‏ Deuteronomy 32

1 ^a– Къулакъ асынъыз, коклер, мен айтаджагъым, динъле, ер юзю, агъзымдан чыкъаджакъ лафларны.
2 ^bСагъанакъ киби огреткеним ягъар,
чыкъ киби лафым тюшер,
ягъмур киби янъы откъа ислер,
ягъмурчыкъ киби ешилликке олур.
3Мен РАББИнинъ Адыны шуретлейджегим;
сиз де Алламызнынъ улулыгъыны танынъыз!
4 ^cО – Къаядыр! Япкъанлары къусурсыз, ёллары адалетлидир.
О – ишанчлы Алла, Онда акъикъатсызлыкъ ёкъ,
О догъру ве инсафлыдыр!
5Олар Онъа къаршы ахлякъсыз арекет этти;
Онынъ балалары киби дегиль,
олар къусур олды, бозукъ ве яланджы несильдир.
6 ^dРАББИнъизге бойле къайтарасызмы,
ахмакъ ве акъылсыз халкъ?
О – сенинъ Бабанъ дегильми?
Сени яраткъан, ясагъан ве асыл эткендир!
7 ^eКъадимий заманларны акъылынъа кетир,
эвельки несиллернинъ йыллары акъкъында тюшюн.
Бабанъдан сора, о санъа айтар,
къартларынъыздан сора, олар санъа анълатырлар.
8 ^fЮдже Алла миллетлерге мульк бергенде
ве адамларны больгенде,
О, Алланынъ огъулларынынъ сайысына коре
халкъларгъа сынъырлар къойгъан.
9 ^gРАББИнинъ пайы Онынъ халкъы олды,
Якъуп – Онынъ шахсий мулькюдир.
10 ^hО, оны бош сахрада,
кийик увулдагъан чёльде тапкъан.
Оны къорчалап, акъыл берген,
козь бебеги киби оны сакълагъан.
11 ⁱОзь ювасыны къыбырдаткъан,
балаларынынъ устюнден
къалтырап учкъан къартал киби,
О, къанатларыны керип, оны алгъан,
къанатлары устюнде ташыгъан эди.
12Ялынъыз РАББИ онъа ёлбашчылыкъ этти,
эджнебий алла онен ёкъ эди.
13 ^jО, оны ер юзюнинъ тёпелерине котерген,
тарлаларнынъ берекетинен тойдургъан.
О, онъа ташлардан – балны,
чакъмакъташтан – зейтюн ягъыны ашкъа берген,
14эм де тувардан иримчикни, къой-эчкилерден сютни,
къозуларнынъ, Башан еринден къочкъарларнынъ ве текелернинъ ягъыны,
ве энъ яхшы богъдайны берген.
Юзюм къаныны, шарапны сен иче эдинъ.
15 ^kЕшурун ▼

▼Ешурун – Исраильнинъ шаиране ады, «догъру, намуслы олгъан» демектир.

