^hИсраиль къызларында ве огъулларында не апай, не акъай путхане ороспулары олмасын. 18Ороспулыкънен къазангъан акъчаны не апайгъа, не акъайгъа бир тюрлю адакъ беджермек ичюн, Алланъ олгъан РАББИнинъ Эвине кирсетмеге ёл берме. Эм биринджиси, эм экинджиси Алланъ олгъан РАББИнинъ огюнде писликтир.

19Семетдешинъе кумюшни, ашлыкъны, я да башкъа бир шейни борджкъа бергенде, ич бир фаиз сорама. 20 ⁱЯбанджыгъа бирде-бир шейни борджкъа бергенде, ондан фаиз сорамакъ мумкюнсинъ, амма семетдешинъден дегиль. Бу эмирни тутсанъ, Алланъ олгъан РАББИ санъа мульк оларакъ береджек топракъта эр туткъан ишинъде берекет береджек.

21 ^jАлланъ олгъан РАББИге адакъ берсенъ, оны беджермек вакътыны созма. Ёкъса Алланъ олгъан РАББИ сенден мытлакъа сорар, ве башынъа гуна олур. 22Эгер адакъ бермеген олсанъ, башынъа гуна олмаз. 23Агъзынъдан чыкъкъан эр бир лафынъа бакъ; Алланъ олгъан РАББИге озь истегинънен, озь агъзынънен адагъан шейни ерине кетир.

24Башкъа адамнынъ юзюмлигине кирип, юзюмни джанынъ истегенинъ къадар ашамакъ мумкюнсинъ, савутынъны исе толдурма. 25 ^kБашкъасынынъ пишкен ашлыгъына кирип, башакъларны къолларынънен узьмек мумкюнсинъ, орагъынъны исе башкъа адамнынъ махсулына котерме.