‏ Ecclesiastes 1

Эр шей бошуна

1 ^aМына Джемаат Башынынъ сёзлери. О, Давутнынъ огълу олып, Ерусалим шеэринде падишалыкъ япа эди.

2 ^b– Бош, бош, эр шей бошуна, – деди Джемаат Башы.

3 ^cЕр юзюнде япкъан ишлеринден адамгъа не файда?
4 ^dНесиллер келир, несиллер кечер,
дюнья исе эбедий турар.
5 ^eКунеш догъар, кунеш къавушыр,
къавушкъан сонъ, догъаджакъ ерине ашыкъар.
6Ель дженюпке уфюрип, шимальге айланыр.
Ель айланыр-айланыр ве озь ёлуна къайтыр.
7 ^fЭписи дерьялар денъизге акъар,
денъиз исе толып-ташмаз.
Сонъ дерьялар, акъмакъ ичюн, кене ирмакъларына къайтыр.
8 ^gЭр бир шей ёрулта;
адам эр шейни анълатып оламаз.
Козь бакъып тоймаз,
къулакъ эшитип толмаз.
9 ^hЭвель не олгъан олса, кене о олур,
эвель не япылгъан олса, кене о япылыр.
Ер юзюнде ич бир янъылыкъ ёкъ.
10Базыда: «Бакъ, бу янъылыкътыр!» – деп,
бирде-бир шей акъкъында айталар.
Амма бу да бизден эвель,
кечкен асырларда олгъан эди.
11 ⁱЭвель олып кечкен кимсенинъ акъылында ёкъ,
илериде оладжагъы да бизден сонъ кельгенлернинъ акъылларында къалмаз.

Джемаат Башынынъ омюр теджрибеси

12Мен Джемаат Башы, Ерусалимде Исраильнинъ падишасы эдим. 13 ^jКок тюбюнде бутюн олгъан шейлерни икмет иле огренип анъламакъ ичюн, бутюн юрегимнен янаштым. Бу, Алла инсан огъулларына огърашмакъ ичюн берген иш къыйындыр. 14Ер юзюнде олгъан эписи ишлерни мен тюшюнип корьдим, эписи бошуна ве ель къувалавдыр!

15 ^kКъыйышны догъуртмагъа,
олмагъан шейни де саймагъа чаре олмаз.

16 ^lМен бойле тюшюндим: «Мына мен улу олдым ве Ерусалимде менден эвель олгъан эписи падишалардан зияде икметке саип олдым. Акъылым чокъ икмет ве бильгиге толды». 17Икметни ве акъылсызлыкънен ахмакълыкъны анъламакъ ичюн, бутюн юрегимнен ынтылдым – бу да ель къувалав олгъаныны анъладым.

^mЧокъ икмет чокъ къасевет догъурыр,
бильги арттыргъан кедер де арттырыр.
18