семиз олгъан ве тепе башлагъан.
Семиз олгъансынъ, шишманлангъансынъ, толушкъансынъ!
Сонъ оны яраткъан Алланы къалдыргъан,
озь къуртулыш Къаясындан игренген.
16 ^mОлар Алланы эджнебий аллаларынен ачувландыргъан,
озь писликлеринен Оны гъазапландыргъан.
17 ⁿОзь къурбанларыны Аллагъа чалмайып,
шейтанларгъа, оларгъа белли олмагъан, янъы кельген,
деделерининъ хаберлери олмагъан аллаларгъа чалгъанлар.
18 ^oСени дюньягъа кетирген Къаяны унуткъансынъ,
сени дертнен догъгъан Алланы акъылынъдан чыкъаргъансынъ.
19Буны корьген РАББИ олардан игренген,
чюнки огъуллары ве къызлары Оны гъазапландыргъан.
20«Бетимни олардан гизлерим, – деди О. –
Сонъ аллары не оладжакъ бакъарым.
Олар – бозукъ несиль,
садыкъ олмагъан балалардыр.
21 ^pОлар Мен танымагъан аллаларынен Мени куньджю эткен,
бош путларынен Мени ачувландыргъанлар.
Мен де олар танымагъан халкънен
оларны куньджю этеджегим,
ахмакъ бир миллетнен ачувландыраджагъым.
22 ^qМеним гъазабым атеш алевлендирди,
онынъ янгъаны олюлернинъ дюньясына ете,
о, ер юзюни ве берекетини якъып юта,
дагъларнынъ этеклерини якъа.
23 ^rБашларына чокъ яманлыкълар тюшюреджегим,
эписи окъларымны оларгъа атаджагъым.
24 ^sАчлыкъ оларны бошатыр,
веба оларны ашар,
аджджы тишлемелер келир.
Оларгъа къаршы кийик айванларны,
тозда сюйрекленген зеэр махлюкъларны ёлларым.
25 ^tТышарыда акъайларны къылыч урар,
ичериде айны шу шейни дешет япар:
йигитлерни ве къызларны,
бебейлерни, чал къартларны гъайып этер.
26Айтмагъа истер эдим: “Оларны парчалайджагъым,
адамлар оларны ич бир вакъыт хатырламайджакълар”.
27 ^uАмма душманларынынъ ачувы ичюн шуны япмам.
Ёкъса, душманлары буны янълыш анълап, айтар:
“Бизим къудретимиз улу,
РАББИнинъ иши дегильдир бу!”»
28 ^vОлар – акъылыны джойгъан миллет,
араларында анълайыш ёкъ.
29Ах, акъыллы олып, олар буны анълап бильгейди,
оларнен не оладжагъыны анълагъайды!
30 ^wЭгер оларнынъ Къаясы оларны сатмагъан олса,
РАББИ оларны душманларынынъ къолуна бермеген олса,
бир адам бинъ адамны къувалап олур эдими?
Эки адам он бинъ адамны къувып олур эдими?
31 ^xОларнынъ къаясы бизим Къаямыз киби дегиль.
Душманларымыз биле буны анълайлар.
32 ^yОларнынъ юзюм пытакълары – Содом чубугъындан,
юзюми – Гоморанынъ тарлаларындандыр.
Юзюм данелери зеэр тёкелер,
салкъымлары аджджы оть шырасы кибидир.
33 ^zШарабы – аждерхаларнынъ зеэри,
йыланларнынъ ольдюриджи зеэридир.
34РАББИ шай айта:
«Мен буны сакъламадыммы?
Озь анбарларымда килитлемедимми?
35 ^aaАякълары тайгъанда,
Мен акътыман ве интикъам алырым.
Беля-къаза куню якъындыр,
азырландырылгъан шейлер оларгъа ашыкъып келелер».
36 ^abЛякин РАББИ Озь халкъыны акълайджакъ.
Къолларында такъат къалмайджакъ вакътында,
не къул, не азат къалмайджагъыны корьгенде,
Озь къулларына мерамет этеджек.
37 ^acО айтар: «Къайда аллалары,
олар сыгъынакъ къыдыргъан къаялары?
38Оларнынъ къурбан ягъларыны ким ашагъан,
шарап бахшышларыны ким ичкен?
Олар турсунлар да, сизге ярдым этсинлер,
сиз ичюн орьтю олсунлар!
39 ^adЭнди корюнъиз: Керчектен де, Мен – Одыр!
Менден гъайры алла ёкъ!
Мен ольдюрем, Мен де яшайыш берем,
Мен урам, Мен де тедавийлейим.
Меним къолумдан кимсе къуртарып оламаз.
40Емин этип, къолумны кокке тараф котерем ве айтам:
Мен, Эбедий, Озюмнен ант этем:
41 ^aeпарылдагъан къылычымны къайрарым,
суд этип, къолум оны тутар,
душманларымнынъ акътыманыны алырым,
Мени кореджек козьлери олмагъанларны джезаларым.
42 ^afОкъларымны къангъа бояларым,
къылычым беденлерни ашар,
ольдюрильген ве эсирге тюшкенлернинъ къаныны ичер,
душман башлыкъларынынъ башларына тояр».
43 ^agЭй, халкълар! Алланынъ халкъынен берабер къуванынъыз!
О, къулларынынъ къаны ичюн акътыманыны
ве Озь душманларынынъ интикъамыны алыр,
Озь топрагъы ве халкъы ичюн одеме этер.

44Бойледже, Муса Нуннынъ огълу Ехошуанен берабер келип, бу йырнынъ эписи сёзлерини халкъкъа айттылар.

Муса халкъны къандыра

45Бу сёзлернинъ эписини бутюн Исраильге айтып битирген сонъ, 46 ^ahМуса оларгъа:

– Мен сизге бугунь айткъан бу сёзлерни акъылларынъызда тутунъыз, бу Къанун сёзлерининъ эписини тутып беджермеге балаларынъызгъа эмир этинъиз. 47 ^aiБу сёзлер сиз ичюн бош лаф дегиль, олар – сизинъ яшайышынъыздыр. Иорданны кечип саип олмакъ ичюн кетеяткъан топракъта оларнынъ ярдымынен чокъ вакъыт яшарсынъыз, – деди.

Муса Ханаангъа кирмез

48О куню де РАББИ Мусагъа бойле деди:

49 ^aj– Аварим дагъларында, Ерихоннынъ къаршысында Моавда ерлешкен Нево дагъына котериль ве Мен Исраиль огъулларына мульк оларакъ береджек Ханаан топрагъына бакъ. 50 ^akХор дагъында ольген ве баба-деделерине къошулгъан агъанъ Харун киби, сен де котериледжек дагънынъ устюнде оледжексинъ ве баба-деделеринъе къошуладжакъсынъ. 51 ^alСиз Цин сахрасында, Мериват-Къадеш сувлары янында Исраиль огъулларынынъ огюнде Манъа къаршы имансыз арекет эттинъиз, оларнынъ арасында Меним мукъаддеслигимни къорчаламадынъыз. 52 ^amОгюнъде олгъан топракъны кореджексинъ, амма Мен Исраиль огъулларына береджек бу топракъкъа кирмейджексинъ.