Deuteronomy 27
Къурбанлыкъ акъкъында Мусанынъ эмири
1Сонъ Муса ве Исраиль акъсакъаллары халкъкъа бойле эмир эттилер: – Мен бугунь сизге берген эписи эмирлерни тутунъыз. 2 aАлланъыз олгъан РАББИ сизге береджек топракъкъа, Иордан озенининъ башкъа тарафына кечкен куню озюнъе балабан ташлар къойып, устьлерини киречнен сыла. 3Деделеринънинъ Алласы олгъан РАББИ айткъаны киби, О, санъа сютнен бал акъкъан топракъны береджек. Бу топракъкъа кирмек ичюн, озенни кечкенинънен, шу ташларнынъ устюнде бу Къануннынъ сёзлерини яз. 4Мен санъа бугунь буюргъаным киби, Иорданнынъ башкъа тарафына кечкен сонъ, шу ташларны Эвал дагъы устюне къой ве устьлерини киречнен аяла. 5 bАнда Алланъ олгъан РАББИге къурбан ерини, ташлардан япылгъан къурбан ерини къур, амма ташларны демир алетинен ишлеме. 6Алланъ олгъан РАББИнинъ къурбан ерини бутюн ташлардан яп ве сонъ Алланъ олгъан РАББИ ичюн айванларны къурбан чалып, бутюнлей якъ. 7 cАнда аманлыкъ къурбанларыны да чалып, оларны аша ве Алланъ олгъан РАББИнинъ огюнде шенълен. 8 dТашлар устюнде бу Къанун сёзлерини ачыкъ ве окъунакълы яз.Къаргъышлар
9 eМуса ве левийли руханийлер бутюн Исраильге: – Исраиль, сюкют олып, динъле! Бугунь сен Алланъ олгъан РАББИнинъ халкъы олдынъ. 10Алланъ олгъан РАББИнинъ сесини динълемек ве мен санъа бугунь буюргъан эмирлерни ве низамнамелерни тутмакъ керексинъ, – дедилер. 11Сонъ о куню Муса халкъкъа бойле эмир этти: 12 f– Иорданнынъ башкъа тарафына кечкенинъизнен, халкъкъа бахыт тилемек ичюн, Геризим дагъында бойле къабилелер турсунлар: Шимеон, Левий, Ехуда, Йиссакъар, Юсуф ве Биньямин. 13Къаргъыш айтмакъ ичюн, Эвал дагъында бу къабилелер турсунлар: Рубен, Гъад, Ашер, Зевулун, Дан ве Нафталий. 14Сонъ левийлилер бутюн исраиллилерге къычырып бойле айтсынлар: 15 g«Агъачтан я да иритильген маденден путны япкъан ве оны гизли ерге къойгъан адамгъа лянет! Устанынъ къолундан чыкъкъан бу шей РАББИнинъ козюнде пистир». Бутюн халкъ джевап берип: «Амин!» – десин. 16 h«Ана-бабасыны урьмет этмеген адамгъа лянет!» Бутюн халкъ: «Амин!» – десин. 17 i«Якъын адамнынъ топракъ пайынынъ сынъырыны къыбырдаткъан адамгъа лянет!» Бутюн халкъ: «Амин!» – десин. 18 j«Кёрны ёлдан ургъан адамгъа лянет!» Бутюн халкъ: «Амин!» – десин. 19 k«Ят халкълардан олгъанларгъа, оксюзлер ве тул апайларгъа адалетсиз янашкъан адамгъа лянет!» Бутюн халкъ: «Амин!» – десин. 20 l«Бабасынынъ апайынен яткъан адамгъа лянет, чюнки о, бабасыны масхара этти». Бутюн халкъ: «Амин!» – десин. 21 m«Бирде-бир айваннен джынсий багъда олгъан адамгъа лянет!» Бутюн халкъ: «Амин!» – десин. 22 n«Татасынен я да къызкъардашынен, бабасынынъ къызынен я да анасынынъ къызынен яткъан адамгъа лянет!» Бутюн халкъ: «Амин!» – десин. 23 o«Къайнанасынен яткъан адамгъа лянет!» Бутюн халкъ: «Амин!» – десин. 24 p«Якъын адамны гизлиден ольдюрген адамгъа лянет!» Бутюн халкъ: «Амин!» – десин. 25 q«Къабаатсыз адамны ольдюрмек ичюн къапар алгъан адамгъа лянет!» Бутюн халкъ: «Амин!» – десин. 26 r«Бу Къануннынъ сёзлерини тутып беджермеген адамгъа лянеттир!» Бутюн халкъ: «Амин!» – десин.
Copyright information for
CrhCTB